Հ. Նաղդալյան. «Խորհրդանշական է, որ Հայոց բանակը ընդամենը մեկ տարով է «փոքր» պետությունից»

Հ. ՆԱՂԴԱԼՅԱՆ. «ԽՈՐՀՐԴԱՆՇԱԿԱՆ Է, ՈՐ ՀԱՅՈՑ ԲԱՆԱԿԸ ԸՆԴԱՄԵՆԸ ՄԵԿ ՏԱՐՈՎ Է «ՓՈՔՐ» ՊԵՏՈՒԹՅՈՒՆԻՑ»

ՀՀ ԱԺ փոխնախագահ ՀԵՐՄԻՆԵ ՆԱՂԴԱԼՅԱՆՆ, ով այս օրերին գտնվում է Ստրասբուրգում, քանի որ դեռ շարունակվում են Եվրոպայի խորհրդի խորհրդարանական վեհաժողովի ձմեռային նստաշրջանի նիստերը, Հայոց բանակի տոնի առթիվ  իր բարեմաղթանքն է հղել` մասնավորապես նշելով. «Այսօր 24-րդ անգամ նշում ենք Հայաստանի ազգային բանակի տոնը: 24 տարի Հայաստանի անկախ Հանրապետության բանակը եղել է մեր պետության պաշտպանն ու վահանը՝ դիմակայելով հայտարարված ու չհայտարարված պատերազմի դաժան փորձություններին: Այս տարի մենք նշելու ենք Հայաստանի Հանրապետության 25-ամյակը եւ շատ խորհրդանշական է, որ Հայոց բանակը ընդամենը մեկ տարով է «փոքր» պետությունից: Պետությունն ու բանակը մեր դեպքում նույնանում են անկախության պատմություն գրելու դժվարին առաքելության մեջ, որ վկայում են ոչ միայն Եռաբլուրում իրենց վերջին հանգիստը գտած ազատամարտիկները, այլեւ սահմանին աներեր կանգնած հայ զինվորը, որ երեկ, այսօր ու վաղը մեր անվտանգության ու կայունության, տարածաշրջանում խաղաղության պահպանման երաշխիքն է»: Ապա հավել է. «Շնորհավորում եմ Հայաստանի ազգային բանակի Գերագույն գլխավոր հրամանատարի, պաշտպանության նախարարի, սպայակազմի ու յուրաքանչյուր զինվորի տոնը: Այսօր մեր բոլորի տոնն է, որովհետեւ Հայաստանը սահմանամերձ հայրենիք է ու մենք` սահմանին, թե թիկունքում, պարտավոր ենք պաշտպանել մեր ընդամենը քառորդ դարի պատմություն ունեցող պետությունը: Աստված հզորություն թող տա հայ զինվորի բազկին, խաղաղություն ու երջանկություն», - եզրափակելով խոսքը` մաղթել է ԱԺ փոխնախագահը:

ՀՐԱՆՏ ՍԱՐԱՖՅԱՆ