ԴԵՆ ԲԻԼԶԵՐՅԱՆԸ ԷԼԹՈՆ ՋՈՆ ՉԷՐ, ՈՐ ԿԱՌԱՎԱՐԱԿԱՆ ԸՆԴՈՒՆԵԼՈՒԹՅԱՆ ԱՐԺԱՆԱՆԱՐ

Կինոաստղ, կանանց, ալկոհոլի, զենքի, մարիխուանայի եւ էքստրեմալ մարզաձեւերի մոլի սիրահար, 37-ամյա Դեն Բիլզերյանը, ով մշտապես սոցցանցերի օգտատերերի ուշադրության կենտրոնում է, երկօրյա այցով Հայաստանում էր: Ամերիկահայ միլիոնատերը սեփական ինքնաթիռով հայրենիք էր ժամանել հոր` Փոլ Բիլզերյանի եւ եղբոր` Ադամի հետ: Պոկերի արքան եղբոր` Ադամի հետ պատմական հայրենիք էր եկել հայկական անձնագիր ստանալու նպատակով: Իսկ նրանց հայրը` Փոլ Բիլզերյանը վաղուց հայկական անձնագիր ունի:

ԱՆՁՆԱԳԻՐԸ ՁԵՌՔԻՆ ՈՒՂԵՎՈՐՎԵԼ Է ԶԻՆԿՈՄԻՍԱՐԻԱՏ

 ՀՀ օրհներգի ներքո քաղաքացիություն ստանալուց հետո Բիլզերյանը անձնագիրը ձեռքին ուղեւորվել է ՀՀ գլխավոր զինկոմիսարիատ, ներկայացրել անհրաժեշտ փաստաթղթերն ու հաշվառման կանգնել ՀՀ Զինված ուժերի պահեստազորում: Այժմ նա, իբրեւ ՀՀ քաղաքացի, համարվում է զինապարտ:

ԶԲՈՍՆԵԼ Է ՀՅՈՒՍԻՍԱՅԻՆ ՊՈՂՈՏԱՅՈՎ

 Բիլզերյանը զբոսնել է Երեւանի կենտրոնով, մասնավորապես Հյուսիսային պողոտայով, որտեղ էլ կանգ են առել բարձրակարգ սրճարաններից մեկում` ճաշել, ապա շարունակելով զբոսանքը Թումանյան փողոցի հագուստի շքեղ խանութներից մեկում գնումներ կատարել` իրեն ուղեկցող գեղեցկուհիների հետ: Ողջ ընթացքում նրա հետ է եղել ՀՀ երկրորդ նախագահ Ռոբերտ Քոչարյանի կրտսեր որդին` Լեւոն Քոչարյանը:

ՍԵՎԱՆՈՒՄ ՍԿՈՒՏԵՐ Է ՎԱՐԵԼ ՈՒ ՀԱՄՏԵՍԵԼ ՁԿԱՆ ԽՈՐՈՎԱԾ

 Լեւոն Քոչարյանի եւ նրա կնոջ` երգչուհի Սիրուշոյի ուղեկցությամբ այցելել է Սեւան, որտեղ Բիլզերյանը սկուտեր է վարել Սեւանա լճում: Այնուհետեւ համտեսել սիգ ձկան խորոված ու հայկական լիմոնադ:

ԸՆԹՐԵԼ Է ՍԱՄՎԵԼ ԱԼԵՔՍԱՆՅԱՆԻՆ ՊԱՏԿԱՆՈՂ ՌԵՍՏՈՐԱՆՈՒՄ

 Սեւանում միքանիժամյա հանգիստ վայելելուց հետո Բիլզերյանները վերադարձել են Երեւան եւ ընթրել ԱԺ պատգամավոր Սամվել Ալեքսանյանին պատկանող ռեստորաններից մեկում, որտեղ հայկական ճոխ հյուրասիրության են արժանացել` համտեսել են գառան խորոված, թոնրի գաթա ու հայկական լավաշ:

ԱՆՏԵՍԵԼՈՎ ԱԴՐԲԵՋԱՆԱԿԱՆ «ՍԵՎ ՑՈՒՑԱԿՆԵՐԸ»` ՄԵԿՆԵՑ ԱՐՑԱԽ

 Հաջորդ օրն առավոտյան Բիլզերյանները, չվախենալով ադրբեջանական «սեւ ցուցակներից», ՀՀ երկրորդ նախագահի կրտսեր որդու` Լեւոն Քոչարյանի եւ ՀՀ վաստակավոր երգչուհի Սիրուշոյի ուղեցությամբ մեկնել են Արցախ` ՀՀ ռազմաօդային ուժերի ՄԻ-8 ուղղաթիռով: Ճանապարհին այցելել է Ստեփանակերտում գտնվող «Մենք ենք մեր լեռները» հուշարձանին, որը հայտնի է «Տատիկ ու պապիկ» անվանումով, եղել է զինվորական հրաձգարանում եւ ցույց տվել կրակելու իր հմտությունները: Այնուհետեւ այցելել Սուրբ Ամենափրկիչ Ղազանչեցոց եկեղեցի` Շուշիում: Բիլզերյանը ոչ պաշտոնական հանդիպում է ունեցել Արցախի մարդու իրավունքների պաշտպան Ռուբեն Մելիքյանի հետ:

Ի ԴԵՊ

Դեն Բիլզերյանը ապրիլյան քառօրյա պատերազմի ժամանակ ԼՂՀ-ի բանակին տրամադրել է դիպուկահարների համար նախատեսված 30 M82 Barret ինքնաձիգ, 50 M110 ինքնաձիգ ու գիշերային տեսահսկման համակարգեր, ինչն այդ ժամանակ հիսթերիա էր առաջացրել Ադրբեջանում, որին իրար հաջորդելով անդրադառնում էր ադրբեջանական մամուլը:

ԴԵՆ ԲԻԼԶԵՐՅԱՆԻ ՀԱՅԱՍՏԱՆՅԱՆ ԱՅՑԸ ՆՅԱՐԴԱՅՆԱՑՐԵԼ Է ԱԴՐԲԵՋԱՆԻՆ

Այնուամենայնիվ, թեպետ Դեն Բիլզերյանի Հայաստան այցը համարվում է մասնավոր, ինչպես ասում են` ճանաչողական այց, բայց փաստենք, որ նրա այցը նյարդայնացրել է ադրբեջանական մամուլին: Սակայն, կարծես թե, հայաստանյան իշխանությունները Բիլզերյանի այցի մասին ո՛չ տեսել են, ոչ էլ` լսել, տպավորություն է, որ Բիլզերյանի այցելած պատմական հայրենիքը Մոզամբիկում է: Դե, բնական է` առնական կեցվածքով հայազգի Բիլզերյանը հո նույնասեռական Էլթոն Ջոնը չէ՞ր, որ Հայաստան գար իր ամուսնու հետ ու կառավարական` վարչապետի ու նախագահի մակարդակով ընդունելության արժանանար:

ԲԻԼԶԵՐՅԱՆԻՆ ՈՒՂԵԿՑՈՒՄ Է ԻՐ ՍԵՎԱՀԵՐ ԳԵՂԵՑԿՈՒՀԻՆ

 Կանանց կուռք Բիլզերյանին Հայաստանում ուղեկցում էր նրա սեւահեր գեղեցկուհին` Սուելին Մեդերեոսը: Վերջինս, Հայաստանին սիրահարված, իր սոցկայքերից մեկում գրել է. «Ընդամենը 24 ժամ եմ Հայաստանում, բայց հասցրել եմ սիրահարվել: Հայաստանն այնքան գեղեցիկ է, իսկ այնտեղ բնակվող մարդիկ` ջերմ»: Հայաստան ժամանած սեւահեր գեղեցկուհին ինստագրամի իր էջը ողողել էր երեւանյան լուսանկարներով ու տեսանյութերով:

15 ՓԱՍՏ ԴԵՆ ԲԻԼԶԵՐՅԱՆԻ ՄԱՍԻՆ 

1. Դեն Բիլզերյանը ծնվել է 1980 թվականի դեկտեմբերի 10-ին:

2. Նրա playboy-ի կարողութունը գնահատվում է 225 միլիոն դոլար:

3. Պոկերի փակ առաջնություններում հաղթել է ավելի քան 50 միլիոն դոլար:

4. Պրոֆեսիոնալ պոկերում զգալի հաջողության է հասել 2009 թվականին World Series of Poker-ի ժամանակ: Նա խաղացել է հեռուստատեսային շոուի 6 էպիզոդներում` նվիրված այդ առաջնությանը:

5. ՙԻնստագրամում՚ ունի 23, 8 մլն հետեւորդ եւ համարվում է ՙԻնստագրամի Արքա՚: 

6. Առանձնատուն ունի Կալիֆորնիայում եւ Նեւադայում:

7. Ունի անձնական Gulfstream ինքնաթիռ, որով էլ ժամանել է Հայաստան:

8. Ունի զենքի մեծ հավաքածու, որն այս պահին հասել է 150-ի:

9. Նրա թանկարժեք ժամացույցների հավաքածուն այս պահին գերազանցել է 100-ը, որտեղ ամենամատչելին 43 000 դոլար է, իսկ ամենաթանկարժեքը` 822 000  դոլար:

10. Սիրում է զբաղվել էքստրեմալ մարզաձեւերով` սքուբա դայվինգով, լեռնամագլցությամբ, սիրում է նաեւ ձյունագնացներ ու շքեղ մեքենաներ: 

11. Երկու անգամ ստացել է սրտի կաթված:

12. Բիլզերյանների ընտանիքի մեծ մասը զոհվել է Հայոց ցեղասպանության ժամանակ:

13. Որպես տրյուկներ կատարող դերասան մասնակցել է ՙՕլիմպոսի անկումը՚ ֆիլմի նկարահանումներին: 1 մլն դոլար է ներդրել ՙԿենդանի մնացածը՚ ֆիլմում` որպես պրոդյուսեր: Ոչ մեծ դերերով է հանդես եկել նաեւ 2014-ին ՙՈւրիշ կինը՚ ֆիլմում:

14. Բիլզերյանի դեմ 2014-ին 2 կին դատական հայց են ներկայացրել. մեկը մի պոռնոաստղ, որին ամերիկահայ միլիոնատերը գցել է տանիքից, իսկ մյուսը` մի մոդել, որի խոսքերով` Բիլզերյանը ոտքով հարվածել է իր դեմքին:

15. Բիլզերյանը վարում էր1965թ. AC Cobra ավտոմեքենա, Գոլդշտեյն` 2010թ. Ferrari 458 Italia:

Երեկ երեկոյան Դեն Բիլզերյանը Հայաստան այցից հետո մեկնեց Թաիլանդ:

ԼԻԼԻԹ ԵՂԻԱԶԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝