Երբ հենց քո սեփական պետությունն է թիրախավորում իր ազգային եկեղեցին՝ դա արդեն խորքային եւ մտահոգիչ խնդիր է. Պողոսյան

«Իրավունք»-ը զրուցել է Քաղաքագիտության եւ դիվանագիտության հանրային դպրոցի դասախոս, քաղաքագետ ԱՐԱ ՊՈՂՈՍՅԱՆԻ հետ: Նա անդրադարձել է «պետություն» եւ «եկեղեցի» հասկացություններին, հատկապես վերջին շրջանում տեղի ունեցող ներքաղաքական իրադարձությունների համատեքստում։

— Ինչպես վերջին օրերին նշել են բազմաթիվ սրբազաններ, իրականում մեր եկեղեցին հաճախ է թիրախավորվել, եւ այս օրը բացառություն չէր։ Սակայն այս անգամ առանձնահատկությունն այն է, որ թիրախավորումն արվում է ոչ թե արտաքին ուժերի, այլ հենց մեր սեփական պետականության կողմից։ Պատմության ընթացքում նման դեպքեր հազվադեպ են եղել՝ թերեւս կարելի է հիշել մեկ-երկու օրինակ, սակայն ներկայիս իրավիճակը բոլորովին այլ է։

Երբ քո եկեղեցին թիրախավորում է օտար պետությունը՝ դա մի բան է, բայց երբ հենց քո սեփական պետությունն է թիրախավորում իր ազգային եկեղեցին՝ դա արդեն խորքային եւ մտահոգիչ խնդիր է։ Այս պարագայում պետք է նկատել, որ թիրախավորելով եւ հեղինակազրկելով եկեղեցին՝ պետական քաղաքականությունը, փաստացի, հարվածում է ինքն իրեն։ Այս մասին ես կարող եմ վստահությամբ խոսել, քանի որ եթե ուսումնասիրենք իրավիճակը խորությամբ, կտեսնենք, որ Հայ Առաքելական Եկեղեցին մեր ժամանակներում եղել եւ շարունակում է մնալ մեր ամենակայացած ու ամենաազդեցիկ ազգային ինստիտուտներից մեկը։

Եկեղեցին, իր հարյուրամյակների պատմությամբ, կարող էր ծառայել որպես գործիք՝ հայկական ինքնության, արժեքների եւ ազատության տարածման համար, հատկապես քրիստոնեական աշխարհում։ Սակայն եթե այս ճանապարհով շարունակենք թիրախավորել եւ վարկաբեկել այն, ապա ապագայում այս ինստիտուտի հեղինակությունն ու վստահությունը վերականգնելը շատ բարդ խնդիր է դառնալու՝ որպես ժամանակ եւ մեծ ջանքեր պահանջող հարց»:

ԴԻԱՆԱ ՄԱՆՈՒԿՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝