Երիտասարդ ընտանիքին երկու օր ժամանակ են տվել. փաստաբանն ահազանգում է` ոստիկանության գործողություններն անօրինական են

Երվանդ Քոչարի 23 հասցեում գտնվող շենքի բնակարաններից մեկում Երեւան քաղաքի Կենտրոն-Նորք-Մարաշ ոստիկանության աշխատակիցները մոտ երկու շաբաթ առաջ պատրաստվում էին առերեւույթ անօրինական գործողություններ իրականացնել` պատճառաբանելով, որ ներխուժում է տեղի ունեցել: Իսկ իրականում խնդրի հիմքում վեճն էր վարձակալի եւ վարձատուի միջեւ: Ըստ էության, վարձատուն որոշել էր տան վարձավճարն ավելացնել, վարձակալն էլ, վկայակոչելով իրենց միջեւ կնքված պայմանագիրը, մերժել էր: Արդյունքում ո՛չ ավել, ո՛չ պակաս վարձատուն ոստիկանությանը «հրահանգել է» ազատել իր բնակարանը, որտեղ այս պահին բնակվում են Ռուզաննա Հարությունյանը, իր ամուսինը եւ անչափահաս 8-ամյա տղա երեխան, որը դեռեւս նախորդ անգամ ոստիկանության ներխուժման պատճառով, ըստ բժշկի եզրակացության, վախեցել էր, որից հետո նրա մոտ առաջացել է կակազություն եւ գիշերամիզություն: Ինչեւիցե, «Լեւ Գրուպ» փաստաբանական գրասենյակի ղեկավար, հայտնի փաստաբան, երեխայի ու ծնողների շահերի պաշտպանությունը ստանձնած ԼԵՎՈՆ ԲԱՂԴԱՍԱՐՅԱՆԸ ոստիկանությանը համապատասխան փաստաթղթեր ներկայացնելուց հետո, մասնավորապես այն, որ ներխուժում չի կարող դիտվել, քանի որ առկա է վեճ կողմերի միջեւ, ինչպես նաեւ կողմերի միջեւ առկա է պայմանագիր, ավելին` դատարանում այս վիճելի գույքի հետ կապված դատական գործ կա, ոստիկանությունն ընդունել էր ի գիտություն եւ նշել, որ լրացուցիչ ուսումնասիրության կարիք են տեսնում, ինչի համար անհրաժեշտ է 15 օր: Բայց արի ու տես, որ 15 օր անց ոստիկանությունը կրկին ժամանել էր նույն բնակարան եւ ոչ թե հայտնելու, թե ինչ են քննարկել ու որոշել, այլ կրկին փորձելու վտարել ընտանիքին վերոնշյալ բնակարանից:

Սեփականատիրոջ փաստաբան ԱՐԹՈՒՐ ԲԱՇԽՅԱՆՆ էլ ստանձնել էր ոստիկանության գործողությունների «դիրիժորությունն» ու ցուցումներ էր տալիս, թե ինչ անեն, ում դուրս հրավիրեն, ում` ներս թողնեն: Այս անգամ ոստիկանությունը որոշեց երկու օր ժամկետ տալ երիտասարդ ընտանիքին, որպեսզի լքեն բնակարանը, ինչին դեմ էր սեփականատերը, իսկ վարձակալողի խնդրանքը` ավելի երկար ժամկետ տալ, այդպես էլ չընդունվեց:

Դեպքի վայրում եղել է «Իրավունքը» եւ անդրադառնալով վերոնշյալին` պարզել փաստաբան Լ. Բաղդասարյանի տեսակետը:

- Նախ նշեմ, որ տեղի ունեցածը ոստիկանության հերթական անօրինական գործողությունն էր: Երկու շաբաթ առաջ ոստիկանությունը վերցրեց փաստաթղթեր եւ ասաց, որ կուսումնասիրեն, կտեղեկացնեն: Այսինքն` որպես վարույթի կողմ, պարտավոր էին ուսումնասիրել եւ պատասխան տալ: Իսկ այդ պատասխանի հետ կապված` իրավունք վերապահեին, որպեսզի վիճարկեինք գործողությունը կամ չվիճարկեինք: Մինչդեռ նորից եկել են` առանց զանգի, վախեցնելով երեխային, դիվադադար անելով շենքի ժողովրդին ու պահանջելով, որ հենց հիմա պետք է դուրս գան բնակարանից: Զանգը ստանալուց մեկ ժամ հետո եղել եմ տեղում, բացատրել եմ ոստիկաններին, թե նման պայմաններում, անգամ եթե գտնում եք, որ ներխուժման փաստն ակնհայտ է, ինչո՞ւ ժամկետ չեք տալիս: Եվ որոշեցին, որ երկու օր ժամկետ կտան, որը եւս աբսուրդի ժանրից է: Ցանկանում եմ փաստել, որ ոստիկանութունը, ըստ էության, իրականացնում է դատարանի ֆունկցիա, մնում է փակեն դատարանները: Անձն ունի պայմանագիր, դատարանի վարույթում քննվող գործ, վճարումները կատարել է, ավելին` հաշվառված է այս հասցեում եւ, չգիտես ինչու, ոստիկանությունը որոշել է, որ ներխուժում է տեղի ունեցել: Սա անօրինականություն է, որի իրավական հետեւանքներին պետք է հետամուտ լինենք, որպեսզի Հայաստանում այլեւս նման անօրինականություններ տեղի չունենան:

– Պարոն Բաղդասարյան, տպավորություն էր, որ սեփականատիրոջ փաստաբանի համար նորություն էր, որ վարձակալողները հաշվառված են այդ հասեցում: Ինչպե՞ս սա հասկանալ:

– Տարօրինակ էր, որ սեփականատիրոջ ներկայացուցիչն ասում է, թե տեղյակ չէ, երբ երկու տարի է մարդը վճարում է կատարում, մոտ 3 հազար դոլարից ավելի գումար է վճարել, գործն էլ գտնվում է դատարանում: Ինչ-որ աբսուրդի ժանրից խոսակցություններ են տարվում, բայց խնդիրն այն է, որ անօրինականություններն այնքան ակնհայտ են, որ դրա հետեւանքների կրողը լինելու է ՀՀ քաղաքացին: Այսօր այս շենքում նման գործողություններ արեցին, վաղը մեկ այլ շենքում կիրականացնեն:

– Ի՞նչ քայլեր եք պատրաստվում անել:

– Հանցագործության մասին պետք է հաղորդում տալ, հետագայում կտեսնենք, թե ինչ պետք է անել:

ՀՐԱՆՏ ՍԱՐԱՖՅԱՆ

Այս թեմայով Արցախից բռնի տեղահանված Երվանդ Աղաբալյանը կալանավորվեց մեկ ամիս ժամկետով. փաստաբան ՀՀ 3-րդ նախագահ Սերժ Սարգսյանը Հանրապետության հրապարակ իսկանդեր էր բերում, դուք՝  Նիկոլին. Դանիելյան Մեզ որեւէ եղանակով հնարավոր չէ վախեցնել. Հենրիխ Դանիելյան ՀՀԿ ԵԿ անդամ Ժորա Ավետիսյանը կալանավորվեց երկու ամսով. Հենրիխ Դանիելյան Մարտակերտի քաղաքապետին կալանավորելն ունի միայն մեկ նպատակ. Արսեն Բաբայան