Բնության կողմից շնորհված տաղանդը կկորչի, եթե չլինի աշխատասիրությունը. երաժիշտ

Դեռ շատ փոքր տարիքում Էդգար Հայրապետյանը «դատապարտված» էր լսել ժողովրդական ֆոլկ երաժշտություն, քանի որ մեծանում էր տաղանդավոր երաժշտի  ընտանիքում: Հայրը նկատել էր նրա ընդունակություններն ու սերը դեպի արվեստը, այդ պատճառով արդեն դպրոցական Էդգարը գրեթե բոլոր առիթների ու միջոցառումների ժամանակ հայրկի կողքին էր ստեղնաշարային գործիքի մոտ: Հայաստանյան հայտնի երաժիշտները ուրախությամբ էին ընդունում իրենց փոքրիկ գործընկերոջ ներկայությունը ու դեմ չէին, որ յոթնամյա Էդգարը նվագեր իրենց հետ: Մանուկ տարիքից թերևս որոշված էր նա արդեն ընտրել էր իր մասնագիտությունը: Բնավորությամբ համեստ, մի քիչ ամաչկոտ Էդգար Հայրապետյանին հանդիպեցինք Դուբայ մեկնելուց առաջ, որտեղ պետք է նվագախմբով հանդես գային մեծ համերգով:

-Եթե վերադառնանք մանկություն, երաժշտական,  ո՞ր գործիքը կընտրեիք նորից  սովորելու համար:

- Նվագում եմ նաև հարվածային գործիքներ, սակայն, եթե նորից ընտրեի, ապա   կրկին այն կլիներ էլեկտրոնային ստեղնաշարային գործիքը:

- Քանի՞ տարեկան էիք, երբ հասկացաք, որ երաժիշտ լինելը Ձեր կոչումն է, ապրելաձևը:

- 13 տարեկան էի, որ առաջին անգամ նվագախմբի հետ պաշտոնապես նվագախմբում նվագեցի` ի դեպ, ամենափոքրը ես էի: 

- Ձեզ տեսնո՞ւմ եք երաժշտություն դասավանդող ուսուցչի դերում, կան մարդիկ, որ դիմում են Ձեզ մասնավոր դասերի համար:

- Սիրում եմ շփվել, աշխատել երիտասարդների հետ: Երևանում շատերի ծնողները դիմում են, որպեսզի իրենց երեխաները գան մեր ստուդիա, մասնավոր երաժշտական դասեր ստանալու, ցավոք տարբեր երգիչների հետ համերգային շրջագայությունների պատճառով չեմ հասցնում մասնագիտական դասեր անցկացնել երեխաների հետ, որոնց մեջ բնատուր շատ տաղանդավորները կան:

- Դուք  նաև պրոդյուսերական ընկերություն ունեք, հիմնականում ի՞նչ  գործունեություն եք իրականացնում:

- Արդեն երեք տարուց ավելի է գործում մեր պրոդյուսերական կենտրոնը, որը աշխատում է այն երիտասարդ երգիչների հետ, որոնք իրենց երաժշտական ճանապարհի սկիզբը վստահում են մեզ: Արդեն իսկ մեծ հաջողություն ունեցող երգիչներ՝ Արայիկ Ավետիսյանը, Արման Մեսրոպյանը, երգչուհիներ` Ամալյա Մարգարյանը, Անգել Բարսեղյանը, նրանք այն մարդիկ են, որոնց հետ աշխատել եմ որպես պրոդյուսեր: Ավելացնեմ նաև, որ վերջինների դեպքում «Դեպի Եվրատեսիլ 2020» երաժշտական մրցույթին իբրև հայաստանյան մասնակիցների թեկնածուներ նրանք հանդես եկան և կատարում էին այնպիսի գործեր, որոնց երաժշտական գործիքավորումը վստահվել էր Էդգար Հայրապետյան պրոդյուսերական կենտրոնին:

-  Նաև երաժշտական գործիքավորում եք անում, նշեք այն վերջին հիթը, որի երաժշտական ձևավորումը Ձերն էր: 

- Խոշոր երաժշտական հիթեր ունեցել է Արայիկ Ավետիսյանը՝ «Սիրո ծովում», «Իմ նվեր» և այլն:

- Ներկայիս երիտասարդության հետ հե՞շտ է աշխատել:

- Հաճույքով նշեմ, որ այո, հեշտ է աշխատել: Լավ երաժշտական ճաշակ ունեն, թե՛ ազգային հայկական ֆոլկի, թե՛ արտասահմանյան հայտնի գործերի առումով: Նրանք հետևում են համաշխարհային հայտնիություն ունեցող մեգաաստղերին ու փորձում են վերցնել այն դրականը, որը և իրենց կապահովի առաջընթաց:

- Ի՞նչ  առավելություն ունեն նրանք:

- Ի տարբերություն մեզ, որ մի փոքր մեծ ենք իրենցից, ասեմ, որ ավելի համարձակ են, առանց բարդույթների, հստակ ասում են այն ինչ մտածում են: Ինչպես նաև լավ տիրապետում են տեխնիկային ու տեղեկատվական տեխնալոգիաներին, սոցիալական ցանցերից գրագետ օգտվում են, որը միայն օգուտ է բերում ավելի շատ ճանաչում ունենալ ու կարճ ժամանակում հանրային դառնալ:

- Հայտնի երաժիշտ դառնալու ճանապարհին տաղանդ, աշխատասիրություն, թե՞  փող է պետք:

- Առաջնահերթ բնության կողմից շնորհված տաղանդն է կարևոր, սակայն այն կկորչի, եթե չլինի աշխատասիրությունը: Չբացառենք նաև ֆինանսի առկայության մասին, ընդունենք, որ գումար է անհրաժեշտ ձայնագրություններ անելու, համերգներով ներկայանալու համար:

- Ի՞նչ  աշխատանքային ծրագրեր ունեք առաջիկայում:

- ՀՀ վաստակավոր արտիստներ Հարութ Փամբուկչյանի ու Արմենչիկի հետ  համերգային շրջագայություններ ունենք ՌԴ-ի քաղաքներ, որը կսկսվի մայիսի 25-ից:  Այնուհետև հուլիսի 3-ին Կ. Դեմիրճյանի անվան մարզահամերգային համալիրում   կկայանա մենահամերգ` ՀՀ վաստակավոր արտիստ Հարութ Փամբուկչյանի 70-ամյակին նվիրված, որտեղ մեր երաժշտական բենդը պետք է ապահովվի կենդանի  նվագակցություն:

ԼԻԼԻԹ ԵՂԻԱԶԱՐՅԱՆ