«Գեղի կլուբը» չի վախեցնում ՀՀՇ-ին. ընտրություններին մասնակցելու են

 «Իրավունք»-ն ամիսներ առաջ գրել էր, որ ՀՀՇ-ը  ցանկություն ունի մասնակցել  խորհրդարանական ընտրություններին, սակայն կուսակցությունը  դեռ վերջնական որոշում չունի: ՀՀՇ գործադիր քարտուղար Կարեն Կարապետյանն «Իրավունք»-ի հետ զրույցում ասաց, որ ընտրությունները կուսակցությունների համար լավագույն դրսեւորման միջոցն են: ՀՀՇ-ը, հավանաբար, դաշինքով կմասնակցի ընտրություններին, բայց թե որ քաղաքական ուժերի հետ, պարզ չէ: «Աշնանն ամեն ինչ կհստակեցվի: Կհամագործակցենք այն քաղաքական ուժերի հետ, որոնց հետ կգտնենք գաղափարական ընդհանրություններ»,- ասաց գործադիր քարտուղարը:

 ՀՀ առաջին նախագահ Լեւոն Տեր-Պետրոսյանը 2013 թ-ին հայտարարել էր, որ ՀՀՇ-ը վերածվել է «գեղի կլուբի» եւ կուսակցության անվանումն ասոցացվում է մթի, ցրտի հետ: Մտավախություն չունի՞ ՀՀՇ-ը, որ ընտրողը ձայն չի տա ՀՀՇ-ին: «Ոչ, չկա մտավախություն: Քաղաքական ուժի անունը չէ, որ առաջացնում է բացասական էմոցիաներ, այլ  կուսակցության անդամների վարած քաղաքականության հետեւանքով է ձեւավորվում համակրանքը կամ հակակրանքը  որեւէ ուժի հանդեպ: Ինչ վերաբերում է այդ գնահատականներին, չեմ ցանկանում անդրադառնալ այդ գնահատականներին: Կարծում եմ` մեր քաղաքական պլատֆորմով ու ծրագրով կկարողանանք համոզել հանրությանը»,- եզրափակեց Կարեն Կարապետյանը:

Սոնա Դավթյան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝