Արծվանիստի միջնակարգ դպրոցի ՆԶՊ դասասենյակն անվանակոչվեց Խորեն Հարությունյանի անունով

Գեղարքունիքի մարզի Արծվանիստի միջնակարգ դպրոցի նախնական զինվորական պատրաստության դասասենյակն անվանակոչվեց նույն դպրոցի շրջանավարտ, 2016 թվականի Ապրիլյան հերոսամարտերի մասնակից, մարտական դիրքում դժբախտ պատահարի հետեւանքով զոհված ԽՈՐԵՆ ԴԵՐԵՆԻԿԻ ՀԱՐՈՒԹՅՈՒՆՅԱՆԻ անունը:

«Ավելի քան մեկ շաբաթ է Ջավախքի Ախալցխա քաղաքի հայկական դպրոցի շուրջ կրքերը չեն հանդարտվում»

Դասասենյակի անվանակոչության արարողությանը մասնակցեցին Գեղարքունիքի մարզպետարանի աշխատակազմի կրթության, մշակույթի եւ սպորտի վարչության պետ Գարիկ Բադալյանը, Խորեն Հարությունյանի հարազատները, Արծվանիստի համայնքապետարանի ներկայացուցիչներ, մանկավարժներ եւ աշակերտներ: Բացման խոսքում դպրոցի Տնօրեն ԹՈՌՆԻԿ ՍԱՀԱԿՅԱՆԸ  նշեց, որ Խորեն Հարությունյանը Ապրիլյան քառօրյա մարտերին մասնակցել է Թալիշի պաշտպանական դիրքերում, աչքի ընկել խիզախությամբ, նպաստել հակառակորդի ջախջախմանը, անգամ մարտից դուրս եկել առանց վիրավորվելու: Սակայն մարտական դիրքում Խորենը զոհվել է 2016 թվականի հունիսի 2-ին, դժբախտ պատահարի հետեւանքով.«Խորեն Հարությունյանը հետմահու ՀՀ Նախագահ Սերժ Սարգսյանի եւ Արցախի Հանրապետության նախագահ Բակո Սահակյանի կողմից արժանացել է «Մարտական ծառայության համար» մեդալների: Նա ուսման տարիներին եւս աչքի էր ընկնում առաջադիմությամբ, աշխատասիրությամբ ու հայրենասիրությամբ:Կարծում եմ` նրա անունն արժանիորեն է կրում մեր դպրոցի նախնական զինվորական պատրաստության դասասենյակը, քանի որ մեր սերունդները Խորենից եւ մեր հայրենասեր մյուս տղաներից շատ դասեր ունեն քաղելու»,-նշեց դպրոցի տնօրենը:

Այնուհետ Խորեն Հարությունյանի դպրոցական եւ զինվորական կյանքի անցած ուղին ներկայացրին Արծվանիստի միջնակարգ դպրոցի աշակերտները՝ այն համեմելով հայրենասիրական բանաստեղծություններով ու թեւավոր խոսքերով.«Այս միջոցառումը սոսկ անվանակոչության նպատակով հրավիրված միջոցառում չէր: Այն նաեւ ռազմահայրենասիրական բաց դաս էր մի երիտասարդի մասին, ով մասնակցեց Ապրիլյան քառօրյա հերոսամարտին եւ քաջաբար պաշտպանեց հայրենի հողը: Սա ոչ միայն Խորենի ընտանիքի վիշտն է, այլ բոլորիս համազգային ցավը, ինչը մեր ներկա ու ապագա զինվորներին, սերունդներին պարտավորեցնում է՝ անմար պահել Խորենի եւ մյուս մարտչնող տղաների անունն ու գործը»,-իր խոսքում նշեց Գեղարքունիքի մարզպետարանի աշխատակազմի կրթության, մշակույթի եւ սպորտի վարչության պետ ԳԱՐԻԿ ԲԱԴԱԼՅԱՆԸ: Դասասենյակի բացման պատիվը տրվեց Խորեն Հարությունյանի եղբորը՝ Հարություն Հարությունյանին: Օրհնության կարգ կատարեց Գեղարքունյքց թեմի Վանեվանի հոգեւոր հովիվ Տեր Տիրատուր քահանան.«Արդեն մեկ տարի է, ինչ չկա իմ սիրելի զավակը, բայց ամեն ակնթարթ ես նրան զգում եմ իմ կողքին: Հիմա, երբ մեր դպրոցի դասասենյակն անվանակոչվեց զավակիս անունով, նրա շունչն ավելի ուժեղ եմ զգում, փոքր-ինչ սփոփվում եմ, որ Խորենիս անունը կապրի հավերժության մեջ: Ես իմ խորունկ ցավի հետ նաեւ հպարտանում եմ, որ նման առյուծ որդի եմ ծնել, սնել ու դաստիարակել: Թող այլեւս ոչ մի մայր նման վիշտ չտեսնի, թող Հայոց աշխարհի վրա թագավորի խաղաղությունը»,-ամփոփիչ խոսքում նշեց Խորեն Հարությունյանի մայրը՝ Արծվանիստի միջնակարգ դպրոցի ուսուցչուհի ԹԱՄԱՐԱ ՔՈԼՈԶՅԱՆԸ:

«Պարտատերը տարել է իրենց տուն». Ուշագրավ մանրամասներ պարտքի դիմաց պատանդ վերցված երեխայի մասին