«ՈՒՐԱԽ ԵՄ, ՈՐ ՄԵԴԱԼՈՎ ԵՄ ՎԵՐԱԴԱՐՁԵԼ ՀԱՅԱՍՏԱՆ». ԱԶԱՏ ՈՃԻ ԸՄԲՇԱՄԱՐՏԻ ԵՎՐՈՊԱՅԻ Մ23 ՏԱՐԵԿԱՆՆԵՐԻ ՓՈԽՉԵՄՊԻՈՆ, Մ23 ԱՇԽԱՐՀԻ ԲՐՈՆԶԵ ՄԵԴԱԼԱԿԻՐ ՄԵԺԼՈՒՄ ՄԵԺԼՈՒՄՅԱՆ

Ռումինիայի մայրաքաղաք Բուխարեստում կայացած ազատ ոճի ըմբշամարտի Եվրոպայի մեծահասակների առաջնության ժամանակ բրոնզե մեդալ է նվաճել Մ-23 տարեկանների Եվրոպայի փոխչեմպիոն, Մ-23 Աշխարհի բրոնզե մեդալակիր ՄԵԺԼՈՒՄ ՄԵԺԼՈՒՄՅԱՆԸ։ Սա մեծահասակների կազմում նրա առաջին մասնակցությունն էր։

Iravunk. com-ի մարզական թղթակցի հետ զրույցում Մեժլումն այսպես մեկնաբանեց իր նվաճումը . - 61կգ քաշային կարգում եմ հանդես եկել։

֊ Հավատում էի, որ մեդալ կնվաճեմ։ Կարող էի ավելին անել, սակայն կարծում եմ, փորձի պակասը թույլ չտվեց առաջ շարժվել։ Իմ առաջին մասնակցությունն էր մեծահասակների կազմում։ Լավ էի պատրաստվել։ Սփոփիչ գոտեմարտս շատ բարդ տրվեց։ Վրացի մրցակիցս շատ փորձառու էր։ Ուրախ եմ, որ մեդալով եմ վերադարձել Հայաստան։ Ամեն ինչ կանեմ, որ մեդալի գույնը փոխեմ հետագայում։ Այս Եվրոպայի առաջնությունում 10 քաշայիններից մեկն ինձ էր վստահված։ Մտածմունքս միայն այն էր, որ արդարացնեմ մարզիչներիս հույսերը, որովհետև հասկանում էի, որ ինձանից շատ մեծ հույս ունեին։ Բայց այս արդյունքից չեմ ընկճվել և վստահ եմ, որ Աշխարհի առաջնության ժամանակ կշտկեմ բոլոր սխալներս ու ավելի լավ հանդես կգամ։ Այս Եվրոպայի առաջնությանն ընդհանուր երեք գոտեմարտ եմ ունեցել։ Առաջինում պարտվել եմ Աշխարհի չեմպիոնին, ապա երկու գոտեմարտ էր տրված, որ նվաճեմ բրոնզե մեդալ, երկուսն էլ պիտի հաղթեի։ Առաջինը Վրաստանի ներկայացուցիչն էր։ Նա գլխավոր հակառակորդն էր իմ այս մրցաշարում։ Կարողացա լավ տրամադրվել ու լավ գոտեմարտ ցույց տալ։ Երրորդ տեղի համար պայքարում գերմանացի ըմբիշն էր, որը Եվրոպայի չեմպիոն է։ Հաղթեցի ու այդպես բրոնզե մեդալի արժանացա։

- Ինչ տվեց քեզ այս նվաճումը։

- Սա շատ կարևոր էր ինձ համար, որովհետև առաջին անգամ էի մասնակցում մեծահասակների Եվրոպայի առաջնությանը։ Այս բրոնզե մեդալը ինձ տվեց մեծ փորձ և վստահություն սեփական ուժերի հանդեպ։ Ուրախ եմ, որ  կարողացա հաջող հանդես գալ Եվրոպայի առաջնությանը։

- Մեժլում, հետաքրքիր է, ազգականներիդ մեջ կան մարզիկներ։

- Անվանի ըմբիշ Գնել Մեժլումյանը իմ հարազատն է։ Նա եղել է ԽՍՀՄ սպորտի վարպետ, ԽՍՀՄ չեմպիոն։ Ամեն տարի Տավուշի մարզի Բերդ քաղաքում անցկացվում է նրա անվան հուշամրցաշար։

- Իսկ ո՞րն է քո հաջողության գրավականը։

- Սպորտի մեջ հաջողության հասնելու համար պետք է լսել և հավատալ մարզիչներին, հավատալ սեփական ուժերին, պահել շատ մեծ մարզական կարգապահություն։ Նշեմ, որ մեծահասակների կազմում 2022-ին եմ դարձել Հայաստանի չեմպիոն, ապա 2023-ին մասնակցել եմ մինչև 23 տարեկանների Եվրոպայի առաջնությանը։ Շատ մեծ շանսեր ունեի չեմպիոնի տիտղոսը նվաճելու համար, սակայն, ափսոս եզրափակչում վնասվածքի պատճառով պարտվեցի և արծաթե մեդալի արժանացա։ Հետո մասնակցեցի նաև մինչև 23 տարեկանների Աշխարհի առաջնությանը։ Սխալներիս պատճառով բրոնզե մեդալ նվաճեցի, պարտվելով առաջին գոտեմարտում։

- Հետագա ծրագրերի մասին ինչ կասես։

- Առաջիկայում բավականին լուրջ մրցաշարեր կան, ջանք չեմ խնայելու, որպեսզի կարողանամ հաջող հանդես գալ, նվաճել ոսկե մեդալ։

- Շնորհակալություն, Մեժլում, մեզ ժամանակ տրամադրելու համար։

- Ես էլ եմ շնորհակալ, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ