Նիկոլ Փաշինյանին սպառնում է 15-20 տարի կամ ցմահ ազատազրկում. հաղորդում` հանցագործության մասին

ՀՀ գլխավոր դատախազության շենքի դիմաց երեկ տեղի ունեցավ հավաք, որի ժամանակ ներկաները միացան Փաստաբանական ակադեմիայի ռեկտոր, 2013-2021 թթ. ՀՀ փաստաբանների պալատի նախագահ Արա Զոհրաբյանի եւ պահեստազորի գնդապետ, ռազմական փորձագետ Հայկ Նահապետյանի կողմից ՀՀ գլխավոր դատախազությանն ուղղված հաղորդմանը` հանցագործության մասին: Ըստ այդմ` պահանջ ներկայացվեց քրեական գործ հարցուցել` ՀՀ քրեական օրենսգրքի 418-րդ (1-ին մաս) եւ 421-րդ հոդվածներով` Նիկոլ Փաշինյանի կողմից Տավուշում ՀՀ ինքնիշխան տարածքները եւ բնակավայրերը Ադրբեջանին հանձնելու գործընթաց սկսելու կապակցությամբ։

Մասնավորապես` ներկայացված հաղորդումը հանցագործության մասին վերաբերում է այս տարվա մարտի 18-ին ՀՀ վարչապետի պարտականությունները կատարող անձի Տավուշ այցելությանը, իր հայտարարություններին եւ տրված գնահատականներին, ինչի մասին ՀԱՅԿ ՆԱՀԱՊԵՏՅԱՆՆ ընդգծեց. «Կարծում եմ` որեւիցե մեկի համար գաղտնիք չէ, որ ինչ կատարվում է այսօր Տավուշում, իրականում սահմանազատման եւ սահմանագծման հետ որեւիցե աղերս չունի: Դա մեր հայրենիքի այդ հատվածի հանձնումն է մեր հարեւանին: Ժողովրդի մի մասը հստակ գիտակցում է այն վտանգը, որն այդ հանձնումից հետո կախվելու է մեր պետության, մեր երկրի քաղաքացիների գլխին: Ընդամենն ասեմ, որ հանձնելուց հետո` 3-րդ բանակային կորպուսի առաջին պաշտպանական բնագիծն ամբողջովին փլուզվելու է: ՌԴ-ից Վրաստանով Հայաստան մտնող գազամուղը որոշ հատվածներով անցնելու է Ադրբեջանի վերահսկողության ներքո: Փակվելու է Հայաստան-Վրաստան միջպետական երկու ճանապարհներից մեկը: Հակառակորդը վերցնելու է իշխող բարձունքներ եւ ջրային ռեսուրսներ: Այսինքն` Նոյեմբերյանի շրջանն ամբողջովին կտրվելու է ջրային ռեսուրսներից, եւ գյուղացու կյանքն անտանելի է դառնալու»:

Ներկայացնելով հաղորդման համար հիմք հանդիսացող փաստերը` ԱՐԱ ԶՈՀՐԱԲՅԱՆԸ նշեց, որ ՀՀ քրեական օրենսգրքի 418-րդ հոդվածի 1-ին մասի համաձայն, պետական դավաճանությունը՝ թշնամու կողմն անցնելը, լրտեսությունը, օտարերկրյա պետությանը, օտարերկրյա կամ միջազգային կազմակերպությանը կամ դրա ներկայացուցչին պետական գաղտնիք պարունակող տեղեկություն հանձնելը կամ այդ տեղեկությանը նշված անձանց ծանոթանալու համար պայման ստեղծելը կամ թշնամական գործունեություն իրականացնելու համար այլ օգնություն ցույց տալը, որը կատարել է ՀՀ քաղաքացին՝ ի վնաս ՀՀ ինքնիշխանության, տարածքային անձեռնմխելիության կամ արտաքին անվտանգության՝ պատժվում է ազատազրկմամբ՝ 15-20 տարի ժամկետով կամ ցմահ ազատազրկմամբ:

Նշենք, որ հավաքին ներկա էին եւ հանցագործության մասին հաղորդմանը միացան նաեւ «Ուժեղ Հայաստան Ռուսաստանի հետ հանուն նոր Միության» շարժման գործադիր կոմիտեի անդամ, ՍԻՄ կուսակցության նախագահ Հայկ Բաբուխանյանը, շարժման կանանց խորհրդի նախագահ Ալլա Հակոբյանը, «Ազգի Ձայն» կուսակցության նախագահ, ՀՀ վաստակավոր արտիստ Մհեր Մեսրոպյանը, «Ազատություն» կուսակցության նախագահ, ՀՀ նախկին վարչապետ Հրանտ Բագրատյանը, «Մեկ առողջություն» կոալիցիայի ղեկավար Գրիգոր Գրիգորյանը, Ազգային արժեքների պաշտպանության «Կամք» հասարակական նախաձեռնության ղեկավար Վահագն Չախալյանը, ԱՍԱԼԱ-ի նախկին անդամ, Հայաստանի ժողովրդական շարժման համակարգող, քաղաքագետ-թուրքագետ Վազգեն Պետրոսյանը, նախկին փոխոստիկանապետ, ոստիկանության գեներալ-մայոր Գագիկ Համբարձումյանը, արդարադատության գեներալ-մայոր Թաթուլ Պետրոսյանը, ՀՀ վաստակավոր արտիստ Գայանե Ներսիսյանը եւ այլք:

ՀՐԱՆՏ ՍԱՐԱՖՅԱՆ

Այս թեմայով Սա մի մարդու անձնական վրեժխնդրության քաղաքական ֆարս է. Նաիրա Զոհրաբյան Իրականում ինչու իմպիչմենտը ձախողվեց. Հայկ Բաբուխանյանը փակագծեր է բացում Քաղաքացիական բախումների սպասե՞նք Ինչ հիշում ենք ձեր շարժման առաջնորդն ասում է՝ ունենք իմպիչմենթի համար անհրաժեշտ ձայներ. Կոնջորյան Բաց 2018-ին ասել եմ՝ Նիկոլին բերում են Արցախը պատերազմով հանձնելու. Հայկ Նահապետյան