Ինչո՞ւ Ծառուկյանը չստացավ տիտղոսային մենամարտ․ UFC-ի նախագահը բացում է փակագծերը

UFC-ի նախագահ Դանա Ուայթը պատասխանել է թեթև քաշային կարգում առաջին համար զբաղեցնող, Հայաստանը ներկայացնող Արման Ծառուկյանի հեռանկարների վերաբերյալ հարցին, գրում է armsport.am-ը:

Ծառուկյանը գլխավորում է դիվիզիոնի վարկանիշային աղյուսակը՝ Կատարում կայացած մրցաշարում Դեն Հուկերին հաղթելուց հետո։ 2025 թվականի հունվարին նա հնարավորություն ուներ մենամարտելու Իսլամ Մախաչևի հետ՝ չեմպիոնական գոտու համար, սակայն հրաժարվել էր մենամարտից՝ նախորդ օրը ստացած վնասվածքի պատճառով։

— Այս պահին Իլյա Թոփուրիան արձակուրդում է, իսկ ժամանակավոր տիտղոսի համար կպայքարեն Փեդի Փիմբլեթը և Ջասթին Գեյջին։ Այսինքն՝ արդյո՞ք սա նշանակում է, որ Արման Ծառուկյանը դուրս մնաց պայքարից։

«Նա հնարավորություն ուներ, և բոլորը տեսան, թե ինչպես դա ավարտվեց։ Այժմ նա ստիպված է լինելու քրտնաջան աշխատել, որպեսզի նորից վաստակի գոտու համար մենամարտելու իրավունքը։ Եվ ինձ համար միևնույն է, թե նա վարկանիշում որ համարն է։

Մենք չափազանց շատ ենք աշխատում մրցաշարերի նախապատրաստման վրա, որպեսզի նման բաներ տեղի չունենան։ Մենք գրասենյակում հաճախ քննարկում ենք այն բոլոր անհեթեթությունները, որոնք տեսել ենք 20 տարվա ընթացքում։ Բայց այն, ինչ եղավ Ծառուկյանի հետ… Այդպես պարզապես չի կարելի վարվել», — ասել է Ուայթը մամուլի ասուլիսի ժամանակ։

Ավելի վաղ հայտնի էր դարձել, որ 2026 թվականի սկզբին ժամանակավոր տիտղոսի համար մենամարտ կանցկացնեն Ջասթին Գեյջին և Փեդի Փիմբլեթը, թեև մինչև 70 կգ քաշային կարգի գլխավոր հավակնորդը Հայաստանը ներկայացնող Արման Ծառուկյանն է։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝