ԶԱՎԵՆ ԱՆԴՐԵԱՍՅԱՆ. «ԱՎԵԼԻ ՀԱՆԳԻՍՏ ԷԻ ԽԱՂՈՒՄ, ԵՎ ՎԵՐՋԱՊԵՍ ՀԱՋՈՂՎԵՑ ՀԱՂԹԵԼ»

Արխիվ 12-16 30 Հունվար, 2016 10:46

ԶԱՎԵՆ ԱՆԴՐԵԱՍՅԱՆ. «ԱՎԵԼԻ ՀԱՆԳԻՍՏ ԷԻ ԽԱՂՈՒՄ, ԵՎ ՎԵՐՋԱՊԵՍ ՀԱՋՈՂՎԵՑ ՀԱՂԹԵԼ»

Երեւանում ավարտված շախմատի Հայաստանի Բարձրագույն խմբի 76-րդ առաջնության չեմպիոն հռչակվեց Զավեն Անդրեասյանը, ով 11 հնարավորից վաստակեց 8 միավոր: Երկրորդ տեղը 7.5 միավորով զբաղեցրեց Ռոբերտ Հովհաննիսյանը, իսկ 3-4-րդ տեղերը բաժանեցին Արման Փաշիկյանն ու Սամվել Տեր-Սահակյանը` 6.5-ական միավորով: «Իրավունքի» հարցերին պատասխանեց նորընծա չեմպիոն ԶԱՎԵՆ ԱՆԴՐԵԱՍՅԱՆԸ:

-Շնորհավորում ենք Ձեզ`Հայաստանի 2016թ. չեմպիոն դառնալու կապակցությամբ: 10-րդ անգամ էիք մասնակցում երկրի առաջնությանը եւ մշտապես մոտ լինելով չեմպիոնի կոչմանը` չէր հաջողվում այն նվաճել: Ի՞նչն օգնեց Ձեզ այս անգամ:

- Շնորհակալ եմ:

Այս անգամ ավելի հանգիստ էի խաղում, արդեն սովորական էր դարձել մասնակցել Հայաստանի առաջնությանը, եւ վերջապես հաջողվեց` հաղթեցի:

- Ինչպե՞ս եք պարտիաներից առաջ կենտրոնանում եւ հասնում հավասարակշռության:

- Ինչպես որ բոլոր պրոֆեսիոնալները՝ պատրաստվում եմ խաղին, շատ եմ հանգստանում, փորձում եմ էներգիա խնայել խաղերից հետո:

- Համալրելու եք Հայաստանի հավաքականի կազմը...

- Շատ ուրախ եմ, որ հնարավորություն ընձեռվեց` համալրելու մեր երկրի ընտրանին: Կփորձեմ իմ խաղով օգնել մեր թիմին:

- Թիմային պայքարում հաջողությունների հասնելու գլխավոր նախապայմանները` ըստ Ձեզ:

- Կարեւորը, երեւի թե, լավ թիմ լինելն է, որն ըստ իս` մեր ընտրանու գլխավոր ուժն է:

- Առաջնության ընթացքում Ձեզ շատ քիչ տարբերությամբ հետապնդում էին Արման Փաշիկյանն ու Ռոբերտ Հովհաննիսյանը: Նրանց դեմ պարտիաները կարելի՞ է ամենաբարդը համարել առաջնության շրջանակներում:

- Կարելի է, քանի որ երկու կարեւոր խաղերում էլ ունեի սեւ խաղաքարեր, շատ էական էր գոնե չպարտվել եւ կարողանալ օգտագործել սպիտակ խաղաքարերով պարտիաները:

- Առաջիկայում ի՞նչ ծրագրեր ունեք: Մայիսին կայանալիք Եվրոպայի առաջնությանը նախապատրաստվելու համար ի՞նչ մրցաշարերի եք նախատեսում մասնակցել:

- Ինչպես ասացիք՝ Եվրոպայի առաջնությանը կմասնակցեմ: Մինչ այդ, երեւի թե, ինչ-որ մրցաշարում կխաղամ, որպեսզի լավ մարզավիճակ ձեռք բերեմ: Բայց դեռ կոնկրետ չգիտեմ, թե որտեղ: