Կոնկրետ թոշակառուներին ու հիվանդ մարդկանց մահվան դուռն են ուղարկում. ահազանգ

«Ասենք` էդ ՀՀ առողջապահության նախարարությունը կամ ՀՀ Կառավարությունը դեղատներից պարտադիր դեղատոմսով դեղ գնելու համակարգը ափալ-թափալ ներդնելուց առաջ մտածե՞լ է թոշակառուների մասին, կամ` հենաշարժողական խնդիրներ ունեցող մարդիկ ինչպե՞ս են անձամբ անընդհատ ներկայանալու բժշկի, անցնելու բոլոր պրոցեդուրաները, հանձնելու պահանջվող անալիզները, որպեսզի իրենց համար դեղատոմս դուրս գրեն։ Էլ ֆինանսական ահռելի բեռը չասեմ, որ թոշակառուն իր հայաստանյան թոշակով ի վիճակի չէ վճարել։ Յուրաքանչյուր կաբինետի պրոցեդուրան նվազագույնը 10 000 դրամ է, անալիզների գինը սկսում է նվազագույնը 6000 դրամից, պլյուս բժշկի խորհրդատվությունը` 8-ից 10 000 դրամ, դեղատոմսի բլանկը` 5000 դրամ։ Դուք աննորմա՞լ եք։ Սա ի՞նչ աբսուրդի երկրում ենք ապրում։ Բավական չէ՞ մարդկանց կլպեք։

 

Դեռ մի բան էլ համարձակվում եք համեմատություն անել ու պատճառաբանել, թե աշխարհում վաղուց այդպես է։ Իսկ տեղյակ ե՞ք, որ այդ նույն աշխարհում, օրինակ Եվրոպական երկրներում գործում է պարտադիր ապահովագրման համակարգը, որով դեղերը անվճար են ձեռք բերվում, գործում է ընտանեկան բժշկի համակարգը, որով բժիշկը ինքն է գալիս տուն նշանակումն անում և տրամադրում համապատասխան դեղորայքը, և ի վերջո` թոշակառուների համար դեղերն առհասարակ անվճար են Եվրոպայում։ Առանց այս համակարգերը ներդնելու, այս ի՞նչ լոնքերով քայլեր եք անում, ա՛յ տգետներ , ա՛յ փնթինե՛ր, բավ չէ՞ քաղաքացու գրպանը մտնեք ու ստորացնեք սեփական քաղաքացուն։

 

Հետո էլ ասում են` ինչու են մարդիկ թքում ու հեռանում այս երկրից։ Նախկիններին էին բան ասում, սրանք լրիվ տվել անցել են իրենց ագահությամբ, ստահակությամբ, անգրագիտությամբ ու անպատժելիությամբ։ Հիմա թալանչին ո՞վ է` նախկինները, թե ներկաները։ Նախկինները եթե մի բան էլ ծածուկ էին անում, սրանք հատուկ օրենք են հանում` քաղաքացուն «օրենքով» գռփելու համար։ Սրանք կոնկրետ թոշակառուներին ու հիվանդ մարդկանց մահվան դուռն են ուղարկում...

 

Հ.Գ. Այս գրառմանս նպատակը լրագրող գործընկերներիս ուշադրությունը հրավիրելն է։ Պետք է աղմկել, թույլ չտալ... համոզված եմ` դուք նույնպես կունենաք թոշակառու ծնողներ կամ ծանոթներ եւ մտածում եք նրանց մասին...», - գրել է օգտատեր ԱՆՆԱ ՎԱՐԴԱՆՅԱՆԸ:

Հավանեցի՞ր հոդվածը, կիսվիր ընկերներիդ հետ՝

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝