ՍՈՒՐԵՆ ԶՈԼՅԱՆ. «ԵՍ ԱՅՆ ՏԱՐԻՔՈՒՄ ՉԵՄ, ՈՐ ԱՇՈՏՅԱՆԻ ԿԵՂՏԵՐԸ ՄԱՔՐԵԼՈՒ ԳՈՐԾԻՆ ԿՊՆԵՄ…»

ՍՈՒՐԵՆ ԶՈԼՅԱՆ. «ԵՍ ԱՅՆ ՏԱՐԻՔՈՒՄ ՉԵՄ, ՈՐ

ԱՇՈՏՅԱՆԻ ԿԵՂՏԵՐԸ ՄԱՔՐԵԼՈՒ ԳՈՐԾԻՆ ԿՊՆԵՄ…»

ԿԳ նախարար Արմեն Աշոտյանը շուտով հրաժեշտ կտա իր պաշտոնին:  Նախարարի աթոռը, ամենայն հավանականությամբ, կզբաղեցնի ՀՅԴ անդամ, ԿԳ նախկին նախարար Լեւոն Մկրտչյանը, քանի որ երեկ ՀՅԴ-ՀՀԿ կոալիցիայի հարցում  հստակցություն մտցվեց:

Իր պաշտոնավարման ընթացքում Արմեն Աշոտյանը սկանդալներից զերծ չմնաց եւ ձեռքբերեց«հակառակորդներ»: Նրանցից մեկն էլ Վալերի Բրյուսովի անվան լեզվաբանական համալսարանի նախկին ռեկտոր, գիտությունների դոկտոր, պրոֆեսոր Սուրեն Զոլյանն է:

Հիշեցնենք` 2013 թ-ի նախագահական ընտրությունների ժամանակ Սուրեն Զոլյանը, ով  «Բրուսովի» ռեկտոր էր, բացահայատ պաշտպանում էր նախագահի թեկնածու   «Ժառանգություն»  կուսակցության նախագահ Րաֆֆի Հովհաննիսյանին: Դա, ըստ Զոլյանի, պատճառ դարձավ իրեն պաշտոնանկ անելուն: Դրանից հետո ԱԱԾ նյութեր ուղարկվեցին  համալսարանում տեղի ունեցած խախտումների մասին: «ԱԱԾ-ը Աշոտյանի ծառայությունն է»,- հայտարարել էր Զոլյանը:

«Իրավունք»-ը պրն Զոլյանից պարզեց` եթե Լեւոն Մկրտչյանը դառնա ԿԳ նախարար, հնարավո՞ր է Զոլյանը դաշնակցական նախարարի աջակցությամբ նորից դառնա «Բրյուսովի» ռեկտորը, առավելեւս որ Լեւոն Մկրտչյանի հետ աշխատանքի փորձ ունի:Զոլյանն ասաց, որ ինքն արդեն հինգ տարի է, լսում է Աշոտյանի` նախարարի պաշտոնից հրաժեշտ տալու մասին, խոսակցությունները. «Մինչեւ չկարդամ Աշոտյանի հրաժարականի դիմումը, չեմ հավատա»,- ասաց նախկին ռեկտորը:

Ինչ վերաբերում է դաշնակցական  նախարարի հետ հույս կապելուն եւ նրա շնորհիվ նորից «Բրյուսովի» ռեկտորի պաշտոնը ստանձնելուն, Զոլյանն ասաց. «Դա բացառվում է: Արմեն Աշոտյանն այնքան է փչացրել ամբողջ  կրթական դաշտը… ես էլ այն տարիքում չեմ, որ  Աշոտյանի կեղտերը մաքրելու գործին կպնեմ»:

Ի տարբերություն նախարար Արմեն Աշոտյանի, Լեւոն Մկրտչյանի մասին Զոլյանի կարծիքը դրական է: «Բայց ես չեմ նախանձում ո՛չ իրեն, ո՛չ էլ որեւէ մեկին` իմանալով, թե ինչ վիճակում է այսօր կրթության համակարգը: Այն ո՛չ գրավիչ է, ոչ էլ մրցունակ: Արտասահմանյան ուսանողները դադարել են գալ Հայաստան»,- եզրափակեց Զոլյանը:

ՍՈՆԱ ԴԱՎԹՅԱՆ