«Հայաստանի թիմը պատրաստ է հանդես գալ ռեստորանային սպորտի մրցաշարին» Հայկ Բաբուխանյան

Հայաստանն առաջին անգամ մասնակցելու է Սանկտ-Պետերբուրգում կայանալիք ռեստորանային սպորտի աշխարհի 2020 առաջնությանը։

Այս մասին այսօր, լրագրողների հետ զրույցում տեղեկացրեց Ռեստորանային սպորտի Համաշխարհային ֆեդերացիայի փոխնախագահ եւ Հայաստանի ֆեդերացիայի նախագահ Հայկ Բաբուխանյանը։ 

Հայաստանը ներկայացնելու է ֆեդերացիայի փոխնախագահ, Հայ խոհարարական ավանդույթների զարգացման և պահպանման ՀԿ-ի նախագահ Սեդրակ Մամուլյանի խոհարարական դպրոցի սան Հովհաննես Մկրտչյանը։

Մրցաշարն անցկացվում է 3-րդ անգամ։ Այս տարի պետք է այն անցկացվեր Բուլղարիայում, սակայն COVID-19-ի պատճառով տեղափոխվել է Սանկտ-Պետերբուրգ և որոշվել է ժամանելու հնարավորություն չունեցող թիմերին թույլ տալ մասնակցել հեռավար տարբերակով։

«Քանի որ սահմանները փակ են, մրցույթը որոշել են անցկացնել առցանց։ Ուտեստները ցավոք համով գնահատել չի ստացվի, սակայն կան որոշ չափորոշիչներ, որոնցով էլ պրոֆեսիոնալ ժյուրին կկարողանա որոշում կայացնել»,- ասաց Սեդրակ Մամուլյանը և հավելեց, որ մեր խոհարարը ներկայացնելու է տաք կերակրատեսակներ հավի կրծքամսից և հորթի մսից, ինչպես նաև ընդգրկված է լինելու մեկ աղցան։

Խոհարարի կարծիքով այս մրցաշարը հիանալի հնարավորություն է ևս մեկ անգամ աշխարհին ճանաչելի դարձնելու մեր ավանդույթներն ու մշակույթը, ինչ էլ նպաստելու է Հայաստանում զբոսաշրջության զարգացմանը։ 

Ֆեդերացիայի նախագահ Հայկ Բաբուխանյանն էլ փաստում է , որ չնայած առաջին անգամ ենք մասնակցելու, սակայն մեր մասնակցի մրցանակային տեղ զբաղեցնելու շանսերը բավականին մեծ են և իրենք էլ մեծ սպասումներ ունեն մրցաշարից։

«Այս ամսիների ընթացքում մենք որոշ աշխատանքներ են իրականացրել, աշխատել ենք ռեստորանների ու հասարակական կազմակերպությունների հետ, և այսօր Հայաստանի թիմը պատրաստ է հանդես գալ այս մրցաշարում և պատվով ներկայացնել մեր դրոշն ու երկիրը»,- եզրափակեց պարոն Բաբուխանյանը։ Նա նշեց նաեւ, որ ֆեդերացիան անհանգստատացած է մեր երկրում ռեստորանային ոլորտի ծանր վիճակով եւ անհրաժեշտ է համարում կառավարության կողմից լուրջ աջակցության ծրագրի իրականացումը:

Նշենք, որ ռեստորանային սպորտի համաշխարհային ֆեդերացիան ստեղծվել է 2018 թվականին` նախագահն է իսրայելցի Ալեքս Ռաբինովիչը։ Հայաստանում ֆեդերացիան բացվել է 2019 թվականին։ 

Ռեստորանային սպորտի մրցաշարն անցկացվելու է սեպտեմբերի 11-13-ը, 13 երկրների թիմերի մասնակցությամբ։ Արդյունքները հայտնի կդառնան սեպտեմբերի 14-ին։

Լիանա Հարությունյան

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝