Վեր կանգնեք ձեր ունայն և աղետաբեր անձնական, խմբակային շահերից. Հայր Սուրբ

Նիկոլ Փաշինյանը եւ իր վերնախավը շարունակում են եկեղեցու դեմ արշավը։  Մայր Աթոռ Սուրբ Էջմիածնի Արխիվի և Թանգարանների տնօրեն Հոգեշնորհ Տեր Ասողիկ աբեղա Կարապետյանը իր խոսքում լավագույնս էր նկարագրել առկա իրողությունները, մասնավորապես ասելով. «Դիվական խրախճանք է Քրիստոնյա Հայաստանում»։ Ուրեմն երբ ու ի՞նչ կերպ եք պատկերացնում այս մահաբեր խրախճանքի կանգնեցումը։

- Այդ խրախճանքի սկզբի և վախճանի վերաբերյալ պետք է խոսեն ՀՀ իշխանություններն ու քաղաքական ողջ դաշտում առկա ուժերն իրենց առաջնորդներով ու գործիչներով: Եկեղեցին Աստծո ամեն օր քարոզում և արարում է հավատք, հույս, սեր, համերաշխություն և միություն, ազգային սուրբ միություն, որն էլ պետք է պահպանի ու պաշտպանի, զարգացնի ու հարատև դարձնի Հայոց Հանրապետությունը: Թող վերստին ամենքին լսելի լինի, որ միայն մեր Սուրբ Եկեղեցին է ամենայն պատասխանատվությամբ և ճշմարտապես գիտակցում ազգային պետություն ունենալու անբեկանելի անհրաժեշտությունը: Եվ այս գիտակցության զորությամբ է, որ Եկեղեցին և ամեն մի հոգևորական հանդես է գալիս որպես տեր և ավանդապահ ազգային ողջ ժառանգության ի Հայաստան և ի Սփյուռս: Արդ, Եկեղեցին հայ իրականության մեջ միմիայն աստվածային սիրո և ուրախության խնջույք է պատրաստում՝ հրավիրելով ամեն մի հայի:

- Հայր Սուրբ, հանրության մի ստվար զանգված էլ կոչ է անում եկեղեցուն բանադրել Փաշինյանին եւ հնչեցնել բոլոր եկեղեցիների զանգերը։ Հետաքրքիր է այս մասով Ձեր դիտարկումը։

- Հանրության մի ստվար զանգվածը, առհասարակ ողջ հանրությունը պետք է սպասի և լսի Եկեղեցու կոչը, հորդորն ու պատգամը: Եկեղեցին՝ որպես աստվածային սուրբ հաստատություն, իր նվիրապետական սուրբ կարգով գիտե ինչպես վարվել, ինչն ինչպես, երբ և ում ասել: Եկեղեցուն Սուրբ Հոգին է առաջնորդում. հարկավոր է հոգու ունկերով լսել այդ կեցուցիչ ու փրկարար ձայնը: Մեր մաղթանքն է և աղոթքը, որ իշխանությունները, ընդդիմադիրներն ու բոլոր հայերը լսեն այդ ձայնը և շեն ու անվտանգ պահպանեն հայ կյանքը՝ պետական յուր սարքով ու կարգով: Վեր կանգնեք ձեր ունայն և աղետաբեր անձնական, խմբակային շահերից, ջանքեր գործադրեք և առաջնորդվեցեք բացառապես ազգային և պետական բարձրագույն շահերով: Ահա, այս գիտակցության խիստ պակաս կա մեր պետական ու հասարակական-քաղաքական ասպարեզներում:

- Հայկական եկեղեցին իր ժողովրդին տանում է դեպի աղետ. Նման հայտարարությամբ է հանդես եկել Փաշազադեն։ Այս եւ նմսնատիպ հայտարարությունները ինչ մեսիջ են ՀՀ իշխանություններին։

-Հայրենի երկրի որևէ իշխանություն պետք է ականջալուր լինի միմիայն իր Ազգային Եկեղեցու ձայնին, որը ճշմարտության և խղճի միակ վավեր ձայնն է ի հայս: Իսկ Փաշազադեն պետք է ջանք գործադրի և հաղթահարի իր բարդույթները. գիտեք դյուրի՞ն էր նստել մի սեղանի շուրջ Վազգեն Ա., Գարեգին Ա. և Գարեգին Բ. քաջարի և մեծախոհ Հայոց Հայրապետների հետ: Հայրապետներ, ովքեր խոսում են պատմական ողջ ճշմարտության ու արդարության ահեղ ձայնով:
 

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝