Զանզիբարում վեցից ավելի հյուրանոցներ ամբողջությամբ այրվել են Տասը տարի՝ ռուսական արվեստի թանգարանի վերափոխման ճանապարհին Թուրքիան և ԵՄ-ն բանակցություններ են վարում անվիզա ռեժիմի ներդրման վերաբերյալ Գերմանիան հրաժարվել է Լեհաստանով տանկային շարասյուներ տեղաշարժելուց Լավրովը կասկածի տակ դրեց Գերմանիայի և Բրիտանիայի պաշտպանության նախարարների ադեկտվատությունը Զելենսկի. ԱՄՆ-ն Ուկրաինային չի փոխանցում նույնիսկ Եվրոպայի կողմից վճարված Patriot հրթիռները Նեթանյահուն չկարողացավ համոզել ԱՄՆ-ին Վաշինգտոնի վրա Իրանի հարձակման սպառնալիքի մասով 22 տարի՝ անհայտության մեջ․ Վռուբելի գողացված կտավի առեղծվածը Վեճեր, սադրանքի փորձեր եւ վստահության քվե՝ Հայաստանի Նկարիչների միությունում Այսօր կայանալիք ֆուտբոլային հանդիպումները

«ՓՈՂՈՑԱՅԻՆ ԱՌԵՎՏՐՈՒՄ ՆՎԱԶԱԳՈՒՅՆ ՀԻԳԻԵՆԻԿ ՊԱՅՄԱՆՆԵՐԸ ՉԵՆ ՊԱՀՊԱՆՎՈՒՄ»

Արխիվ 12-16

«ՓՈՂՈՑԱՅԻՆ ԱՌԵՎՏՐՈՒՄ ՆՎԱԶԱԳՈՒՅՆ ՀԻԳԻԵՆԻԿ ՊԱՅՄԱՆՆԵՐԸ ՉԵՆ ՊԱՀՊԱՆՎՈՒՄ»

 

Սննդային անվտանգությունը հատկապես ամռան տապին ոչ միայն կարեւոր է, այլ նաեւ` կենսական անհրաժեշտություն: Եվ հաշվի առնելով խնդրի լրջությունը` «Իրավունքն» այս անգամ «Ուղիղ կապ» խորագրի ներքո հյուրընկալել էր ՀՀ ԱՆ առողջապահական պետական տեսչության հիգիենայի բաժնի պետ ՄԱՐԳԱՐԻՏԱ ԲԱԲԱՅԱՆԻՆ:

 

 

«ԽՈՐՀՈՒՐԴ ԵՄ ՏԱԼԻՍ ՈՒՏԵԼՈՒՑ ԱՌԱՋ ՊԱՀԱԾՈՅԻ ՊԱՐՈՒՆԱԿՈՒԹՅՈՒՆԸ ԵՌԱՑՆԵԼ»


- Ժամանակին մարդիկ ծառից միրգ էին քաղում ու ուտում, բայց` ոչինչ: Այսօր նույնիսկ լվացած միրգն է կասկածելի, ու վստահ չենք, որ չենք թունավորվի (ՔՐԻՍՏԻՆԵ ՍԱՐԳՍՅԱՆ, ք. Երեւան):
- Ամենեւին էլ վախենալու կարիք չկա: Օրինակ՝ թթի հետ կապված վերջին դեպքը: Ասեմ, որ իրենք, եթե ծառից ուտեին, հաստատ թունավորում չէր լինի: Մինչդեռ, այդ թութը թափ են տվել ինչ-որ փալասի վրա, թե գետնից են հավաքել, հետո այս շոգին լցրել են բեռնախցիկի մեջ, տարել վաճառքի եւ ինչ-որ ամանով էլ վաճառել են, գնորդն էլ տարել է տուն, միգուցե կեղտոտ ձեռքերով կերել... Տեսեք, թե ծառից մինչեւ գնորդ քանի էտապ է անցել, դրա համար էլ այդպիսի երեւույթ եղավ: Իսկ թութն իրականում շատ անվտանգ է ու օգտակար: Հետեւաբար՝ ավելի լավ է ծառի վրայից ուտել, քան անհայտ ճանապարհով անցած աղտոտված միրգ օգտագործել:
- Որքան էլ հեռուստատեսությամբ ու մամուլով հորդորեք պահածոներ չպատրաստել, միեւնույնն է՝ հայ կանայք շարունակելու են նույն կերպ: Ուզում էի իմանալ` կա՞ այնպիսի մի տեխնոլոգիա, որը կիրառելու դեպքում կկարողանանք խուսափել հնարավոր թունավորումներից (ՏՆԱՅԻՆ ՏՆՏԵՍՈՒՀԻ, ք. Երեւան):
- Եթե Դուք տանն ունեք «ավտոկլավ», որտեղ համապատասխան ճնշում եւ ջերմաստիճան կարող եք ապահովել, ապա այդ ժամանակ հնարավոր բակտերիաները ոչնչանում են: Իսկ չունենալով այդ ամենը, այնուամենայնիվ, պահածոներ եք պատրաստել, խորհուրդ եմ տալիս ուտելուց առաջ այդ պահածոյի պարունակությունը եռացնել 20-25 րոպե, որից հետո այն կդառնա անվտանգ: Ինքս եռացրել եմ ե՛ւ կարմիր պղպեղը, ե՛ւ սմբուկի խորովածը, խավիարը. ոչ մի փոփոխություն չի լինում: Նույնիսկ վարունգի մարինատն եմ եռացրել ու միանգամից սառեցրել, որպեսզի չփափկի:

ՈՐՈՆՔ ԵՆ ՍՆՆԴԱՅԻՆ ԹՈՒՆԱՎՈՐՈՒՄՆԵՐԻՑ ԱՄԵՆԱԽՈՑԵԼԻՆԵՐԸ


- Ամռան ամիսներին փողոցային առեւտուրն ավելի մեծ մասշտաբների է հասնում: Արդյոք այդպիսի վայրերից գնված ապրանքը միայն լավ լվանալով` կարո՞ղ ենք խուսափել հնարավոր բակտերիաներից (ԱՐՓԻՆԵ ՀԱՐՈՒԹՅՈՒՆՅԱՆ, ք. Արմավիր):
- Ընդհանրապես խորհուրդ չեմ տալիս, որ օգտվեն փողոցային առեւտրից, որովհետեւ հիգիենիկ մինիմալ պայմանները չեն պահպանվում: Սկսենք նրանից, որ աշխատողները պետք է ենթարկվեն բժշկական զննությունների, եւ չգիտես` արդյոք անցել է, թե` ոչ: Մինչդեռ՝ մարդը կարող է առողջ լինել, բայց՝ բացիլակիր: Օրինակ, չլվանալով  ձեռքերը, չլվանալով հագուստը եւ անցնելով սննդամթերքի պատրաստման` կարող են դառնալ բացիլակիր:
- Իսկ ինչպե՞ս սնվել ամռանը, որպեսզի զերծ մնանք սննդային թունավորումներից (ԱՐՄԻՆԵ, ք. Երեւան):
- Առաջին հերթին` սնվել թեթեւ, ճարպոտ մսեր չօգտագործել, ավելի հեշտ մարսվող սնունդ օգտագործել` բանջարեղեն: Ավելի շատ աղցաններ պատրաստեք, բայց ոչ մայոնեզով: Եվ, իհարկե, հիգիենան պահպանեք, որովհետեւ հատկապես սննդամթերքի մշակման հիգիենան, այսինքն` մաքուր հումքը, անչափ կարեւոր է:
- Շատ է խոսվում բուտուլիզմի վտանգների մասին, խնդրում եմ մանրամասնեք, թե որոնք են դրա ախտանիշները («ԻՐԱՎՈՒՆՔ»):
- Սննդային թունավորումներից ամենախոցելին սնկային թունավորումներն ու բուտուլիզմն է, որը կարող է մահացու լինել: Ինչ վերաբերում է ախտանիշներին, ապա բուտուլիզմի դեպքում կարող է առաջանալ գլխացավ, գլխապտույտ, աչքերի երկտեսություն, տեսողության խանգարում, կոպերի անկում, ձայնի խռպոտություն, բիբերի լայնացում: Հորդորում ենք նման դեպքում միանգամից դիմել բժշկի: Բուտուլիզմի դեպքում տնային պայմաններում առաջին օգնություն գոյություն չունի, պետք է անմիջապես հիվանդանոց հասցնել:

«ՊԱՂՊԱՂԱԿԻՑ ՍՆՆԴԱՅԻՆ ԹՈՒՆԱՎՈՐՈՒՄՆԵՐ ՎԵՐՋԻՆ 10 ՏԱՐՈՒՄ ՉԵՆՔ ՈՒՆԵՑԵԼ»


- Հետաքրքիր է` այս տարի պաղպաղակից թունավորման դեպքեր եղե՞լ են, որովհետեւ ուտելիս` վերջերս նկատել ենք, որ կաթի փոշու տհաճ համ է գալիս (ԱՍՏՂԻԿ, Արտաշատի մարզ):
- Պաղպաղակից սննդային թունավորումներ վերջին 10 տարում ընդհանրապես չենք ունեցել: Իսկ ինչ վերաբերում է համին, դա որակական ցուցանիշներ են, եւ դրա վերաբերյալ խորհուրդ կտայի զանգահարել սննդամթերքի անվտանգության պետական ծառայություն:
- Որքանո՞վ են անվտանգ շաուրմաներն այս ամռան շոգին, որից շատ հաճախ աշխատանքային ընդմիջումներին ստիպված ենք լինում օգտվել (ՀՀ ՔԱՂԱՔԱՑԻ):
- Մանրէաբանության տեսակետից չեմ կարող ասել, թե որքան են անվտանգ, որովհետեւ վերահսկողությունն Առողջապահության նախարարությունը չի իրականացնում: Ասեմ, որ մենք շատ ենք ստանում բնակչությունից զանգեր, որ կերել են ու ինչ-որ խանգարումներ ունեն: Դրա համար խորհուրդ կտայի զերծ մնալ այդ շաուրմաներից, հատկապես` ամառվա այս շոգ ամիսներին: Համենայնդեպս՝ դրսում վաճառվողներից:


ՄԻ՛ ԳՆԵՔ ԱՆՀԱՅՏ ՄԱՐԴԿԱՆՑ ԿՈՂՄԻՑ ՎԱՃԱՌՎՈՂ ՍՈՒՆԿ


- Տղաներս ընկերների հետ այս սեզոնին շատ են սիրում գնալ բնության գիրկ եւ մոտակայքից սունկ գնել ու խորոված պատրաստել: Անկեղծ ասած, շատ եմ վախենում սնկային թունավորումներից, որքանո՞վ է մտահոգությունս արդարացված (ՏԻԿԻՆ ԱՆԱՀԻՏ, ք. Երեւան):
- Շատ ճիշտ եք անում, որ մտահոգվում եք: Հնարավորինս մի՛ թույլ տվեք, որ իրենք հավաքեն, իրենք էլ պատրաստեն ու ուտեն այդ սունկը, կամ էլ գնեն այն անհայտ մարդկանցից, որովհետեւ հատկապես այս սեզոնին սնկային թունավորումները սկսվում են: Մենք նման շատ դեպքեր ունենք: Խորհուրդ եմ տալիս՝ միայն գնել շամպինիոն շուկաներից ու սուպերմարկետներից, որովհետեւ դրանք հսկվում են համապատասխան լիազոր մարմնի կողմից:
- Աստված մի արասցե, եթե հանկարծ նման թունավորում լինի, մինչեւ բժշկի դիմելը, ի՞նչ կարող ենք անել:
- Ստամոքսի լվացում արեք եւ ակտիվացված ածուխ կարելի է տալ: Բայց նաեւ հնարավորինս շտապ հիվանդանոց տարեք: Նշեմ նաեւ, որ կան դեպքեր, երբ մարդիկ սունկ են ուտում, բայց օրգանիզմը չի ընդունում: Դա արդեն թունավորում չէ: Այդ դեպքում եւս միանգամից դիմեք բժշկի:

 

ՀՐԱՆՏ ՍԱՐԱՖՅԱՆ

Հավանեցի՞ր հոդվածը, կիսվիր ընկերներիդ հետ