ԻՄ ՀԱՂԹԱՆԱԿՈՎ ԱՊԱՀՈՎԵԼՈՒ ԵՄ ԱԲՈՎՅԱՆԻ ԿԱՅՈՒՆ ԶԱՐԳԱՑՈՒՄԸ
Արխիվ 12-16ԻՄ ՀԱՂԹԱՆԱԿՈՎ ԱՊԱՀՈՎԵԼՈՒ ԵՄ ԱԲՈՎՅԱՆԻ ԿԱՅՈՒՆ ԶԱՐԳԱՑՈՒՄԸ
Հարցազրույց Աբովյանի քաղաքապետի թեկնածու ՎԱՀԱԳՆ ԳԵՎՈՐԳՅԱՆԻ հետ-Պրն Գեւորգյան, այսօրվանից սկսվում է քարոզարշավը, ինչպե՞ս եք գնահատում Ձեր հնարավորությունները:
- Իմ հնարավորությունները ես գնահատում եմ շատ բարձր: Այդ վստահությունն ինձ տալիս է իմ թիմը, համախոհներիս մեծ բանակը, աբովյանցիների այն ստվար հատվածը, ովքեր լավ են հասկանում, որ մեր քաղաքի խնդիրները հնարավոր է լուծել միայն հետեւողական ու տքնաջան աշխատանքի շնորհիվ, առանց հեղափոխական ցնցումների, առանց ամբոխահաճության ու անձնական ամբիցիաների: Ես ընտրել եմ առաջին ճանապարհը ու վստահ եմ, որ մեր քաղաքի բնակիչներն էլ, լսելով բոլոր թեկնածուներին, ծանոթանալով նրանց ծրագրերին ու գաղափարներին, կմիանան մեզ` Աբովյանն ավելի բարեկեցիկ, ապրելու ու աշխատելու համար ավելի հարմարավետ դարձնելու համար:
- Այս ընտրություններում Աբովյանի համար աննախադեպ մեծ թվով թեկնածուներ են հայտ ներկայացրել: Ինչո՞վ է դա պայմանավորված, ո՞ւմ եք համարում Ձեր հիմնական մրցակիցը:
- Այո, Դուք շատ ճիշտ նկատեցիք, որ այս ընտրություններում բավականին մեծ թվով թեկնածուներ են մասնակցում նախընտրական մրցավազքին: Այդ փաստը կարելի է միայն ողջունել, քանի որ աբովյանցին այս դեպքում ունի ընտրության լայն հնարավորություն, իսկ թեկնածուների բազմազանությունն ապահովում է ընտրությունների մրցակցային բնույթը: Բացի այդ, երբ բոլոր հավակնորդները մրցասպարեզում են, հաղթանակն ավելի մեծ արժեք ունի: Առաջադրված բոլոր թեկնածուներին էլ ճանաչում եմ, հարգում եմ առաջադրվելու նրանց սահմանադրական իրավունքը: Եթե մարդիկ որոշել են առաջադրվել որպես թեկնածու, ուրեմն ինչ որ բանի հույս ունեն, այնպես որ, բոլորն էլ մրցակիցներ են, բոլորին էլ մաղթում եմ քաղաքակիրթ պայքար ու արդար մրցակցություն:
- Ձեր անձի շուրջ հետաքրքիր զարգացումներ տեղի ունեցան: Հայաստանում դեռ չեմ հիշում դեպք, որ տեղական ընտրություններում որեւէ մեկին այդքան քաղաքական ուժեր ու հայտնի մարդիկ սատարեին: Կարծես դարձել եք "համազգային կոնսոլիդացիայի" կերպար: Ինչպե՞ս եք վերաբերվում այդ հանգամանքին:
- Նախեւառաջ շնորհակալ եմ բոլոր այն մարդկանցից, անհատներից, քաղաքական ուժերից, ովքեր ինձ աջակցելու կամ սատարելու հայտարարությամբ են հանդես եկել: Այդ հանգամանքն ինձ ավելի է պարտավորեցնում, ավելի է մեծացնում պատասխանատվությունը: Ես լավ եմ գիտակցում, որ այդ դեպքում այլընտրանք չունեմ. ես չեմ կարող հուսախաբ անել իմ թիմակիցներին, չարաշահել հասարակության մեջ հայտնի մարդկանց եւ կառույցների վստահությունը: Սա նշանակում է, որ իմ գործունեությունը լինելու է տեսանելի բոլորի համար: Ես նախընտրում եմ բաց, թափանցիկ եւ հրապարակային աշխատանքը: Քաղաքապետարանի դռները բաց են լինելու բոլորի համար:
- Նաեւ շատ են խոսում, որ Ձեր օգտին կիրառվում են վարչական լծակներ, քարոզարշավը վարում եք խախտումներով եւ այլն:
- Այդպիսի լուրեր տարածողները, մեծ հաշվով, կամ լավ չգիտեն ընտրական օրենսդրությունը, կամ էլ ուղղակի զբաղվում են "սեւ" քարոզչությամբ: Այնուամենայնիվ, ես հակված եմ առաջին տարբերակին, որ շատ դեպքերում, լավ ծանոթ չլինելով ընտրական օրենսդրությանը` նմանատիպ մեղադրանքներ են հնչեցվում: Օրինակ` ընտրական օրենսդրությունը թույլ է տալիս, ընտրությունները նշանակվելուց հետո, թեկնածուներին բացել նախընտրական շտաբներ: Երբ ես օգտվեցի այդ իրավունքից, մամուլում լուրեր տարածվեցին, իբր թե ես ժամկետից շուտ քարոզչական պաստառներ եմ փակցրել: Մինչդեռ դրանք ընդամենը իմ նախընտրական շտաբներն էին: Նույնը վերաբերում է նախընտրական հանդիպումներին: Այդպիսի հանդիպումներ տարբեր մարդկանց, կոլեկտիվների հետ ես ունեցել եմ մինչեւ իմ առաջադրվելը եւ մինչ պաշտոնապես թեկնածուի կարգավիճակ ստանալը: Այնպես որ, այս հարցերում մենք խստորեն հետեւում ենք օրենքի տառին: Ինձ խախտումներով ընտրություններ պետք չեն: Ես դրա կարիքը չունեմ, ինչպես չունեմ վարչական լծակների օգնությամբ քվեների ապահովման խնդիր: Աբովյանցին լավ գիտի, ինչի համար է գնալու ընտրության եւ ամենակարեւորը` ում է ընտրելու:
- Ինչպե՞ս եք գնահատում Աբովյանի նախորդ քաղաքապենտերի աշխատանքը:
Իմ սկզբունքների մեջ չի մտնում որեւէ անձի քննադատելը, կամ նախորդների աշխատանքը փնովելով` վարկանիշ հավաքելը: Ես կարող եմ նշել, որ մեր քաղաքի բոլոր ղեկավարներն էլ իրեց կառավարման ժամանակաշրջանում թողել են ուրույն ձեռագիր, կատարել են քաղաքի համար տեսանելի աշխատանքներ: Ես իմ պարտքն եմ համարում շարունակել բոլոր լավ ավանդույթները, որոնք ձեւավորվել են մեր քաղաքում` այս տարիների ընթացքում, հետեւողական աշխատանքով ու քար-քարի վրա դնելով` շենացնել մեր քաղաքը, մեր համայնքը, մեր երկիրը:
- Ընտրությունների ժամանակ բոլոր թեկնածուներն էլ իրար գրեթե կրկնում են, ճոխ-ճոխ խոստումներ են տալիս: Ինչո՞վ եք դուք առանձնանում:
- Դե, նախընտրական խոստումները քարոզարշավի անբաժանելի մասն են: Կան թեկնածուներ, ովքեր չեղած պաշտոններ են բաժանում, կան թեկնածուներ, ովքեր հանդես են գալիս "փրկչի" կերպարով, մեկ ուրիշները աջուձախ քննադատելով` փորձում են ընդդիմադիր ընտրազանգվածի համակրանքը շահել: Ես հանդես եմ գալիս Աբովյանի զարգացման իմ տեսլականով, որի հիմքում ընկած է քաղաքի շարունակական զարգացման հայեցակարգը: Աբովյանում այս տարիներին տեսանելի աշխատանքներ են կատարվել տարբեր ոլորտներում, սակայն դա չի նշանակում, որ քաղաքում խնդիրներ չկան: Դրանք առկա են ու դրանց լուծման լավագույն գրավականը ես տեսնում եմ մարզային իշխանության, կենտրոնական կառավարության ու միջազգային ոչ կառավարական կազմակերպությունների հետ ակտիվ համագործակցության մեջ: Իմ ընտրվելու դեպքում այս երեք օղակների հետ աշխատանքը կլինի առավել արդյունավետ, ու աբովյանցիները դա կտեսնեն քաղաքի բյուջեի, կառավարության կողմից քաղաքում իրականացվող նպատակային ծրագրերի ավելացման եւ այլնի տեսքով: Իմ խորին համոզմամբ, Աբովյանը հնարավոր է դարձնել Հայաստանի ամենօրինակելի համայնքը, իսկ դրա համար հարկավոր է հետեւողական ու տքնաջան աշխատանք, միասնական ջանքերի մեկտեղում, համերաշխության ու հանդուրժողականության մթնոլորտ: Ինձ համար Աբովյանում յուրայիններ եւ օտարներ չկան, բոլորս էլ մեկ ընտանիք ենք... Այնպես որ, մարդկային ջերմ հարաբերություններ, փոխադարձ հարգանք եւ հանդուրժողականություն` սրանք են լինելու քաղաքապետարանի գործունեության հիմնական սկզբունքները:
- Եվ վերջում` Ձեր կանխատեսումները:
– Ընդհանրապես ասում են, որ կանխատեսումներ անելն անշնորհակալ գործ է, բայց ես համոզված եմ` ամեն ինչ լավ է լինելու, ու մենք միասին ենք նշելու աբովյանցիների հաղթանակը:
Ա. ՀԱԿՈԲՅԱՆ
Հավանեցի՞ր հոդվածը, կիսվիր ընկերներիդ հետ
