ԿԱՐՃ ԼՈՒՐԵՐ

«ՎԱՃԱՌՈՂԻ «ԱԶՆԻՎ ԽՈՍՔՈՎ» ՄԻ ԱՌԱՋՆՈՐԴՎԵՔ»

26.01.2018 21:50 ՍՊԱՌՈՂԻ ԱՆԿՅՈՒՆ
«ՎԱՃԱՌՈՂԻ «ԱԶՆԻՎ ԽՈՍՔՈՎ»  ՄԻ ԱՌԱՋՆՈՐԴՎԵՔ»

Ամանորն ավարտվել է, սակայն մինչ օրս սպառողները շարունակում են բողոքել՝ տոնական օրերին Հայաստանի սպառողական շուկայում գրանցված խախտումներից, որոնք հիմնականում կապված են եղել ժամկետանց ապրանքների, կրկնապիտակի հետ: Օգտվելով խառնաշփոթ վիճակից` երբ սպառողները տոնական օրերին «ինքնամոռաց» գնումներ էին կատարում եւ այդքան էլ ուշադրություն չէին դարձնում մակնշմանը, որոշ տնտեսվարողներ հին ու նոր ապրանքն իրար են խառնել ու վաճառել:

Այսպես, օրերս «Իրավունքի» խմբագրություն էր դիմել Սոնա Հակոբյանը՝ տեղեկացնելով, որ Ամանորի նախօրեին մտել է Ավան-Առինջում գտնվող «Նոր Զովք» սուպերմարկետ գնումների եւ... «Դեկտեմբերի 30-ին գնացի գնումների ու պանրի բաժնում նկատեցի, որ պանրի վրա կա կրկնապիտակ: Աշխատակցուհուն կանչեցի ու ասացի, որ սա խախտում է, նա էլ սկսեց ինձ բացատրել, թե պիտակներից մեկը կոդ է, որով ապրանքն անցկացնում են դրամարկղում: Սուպերմարկետի աշխատակիցը երեւի կարծեց, թե օրենքներից տեղյակ չեմ, եւ ամեն ինչ այդպես կանցնի, կգնա: Մի կրկնապիտակը հանեցի պանրի վրայից, պարզվեց` այնտեղ երեք մակնշում կա, երեքն էլ՝ տարբեր»,- պատմեց Ս. Հակոբյանը:

Դեպքից անմիջապես հետո, ինչպես պատմեց Սոնան, դիմել է ՀՀ ԳՆ Սննդամթերքի անվտանգության պետական ծառայությանը` ՍԱՊԾ, որը սկսել է ուսումնասիրել գործը, եւ վաճառքից հանվել է տվյալ պանրի խմբաքանակը: Բայց ամեն ինչ այսքանով չի ավարտվել: Դեկտեմբերի 31-ի գիշերը Սոնան կրկին մտել է սուպերմարկետ... «Ի զարմանս ինձ, նույն պանիրը նույն կրկնապիտակով կրկին դրված էր վաճառքում: Բացի այդ, տեսա, որ լավաշի վրա չկա մակնշում, աշխատակցուհուն ասացի, որ կրկին խախտում են օրենքը: Նա էլ ինձ համոզում էր, թե լավաշը թարմ է, մակնշումն այդքան էլ էական չէ: Իհարկե, կրկին զանգահարեցի ՍԱՊԾ, եւ այս անգամ եւս ծառայության աշխատակիցները սկսեցին ուսումնասիրություն»,- պատմեց մեր զրուցակիցը եւ փաստեց, որ սուպերմարկետից ստիպված է օգտվում, քանի որ տարածքում, որտեղ ինքն է բնակվում, այլ խանութներ գրեթե չկան:

Սոնան սպառողներին հորդորում է ինքնամոռաց չդատարկեն խանութները, ստուգեն մակնշումները եւ եթե ժամկետանց սննդամթերք նկատեն` չգնեն. «Ուշադիր եղեք, հնարավոր է՝ արտադրողի եւ խանութի ժամկետները չհամապատասխանեն իրար, կամ կրկնապիտակներով լինեն: Իսկ եթե մակնշումը բացակայում է, ընդհանրապես մի գնեք: Վաճառողի «ազնիվ խոսքով» մի առաջնորդվեք»:

«Իրավունքը» փորձեց պարզաբանման համար կապ հաստատել նաեւ սուպերմարկետի պատասխանատուների հետ: Ավան-Առինջում գտնվող «Զովք» սուպերմարկետից մեզ հետ զրույցում անձը, որը այդպես էլ չներկայացավ, նշեց, թե տեղյակ չէ՝ ինչի մասին է խոսքը. «Նույն հեռախոսահամարով զանգահարեք, ձեզ հետ վերեւից կխոսեն»: Փորձեցինք զանգահարել կրկին նույն համարով, սակայն «վերեւներից» մեր զանգերին պատասխանող չեղավ:

Իսկ Սոնա Հակոբյանը նաեւ տեղեկացրեց, որ դեպքից հետո հաճախ է մտնում սուպերմարկետ, նույնիսկ այն ժամանակ, երբ գնումների նպատակ չունի, որպեսզի հասկանա, թե տնտեսվարողը շարունակում է խախտել օրենքը, թե` ոչ. «Քանի որ այս շրջանում վերահսկողություն կա, որեւէ խախտում դեռ չկա: Այլ հարց է, թե ինչ կլինի, եթե վերահսկողությունը չլինի»:

ԶՎԱՐԹ ԽԱՉԱՏՐՅԱՆ

 

КОМСОМОЛЬСКАЯ ПРАВДА