«ՀԱՅՖԻԼՄԸ» ՀԵՏ ՎԵՐՑՆԵԼՈՒ ՄԱՍԻՆ ԳՈՐԾԸՆԹԱՑ Է ԳՆՈՒՄ
Արխիվ 12-16«ՀԱՅՖԻԼՄԸ» ՀԵՏ ՎԵՐՑՆԵԼՈՒ ՄԱՍԻՆ
ԳՈՐԾԸՆԹԱՑ Է ԳՆՈՒՄ
Կինոյի մասին օրենքը վերջին շրջանում ամենաքննարկվող թեման է` համենայնդեպս կինոյի ոլորտի ներկայացուցիչների կողմից: Ավելին, նույնիսկ պտտվում են խոսակցություններ, թե պետական չինովնիկներով հավաքվել ու որոշել են կինոյի մասին օրենք գրել: ՀՀ մշակույթի փոխնախարար ԱՐԹՈՒՐ ՊՈՂՈՍՅԱՆԸ կայացած ճեպազրույցում անդրադառնալով այդ խոսակցություններին` ասաց. «Եթե այդպես նայենք, ուրեմն այդտեղ պետական չինովնիկ ես եմ եւ Ազգային կինոկենտրոնի տնօրենը, մնացած բոլորը կինոարտադրողներ, պրոդյուսերներ, կինոգործիչների միության, ոլորտի ներկայացուցիչներ են: Ստեղծված հանձնաժողովը արդեն մշակել է կինոյի մասին եւ հարակից օրենքների նախագիծ, որը հիմա գտնվում է փորձաքննության փուլում:
4 հանձնաժողովների նիստ ենք իրականացրել, այդ հանձնաժողովում մեր հասարակական կազմակերպությունների կինոյի ոլորտի բոլոր ներկայացուցիչներն են»,- տեղեկացրեց փոխնախարարն ու հստակեցրեց, որ կինոյի մասին օրենքի նպատակը կինոյի ոլորտում կանոնակարգումներ եւ կինոարտադրության համար նպաստավոր պայմաններ ստեղծելն է:
ՆՈՐ ԿԻՆՈԹԱՏՐՈՆՆԵՐ ԿԱՌՈՒՑԵԼՈՒ ՀՆԱՐԱՎՈՐՈՒԹՅՈՒՆՆԵՐ ՉՈՒՆԵՆՔ
Իսկ թե հեռանկարում երեւանյան կինոթատրոնների վերականգնելու հույս կա, «Իրավունքի» հետաքրքրության ի պատասխան` Ա. Պողոսյանն ասաց, որ այս պահին դրանք պետությունը վերականգնելու միջոցներ, նույնիսկ նոր կինոթատրոններ կառուցելու հնարավորություններ էլ չունի.
- Եղածն արդեն սեփականաշնորհված է, ցավոք, ժամանակին` 20 տարի առաջ պիտի այդ ամենը չանեին: Հիմա, եթե ձեզ ասեմ, թե պետությունը հնարավորություն ունի նոր կինոդահլիճներ կառուցելու, ռեալ չի լինի: Մենք պիտի եղածը կարողանանք օգտագործել ու պահպանել:
- Իսկ «Մոսկվա» կինոթատրոնի ամառային դահլիճը դեռ հնարավորություն կա՞ վերանորոգելու, թե՞ արդեն վթարային վիճակ է:
- Հնարավոր է, նախ այդ ամառային դահլիճը մշակութային հուշարձան է, եւ այնտեղ փոփոխություններ կատարելը լուրջ խնդիրների հետ է կապված: Իսկ երկրորդ կարեւոր խնդիրը ներդրողն է, ո՞վ պիտի լինի: Եթե «Պարադիզ» ընկերությունը վերցնի եւ որպես բացօթյա դահլիճ ներդրումներ անի, մենք միայն կողմ կլինենք, բայց կինոարտադրությունը, կինոպրակատը պետք է այնքան աշխույժ լինեն, որ իրենք մտածեն, թե այ, այս դահլիճն էլ բացենք օգտագործենք:
ԿԻՆՈՅԻ ԺԱՌԱՆԳՈՒԹՅԱՆ ԹՎԱՅՆԱՑՄԱՆ ԱՌՈՒՄՈՎ ԽՆԴԻՐՆԵՐ ՈՒՆԵՆՔ
-Իսկ ի՞նչ փուլում է գտնվում «Հայֆիլմ» կինոստուդիան վերականգնելու
բանակցությունները:
- Դեռեւս 2005 թվականից է գործարքը կնքվել «Արմենիա սթուդիոս»ՍՊԸ-ի հետ եւ մեր կինոժառանգության պահպանության մասով` պայմանագրով նախատեսված էր, որ «Հայֆիլմը» պետք է 460 ֆիլմեր թվայնացներ: Դա իրենց առջեւ դրված պայմանագրային պարտավորություն էր: Բայց, նախ` 460-ից թվայնացրեցին մոտ 320-ը, եւ թվայնացման որակը մեզ չէր բավարարում` հանձնաժողովը չի ընդունել այդ ֆիլմերի մի մասը: Կինոյի ժառանգության թվայնացման առումով մենք իսկապես խնդիրներ ունենք: Ասեմ նաեւ, որ այս տարի արդեն ընդհանրապես գույքային իրավունքը վերականգնելու ե՛ւ կինոստուդիայի, ե՛ւ կինոժառանգության տիրապետումը հետ վերցնելու մասին գործընթաց է գնում: Ինքներս ենք սկսել մեր կինոժառանգության թվայնացման գործընթացը, այս տարի պետությունն արդեն իր վրա է վերցրել 16 ֆիլմերի թվայնացում, եւ յուրաքանչյուր տարի կփորձենք այդ 460 ֆիլմերից անորակ թվայնացված մոտ 200 ֆիլմերն ինքներս թվայնացնել: Ցավոք, մենք տեխնիկական պայմաններ չունենք, բնօրինակից պետք է թվայնացվի, իսկ դա Ռուսաստանի ֆիլմաֆոնդում է պահպանվում` ըստ միջազգային պայմանագրի, որովհետեւ որպես այդպիսին` պահպանելու համար մենք առայժմ պայմաններ չունենք: Այդ իսկ պատճառով թվայնացումն իրականացվելու է Ռուսաստանի ֆիլմաֆոնդում, մի մասն էլ` Հայաստանում:
ԼԻԼԻԹ ԵՂԻԱԶԱՐՅԱՆ
