Պահանջում ենք դատական կարգով առ ոչինչ հայտարարել Նիկոլ Փաշինյանի հայտարարությունները, որտեղ Արցախը նշվում է Ադրբեջանի կազմում

Ժողովուրդների ինքնորոշման իրավունքը և մարդու իրավունքները միջազգային իրավանորմերում ու ժամանակակից աշխարհում. Արցախի խնդրի լուծման ուղիները»

Խորհրդաժողովի

ՀԱՅՏԱՐԱՐՈՒԹՅՈՒՆ

ՆԻԿՈԼ ՓԱՇԻՆՅԱՆԻ ԿՈՂՄԻՑ ՀՀ ՍԱՀՄԱՆԱԴՐՈՒԹՅՈՒՆԸ  ԵՎ ՕՐԵՆՍԴՐՈՒԹՅՈՒՆԸ ԽԱԽՏԵԼՈՒ ՎԵՐԱԲԵՐՅԱԼ

ՀՀ  Սահմանադրության նախաբանում ասված է. «Հայ ժողովուրդը, հիմք ընդունելով Հայաստանի անկախության մասին Հռչակագրում  հաստատագրված հայոց պետականության հիմնարար սկզբունքները …»:

Իսկ ՀՀ Անկախության հռչակագրում ասված է.

«Հայկական ԽՍՀ Գերագույն խորհուրդը՝ արտահայտելով Հայաստանի ժողովրդի միասնական կամքը, գիտակցելով իր պատասխանատվությունը հայ ժողովրդի ճակատագրի առջև համայն հայության իղձերի իրականացման և պատմական արդարության վերականգնման գործում, ելնելով մարդու իրավունքների համընդհանուր հռչակագրի սկզբունքներից և միջազգային իրավունքի հանրաճանաչ նորմերից, կենսագործելով ազգերի ազատ ինքնորոշման իրավունքը, հիմնվելով 1989 թվականի դեկտեմբերի 1-ի «Հայկական ԽՍՀ-ի և Լեռնային Ղարաբաղի վերամիավորման մասին» Հայկական ԽՍՀ Գերագույն խորհրդի և Լեռնային Ղարաբաղի Ազգային խորհրդի համատեղ որոշման վրա…»:

ՄԻԱԺԱՄԱՆԱԿ ՀԱՅԿԱԿԱՆ ԽՍՀ ԳԵՐԱԳՈՒՅՆ ԽՈՐՀՐԴԻ ԵՎ ԼԵՌՆԱՅԻՆ ՂԱՐԱԲԱՂԻ ԱԶԳԱՅԻՆ ԽՈՐՀՐԴԻ

Ո Ր Ո Շ ՈՒ Մ Ը «ՀԱՅԿԱԿԱՆ ԽՍՀ-Ի ԵՎ ԼԵՌՆԱՅԻՆ ՂԱՐԱԲԱՂԻ ՎԵՐԱՄԻԱՎՈՐՄԱՆ ՄԱՍԻՆ» ՓԱՍՏՈՒՄ Է 

Հիմնվելով ազգերի ինքնորոշման համամարդկային սկզբունքների վրա և արձագանքելով հայ ժողովրդի` բռնի ուժով բաժանված երկու հատվածների վերամիավորման օրինական ձգտմանը, Հայկական ԽՍՀ Գերագույն խորհուրդը և Լեռնային Ղարաբաղի Ազգային խորհուրդը որոշում են.

1. Հայկական ԽՍՀ Գերագույն խորհուրդը ճանաչում է Լեռնային Ղարաբաղի Ինքնավար Մարզի ինքնորոշման փաստը` հաստատված ԼՂԻՄ-ի մարզային խորհրդի 1988 թվականի փետրվարի 20-ի և հուլիսի 12-ի նստաշրջանների, ինչպես նաև մարզի բնակչության լիազոր-ներկայացուցիչների 1989 թվականի օգոստոսի 16-ի համագումարի և Ազգային խորհրդի հոկտեմբերի 19-ի նիստի որոշումներում:
2. Հայկական ԽՍՀ Գերագույն խորհուրդը ճանաչում է Լեռնային Ղարաբաղի լիազոր-ներկայացուցիչների համագումարը և նրա ընտրած Ազգային խորհուրդը որպես մարզի ներկայումս գործող միակ օրինական իշխանություն:
3. Հայկական ԽՍՀ Գերագույն խորհուրդը և Լեռնային Ղարաբաղի Ազգային խորհուրդը հռչակում են Հայկական ԽՍՀ-ի և Լեռնային Ղարաբաղի վերամիավորումը: Լեռնային Ղարաբաղի բնակչության վրա տարածվում են Հայկական ԽՍՀ-ի քաղաքացիության իրավունքները:
4. Հայկական ԽՍՀ Գերագույն խորհուրդը և Լեռնային Ղարաբաղի Ազգային խորհուրդը ստեղծում են համատեղ հանձնաժողով (իր աշխատանքային ապարատով)` Հայկական ԽՍՀ-ի և Լեռնային Ղարաբաղի վերամիավորումն իրագործելու ուղղությամբ գործնական քայլեր մշակելու համար:
5. Հայկական ԽՍՀ Գերագույն խորհուրդը և Լեռնային Ղարաբաղի Ազգային խորհուրդը պարտավորվում են ներկայացնել Հյուսիսային Արցախի Շահումյանի շրջանի և Գետաշենի ենթաշրջանի հայ բնակչության ազգային շահերը:
6. Հայկական ԽՍՀ Գերագույն խորհրդի նախագահությանը, Հայկական ԽՍՀ Մինիստրների խորհրդին և ԼՂԻՄ-ի Ազգային խորհրդի նախագահությանը հանձնարարվում է գործադրել սույն որոշումից բխող բոլոր անհրաժեշտ միջոցառումները` իրականացնելու համար Հայկական ԽՍՀ-ի և Լեռնային Ղարաբաղի քաղաքական, տնտեսական և մշակութային կառուցվածքների իրական միաձուլումը միասնական պետական-քաղաքական համակարգում:

Հայաստանի Գերագույն խորհրդի 1992 թ. հուլիսի 8-ի որոշումը  սահմանում է հետեւողականորեն  աջակցել  Լեռնային Ղարաբաղի Հանրապետությանը պաշտպանել իր բնակչության իրավունքները: «Հայաստանի Հանրապետության համար անընդունելի է ցանկացած միջազգային կամ ներքին փաստաթուղթ, որում  Լեռնյաին Ղարաբաղի Հանրապետությունը նշված կլինի Ադրբեջանի կազմում»:

ՀՀ օրենսդրությանը հակառակ`

2022թ. հոկտեմբերի 6-ին  Պրահայում  Նիկոլ Փաշինյանը հայտարարել է, որ  Արցախը ճանաչում է  Ադրբեջանի կազմում: Այնուհետեւ այդ հայտարարությունը  նա բազմիցս կրկնել է:

2023թ. սեպտեմբերին ՀՀ կառավարությունը հայտարարել է, որ Արցախի բնակչությանը տրված Հայաստանի Հանրապետության  անձնագրերը  վավեր չեն որպես ՀՀ քաղաքացու լիարժեք անձնագիր, այլ հանդիսանում են ճամփորդական փաստաթուղթ: Թեեւ, ՀՀ անձնագրի մասին օրենսդրական ակտերում սահմանված չեն  ՀՀ անձնագրի  երկու տեսակ:

Այսպիսով, Նիկոլ Փաշինյանը եւ ՀՀ պետական պաշտոնները զբաղեցնող մի շարք այլ անձինք խախտել են ՀՀ Սահմանադրության  անբաժանելի մասը հանդիսացող նախաբանը, ՀՀ Սահմանադրության 1-ին, 2-րդ, 3-րդ, 6-րդ, 23-րդ, 25-րդ, 26-րդ, 28-րդ, 32-րդ, 39-րդ, 40-րդ, 47-րդ, 60-րդ, 62-րդ, 73-րդ, 123-րդ, 146-րդ, 152-րդ, 152-րդ, 167-րդ, 176-րդ, 191-րդ հոդվածները:

Ելնելով վերոնշյալից պահանջում  ենք դատական կարգով

1. Առ ոչինչ հայտարարել Նիկոլ Փաշինյանի եւ  ՀՀ պետական պաշտոնները զբաղեցնող այն անձանց, ինչպես նաեւ` պետական իշխանության մարմինների այն հայտարարությունները, որտեղ Արցախը նշվում է Ադրբեջանի կազմում:
2. Առ ոչինչ ճանաչել պետական մարմինների այն բոլոր որոշումները, որոնցով  Արցախի բնակիչներին տրված ՀՀ պետական նմուշի անձնագրերը  ճանաչվել են ճամփորդական փաստաթղթեր եւ դատական կարգով վերականգնել Արցախի այն բնակիչների ՀՀ քաղաքացիությունը, որոնք ստացել են ՀՀ պետական նմուշի անձնագրեր:

Պահանջում ենք նաեւ ՀՀ դատախազությունից  միջոցներ ձեռնարկել ՀՀ Սահմանադրությունը եւ այլ օրենսդարական ակտերը խախտելու  վերաբերյալ:

Ձեւավորում ենք իրավապաշտպանների խումբ սույն Հայտարարությանը իրավական ընթացք տալու համար:

Երեւան. 01 դեկտեմբերի 2024թ. 

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝