Կիեւի մարզում գրիպի համաճարակի պատճառով արտակարգ իրավիճակի ռեժիմ է սահմանվել

Կիեւի մարզում գրիպի համաճարակի պատճառով արտակարգ իրավիճակի ռեժիմ է սահմանվել

Ուկրաինայի Կիեւի մարզում արտակարգ իրավիճակի ռեժիմ է հաստատվել գրիպի եւ սուր շնչառական վարակի (ՍՇՎ) հիվանդությունների համաճարակային շեմը հատելու պատճառով։ Այս մասին հայտնում են ռուսական լրատվամիջոցները՝ վկայակոչելով մարզային ղեկավարությանը։

Համաձայն առկա տեղեկությունների՝ մարզում արտակարգ դրություն է հայտարարվել Բարիշեւսկի, Բոգուսլավսկի, Բելոցերկովսկի, Իվանովսկի, Ստավիշանսկի, Տարաշանսկի, Կիեւ-Սվյատոշինսկի, Մակարովսկի, Օբուխովսկի, Պերեյասլավ-Խմելնիցկի, Միրոնովսկի, Յագոտինսկի շրջաններում եւ Բելայա Ցերկով քաղաքում հիվանդացության մակարդակը 1.5 անգամ գերազանցելու պատճառով։

Ուկրաինայի առողջապահության նախարարության տեղեկություններով՝ գրիպից եւ դրա հարուցած բարդացումներից մահացածների թիվը հասել է 171-ի։ Հատկապես շատ են մահացության դեպքերը Օդեսայի մարզում՝ 33 դեպք, Վիննիցկի մարզում՝ 13 դեպք, Զոպորոժիեում՝ 12, Ռովնենսկում՝ 11։ Ժամանակին բժշկական օգնության է դիմել հիվանդների 30 տոկոսը միայն, որոնց մի մասը այնուամենայնիվ հիվանդանոցում մահացել է։ Մահացածներից ոչ ոք գրիպի դեմ պատվաստանյութ չէր ընդունել։

Կիեւի փոխմարզպետ Լեւ Պարցխալաձեն նշել է, որ եղանակի տաքանալու պատճառով երկրում իրավիճակը շարունակում է բարդ մնալ։

«Կիեւի մարզում համաճարակային իրավիճակի կապակցությամբ արտակարգ իրավիճակ է հայտարարվել։ Տեղերում ղեկավարությանը հանձնարարվել է նվազագույնի հասցնել ցանկացած հանրային միջոցառում, հիվանդանոցներին եւ լաբորատորիաներին ապահովել դեղերով, դեզինֆեկցիոն միջոցներով եւ լրացուցիչ փոխադրամիջոցներ հատկացնել առաջին բուժօգնության կենտրոնների համար», - ասել է նա: