«Եվրատեսիլն» ավարտվեց ռուս-ուկրաինական պատերազմով. Հայաստանը 7-րդ տեղում է

Եվրոպայի սանկցիաներն ընդդեմ Ռուսաստանի տարածվեց նաեւ «Եվրատեսիլ» երաժշտական մրցույթի վրա: Ուկրաինա-Ռուսաստան պայքարում Եվրոպայի թեթեւ ձեռքով հաղթեց Ուկրաինայի ներկայացուցիչ Ջամալան (Սուսանա Ջամալադինովան)` իր թուրքաթաթարական մուղամով ու քաղաքական ելույթով: Իսկ Հայաստանը հայտնվեց 7-րդ հորիզոնականում` բարձր 12 միավորներ ստանալով Ռուսաստանից, Բուլղարիայից, Իսպանիայից, 10-ական միավորներ` Հունաստանից, Մոնտենեգրոյից: Իսկ Հունգարիան փոխանակ իր դատական համակարգին մեկ նշանակեր` մարդասպան ռամիլսաֆարովներին արդարացնելու համար, «Եվրատեսիլում» որոշեց ընդամենը մեկ միավոր տալ Հայաստանին:

Ի դեպ, Հայաստանն իր ամենաբարձր միավորը նվիրեց Ֆրանսիայի ներկայացուցչին, մինչդեռ մեր բարեկամ երկրից նույնպիսի պատասխան չստացանք: Չմոռանանք նշել, որ Ադրբեջանը շտապեց Ռուսաստանի մոտ լավամարդ երեւալ ու իր 12 միավորը տալ հենց նրանց, բայց, իհարկե, այս անգամ հստակ էր` մեր ռազմական ու տնտեսական դաշնակից Ռուսաստանը նախընտրեց Հայաստանին: Սա, իհարկե, ազգային ժյուրիի տված 50 տոկոս արդյունքներն էին, քանի որ այս տարի որոշվել էր առանձին-առանձին հայտարարել:

Իսկ sms քվեարկության արդյունքները` մնացած 50 տոկոսը, Եվրոպան լղոզեց ու իր ուզած ձեւով ներկայացրեց: Արդյունքում իբրեւ չքաղաքականացված «Եվրատեսիլը» հերթական անգամ ապացուցեց ճիշտ հակառակը` մրցակցությունը թողնելով Ռուսաստանի եւ Ուկրաինայի միջեւ: Ու, բնականաբար, հերթական եվրոապտակը բաժին հասավ Ռուսաստանին: Հատկանշական է այն, որ Ջամալայի երգը՝ «1944» անվանումով նվիրված էր Ղրիմի թաթարների դեպորտացիային եւ «ցեղասպանությանը», ինչն հակասում է «Եվրատեսիլի» կանոններին: Վառ օրինակ այն, որ նախորդ տարի` Հայոց ցեղասպանության 100-րդ տարելիցին, Հայաստանը ներկայացնող Genealogy խմբի երգի բովանդակության մեջ նույն «Եվրատեսիլի» պարտադրանքով «մի՛  ժխտիրը»  դարձավ  «առերեսվի՛ր  ստվերներին, baby», որպեսզի քաղաքական ենթատեքստ չունենա, բայց արի ու տես, որ թաթարական ծագումով Ուկրաինայի ներկայացուցչին կարելի էր անգամ շրջանցել եվրատեսիլյան տաբուները:

Ինչեւէ, մեզ մնում է մխիթարվել նրանով, որ Իվետա Մուկուչյանը փայլուն ներկայացավ բեմում, կարողացավ աշխարհի ուշադրությունը սեւեռել Լեռնային Ղարաբաղի հանրապետության ճանաչման ու հիմնախնդրի  վրա եւ դառնալ այս տարվա ամենաքննարկված հայուհին Եվրոպայում: Ավելին` եթե մենք հայտնվեցինք 7-րդ տեղում, ապա Ադրբեջանը ամենավերջին հորիզոնականներում հազիվ էր տեղավորվել` եւ ոչ մի երկրից բարձր միավորներ չկորզելով: Ու, ի վերջո, բախտավորություն է «Եվրատեսիլում» չհաղթելն ու եվրոպական անառականոցի վերածված այդ մրցույթը Հայաստան չբերելը: Իսկ Եվրոպան թող թաթարաթուրքական մուղամի տակ ողբա իր արժեքների ու վարած քաղաքականության վերջնական անկումը:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝