Սեպտեմբերի 15-ին հազարավոր հարցեր են առաջանալու, որոնց լուծման համար էլի ժամանակ ենք կորցնելու, ինչից կրթությունն է տուժելու. փորձագետ

Pastinfo.am-ը գրում է․

Կրթության որակն այս պայմաններում այն չի լինի, ինչին ձգտում ենք, այն բնականաբար կտուժի, բայց սա ավելի լավ է, քան հեռավար ուսուցումը, որն իրենց չարդարացրեց։ «Փաստինֆո»-ի հետ զրույցում այս կարծիքն արտահայտեց կրթության փորձագետ, Գիտությունների ազգային ակադեմիայի գիտակրթական միջազգային կենտրոնի գիտական քարտուղար Ատոմ Մխիթարյանը։

Փորձագետին հետարքրքրում է այն հարցը, թե ինչու են դասերը սկսվելու սեպտեմբերի 15-ից, այլ ոչ թե սեպտեմբերի 1-ից։ Ըստ նրա՝ այստեղ որևէ իմաստ, տրամաբանություն չկա. «Ավելին` դեռ գարնանը խոսակցություններ կային, որ կարելի է ոչ թե սեպտեմբերի 1-ին սկսել, այլ նույնիսկ մեկ-երկու շաբաթ ավելի շուտ։ Դա պայմանավորված էր նրանով, որ վերհանվեին այն խնդիրները, որ կարող էին առաջանալ դպրոցներում, մասնավորապես հակահամաճարակային կանոնների պահպանման հետ կապված և այդ մեկ-երկու շաբաթվա ընթացքում այդ խնդիրները հարթվեին, որից հետո միայն նորմալ դասապրոցեսը սկսվեր»,-ասաց Ատոմ Մխիթարյանը՝ նկատելով, որ ԿԳՄՍ նախարարությունը դեռ հունիսին պետք է սկսեր ուղեցույցի մշակման և նախապատրաստական այդ աշխատանքները։ Փորձագետի խոսքով այդ փորձաշրջանը շատ լավ առիթ կլիներ, որ հնարավոր բարդությունները, խնդիրները լուծվեին, իսկ այսպես ևս մեկ ամիս ենք կորցնում։

«Բացի այդ բոլորի մոտ հարց է առաջանում, թե ինչ կլինի եթե այդ պայմանները կամ պահանջները չբավարարեն, օրինակ փոքրիկ խախտումներ լինեն, ի՞նչ է դրան հետևելու։ Իսկ եթե դպրոցն առանց այդ էլ ծանրաբեռնված էր և երկու հերթով էր գործում, այդ դպրոցներն ի՞նչ պետք է անեն։ Նմանատիպ հարցեր են առաջանում և լավ կլինի, որ բոլոր հարցերը բարձրացվեին նախապատրաստական շրջանում և այդ հարցերի պատասխանները համատեղ ուժերով լուծումներ գտնեին, որից հետո նոր դասապրոցեսը նորմալ սկսեին։ Իհարկե բարդություններ կլինեն, բայց այնպես չէ, որ դրանք անհաղթահարելի են։ Պարզապես պետք է հնարավորինս շուտ սկսել, որպեսզի ուսուցման պրոցեսը դրանից չտուժի։ Սեպտեմբերի 15-ին առաջանալու են հազարավոր հարցեր, որոնց լուծման համար մենք էլի ժամանակ ենք կորցնելու և դրանից տուժելու է կրության որակը»,-ասաց Ատոմ Մխիթարյանը։

Տեսեք սեպտեմբերի 15-ին ինչ է լինելու։ Առաջանալու են հազարավոր հարցեր, որոնց լուծման համար մենք էլի ժամանակ ենք կորցնելու և դրանից տուժելու է կրթությունը և կրթության որակը։

Ինչ վերաբերում է աշակերտների ադապտացմանն այս փոփոխություններին, այդ թվում դիմակներ կրելուն, փորձագետը նշեց, որ արդեն բազմաթից դժգոհությունների է հանդիպել։ Ատոմ Մխիթարյանի խոսքով նույնիսկ ծնողներ կան, որոնք բացեիբաց հայտարարում են, որ իրենք այդ պայմաններով չեն պատրաստվում երեխաներին դպրոց ուղարկել. «Ծնողներին իմ հորդոն այն է, որ ավելի լավ է երեխաներն այդ պայմաններով դպրոց գնան, քան տանը նստած ոչինչ չանեն և կրթությունը դրանից տուժի։ Հասարակությունը հիմա պետք է համախմբվի և համատեղ ուժերով փորձենք հաղթահարել։ Ամեն դեպքում դա չպետք է անել կրթության հաշվին»,-նշեց Ատոմ Մխիթարյանը։

Վերջինս հավելեց, որ ավելանալու է նաև ուսուցիչների ծանրաբեռնվածությունը, քանի որ ուսումնական պրոցեսը վեցօրյա է լինելու, ինչպես նաև լինելու են դասարաններ, որոնք կիսվելու են, ինչը նշանակում է՝ կան ուսուցիչներ, որոնց ծանրաբեռնվածությունը կրկնակի ավելանալու է, հետևաբար նրանց վարձատրության հարցը պետք է վերանայվի։

Հիշեցնենք, որ կորոնավիրուսային համավարակով պայմանավորված հանրակրթական ուսումնական հաստատություններում սահմանվում է հատուկ ուսումնական գործընթաց։ ԿԳՄՍ նախարարությունը մշակել է ուղեցույց, որից տեղեկանում ենք, որ դպրոցները պետք է ապահովված լինեն անհրաժեշտ պարագաներով, դպրոցներում սահմանվելու է 6-օրյա աշխատանքային ռեժիմ, աշակերտին արգելվում է գրատախտակի մոտ կանչել, ինչպես նաև դասամիջոցների ընթացքում դասաենյակները լքել։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝