«ՄԵԿՆԱՐԿԱՅԻՆ ՄԵՆԱՄԱՐՏԻ ԺԱՄԱՆԱԿ 4-1 ՀԱՇՎՈՎ ՀԱՂԹԵՑԻ ԻՏԱԼԻԱՅԻ ՆԵՐԿԱՅԱՑՈՒՑՉԻՆ». ԲՌՆՑՔԱՄԱՐՏԻ ԵՎՐՈՊԱՅԻ ՉԵՄՊԻՈՆ ԴԱՎԻԹ ՍԻՄՈՆՅԱՆ
ՍպորտՎերջերս Հայաստանի Բռնցքամարտի երիտասարդական հավաքականը հայրենիք վերադարձավ Խորվաթիայի Պորոշ քաղաքում կայացած Եվրոպայի առաջնությունից։ Մեր մարզիկները նվաճել են 5 մեդալ 3 արծաթե և 2 բրոնզե։ Պատվո հարթակի երկրորդ աստիճանին են կանգնել ու արծաթե մեդալ նվաճել 51 կգ Դավիթ Սաֆարյանը, 92 կգ քաշային Դավիթ Սիմոնյանը և գերծանր 92+քաշային Միսակ Տեպանյանը ։Իսկ բրոնզե մեդալի են արժանացել Էրիկ Առստամյանը /Արցախցի /և Լուսյա Ավետիսյանը։
Iravunk. com-ի մարզական թղթակցին հաջողվեց կապ հաստատել ու բացառիկ զրույց ունենալ Բռնցքամարտի Երիտասարդների Եվրոպայի չեմպիոն, այս առաջնությունում արծաթե մեդալ նվաճած ԴԱՎԻԹ ՍԻՄՈՆՅԱՆԻ հետ։ Նա այսպես մեկնաբանեց.
- Հանդես եկա 92 կգ քաշային կարգում։ Ընդհանուր երեք մենամարտ ունեցա։ Մեկնարկային մենամարտի ժամանակ 4-1 հաշվով հաղթեցի Իտալիայի ներկայացուցչին, որը բավականին փորձառու, ուժեղ հակառակորդ էր։ Երկրորդ մենամարտում մրցակիցս ազգությամբ ուկրաինացի էր, նրան էլ հաղթեցի բացարձակ առավելությամբ 5-0 հաշվով։ Իսկ ահա եզրափակչում մենամարտեցի Անգլիայի ներկայացուցչի հետ, ոսկե մեդալին շատ մոտ էի, ափսոս, հաղթանակը տվեցին մրցակցիս, կարող էին և ինձ տալ, քանի որ մրցավարները որոշ չափով անարդար վերաբերվեցին, բացահայտ երևում էր, որ ես եմ հաղթել։
- Շնորհակալություն, Դավիթ, մեզ ժամանակ տրամադրելու համար։
- Ես էլ եմ շնորհակալ, անխափան գործունեություն Ձեր թերթին։
Պատրաստեց ՀՈՎՀԱՆՆԵՍ ՍԱՐԳՍՅԱՆԸ