Իմ որոշումն ընդունել եմ ավելի շուտ, քան համաժողովն էր. «Հանրային Ձայն» խմբակցության ղեկավարը փակագծեր է բացում

Երեւանի ավագանու «Հանրային ձայն» խմբակցության ղեկավար Վահան Ավագյանը ներկա չէր համանուն կուսակցության արդեն նախկին պատվավոր նախագահ Վարդան Ղուկասյանի հրավիրած համաժողովին, որտեղ նա ազդարարեց ԴՕԿ անունով նոր կուսակցություն ստեղծելու մասին: Վ. Ղուկասյանը տեղեկացրեց, որ համաժողովից մեկ ժամ առաջ Վ. Ավագյանին կանչել են Քննչական կոմիտե, որպես վկա` տարիներ առաջ հարուցված ինչ-որ քրեական գործով: Ի՞նչ է տեղի ունեցել Քննչական կոմիտեում, եւ ինչպիսի՞ որոշում ունի ՎԱՀԱՆ ԱՎԱԳՅԱՆԸ` համաժողովին Վ. Ղուկասյանի կողմից արված քաղաքական որոշումների հետ կապված` «Իրավունքը» մանրամասներ է պարզել:

— Ինչո՞ւ հենց համաժողովի օրը եւ նույն ժամին Ձեզ հրավիրեցին Քննչական կոմիտե, որքանո՞վ այն կապ ուներ այդ օրը կայանալիք քաղաքական հավաքի հետ, եւ ընդհանրապես` ի՞նչ քրեական գործի մասին է խոսքը:

— Այս հարցով, երեւի, դիմեք քննչական մարմիններին: Ես չեմ կարող այդ հարցին պատասխանել: Այդ հարցի պատասխանն իրենք կունենան, ոչ թե ես: Ինձ կանչել էին, ես ներկայացել եմ:

— Ձեր խուսափողական պատասխանից կարելի՞ է ենթադրել, որ, պարզապես, չեք կարող փակագծեր բացել:

— Իհարկե, ոչինչ չեմ կարող բարձրաձայնել, քանի որ գաղտնիություն պարունակող տեղեկատվություն է: Հետեւապես, ինչ էլ ասեմ, գտնում եմ, որ ի վնաս ինձ կարող է անդրադառնալ:

— Վարդան Ղուկասյանը հայտարարեց, որ այլեւս հրաժարվում է «Հանրային ձայն» կուսակցությունից եւ ստեղծում է նոր կուսակցություն: Դուք, լինելով «Հանրային ձայն» կուսակցության փոխնախագահը` ի՞նչ դիրքորոշում ունեք` դո՞ւրս եք գալու կուսակցությունից եւ արդյոք միանալու եք ԴՕԿ կուսակցությանը:

— Նման հարցի պատասխանելու համար ինձ որոշակի ժամանակ է պետք: Ես հայտարարությամբ հանդես կգամ իմ եւ «Հանրային ձայն» կուսակցության հարաբերությունների մասին, եւ դուք բոլորդ կտեսնեք իմ դիրքորոշումը: Ընդ որում` ոչ միայն իմ, այլեւ խմբակցության:

— Փաստորեն, այս պահին կուսակցությունից դուրս գալու եւ որեւէ կուսակցության անդամակցելու օրակարգ չունե՞ք:

— Ես օրակարգ ունեմ, բայց հիմա հայտնելու ցանկություն չունեմ: Ավելին ասեմ` իմ որոշումն ընդունել եմ ավելի շուտ, քան համաժողովն էր:

— Այսինքն` այրե՞լ եք կամուրջները Արտակ Գալստյանի հետ, հետեւապես Վարդան Ղուկասյանի հետ քաղաքական ճանապարհ կանցնե՞ք:

— Ես չէի ուզենա նման բարձր խոսքեր օգտագործել` կամուրջներ այրել-չայրելու մասին: Ես ունեմ դիրքորոշում, անցած ճանապարհ, ինքնասիրություն եւ իմ կամային հատկանիշները:

— Խոսակցություններ էին շրջանառվում, որ այսքանից հետո` «Հանրային ձայն» խմբակցությունը կարող է պառակտվել: Ի՞նչ կասեք այս մասին:

— Դե, հակառակորդ ուժերին շատ ցանկալի է, որ պառակտվի նաեւ խմբակցությունը: Բայց խմբակցությունը շատ կուռ է, ամուր է, եւ չեմ տեսնում նախապայմաններ պառակտման:

— Բարդ չի՞ լինելու խմբակցության հետագա աշխատանքը մի անունով, որի հետ ստացվում է, որ այլեւս կապ չունի:

— Ճիշտն ասած, ես ո՛չ անուններին, ո՛չ էլ վերնագրերին եմ ուշադրություն դարձնում: Միշտ ուշադրություն եմ դարձնում բովանդակությանը եւ կատարած աշխատանքին: Իսկ այն, որ ասում եք, թե բարդ է լինելու, մեզ համար միշտ ամեն ինչ բարդ է, որովհետեւ մենք ռադիկալ ընդդիմություն ենք:

ՀՐԱՆՏ ՍԱՐԱՖՅԱՆ

Այս թեմայով Վահագն Չախալյանի խափանման միջոցի վերաբերյալ դատարանի որոշումը կհրապարակվի վաղը` 11։30-ին. փաստաբան Պահը երկրի համար օրհասական է, եւ սխալվելու իրավունք չկա. Վահան Բաբայան Եվ ո՞վ էր ձեզ ասել, որ իբր կրկնելով 2018թ սցենարները հիմա նույնը ստացվելու էր. Վահան Բաբայան Ընդդիմությունը պետք է մոդեռնիզացվի, հին մեթոդները այլեւս չեն գործում. Վահան Բաբայան Ռուսաստանը 30 տարի պաշտպանել է մեզ. Հայկ Բաբուխանյան