«Ստորջրյա աշխարհի գաղտնիքները» հայ ջրասուզակի ցուցահանդեսում

Այսօր Թեքեյան Կենտրոնում  բացվել եւ մինչեւ փետրվարի  7-ը կգործի մոսկվաբնակ հայ նեյրովիրաբույժ, ջրասուզակ եւ լուսանկարիչ Սերգեյ Գասպարյանի հեղինակած «Ստորջրյա աշխարհի գաղտնիքները» խորագիրը կրող լուսանկարչական ցուցահանդեսը, որին ներկա էին  ՀՀ մշակույթի  նախարարի տեղակալ Ներսես Տեր-Վարդանյանը, Երեւանում Ռուսաստանի գիտության եւ մշակույթի կենտրոնի` Մշակույթի բաժնի վարիչ Իրինա Կասացկայան, արվեստագետներ, արվեստասերներ: Բացառիկ ցուցահանդեսում ներկայացված 66 աշխատանքներն իրենց պատկերներով եւ գեղարվեստական անվանումներով վկայում են հեղինակի բազմակողմ զարգացության մասին: Փոխնախարար ՆԵՐՍԵՍ  ՏԵՐ-ՎԱՐԴԱՆՅԱՆԻ  խոսքով,  նմանօրինակ  ձեռնարկի  կազմակերպումն  ուշագրավ է նաեւ այն առումով, որ ՀՀ մշակույթի նախարարությունը մտադիր է Հայաստանում  զարգացնել ջրին առնչվող մշակույթի ներկայացման մեթոդները եւ առաջիկայում նախատեսում է Սեւանա լճում ստորջրյա թանգարան բացել, ինչը կնպաստի ներքին զբոսաշրջության զարգացմանը.  «Հուսով եմ, որ առիթ կունենանք այդ կապակցությամբ Սերգեյ Գասպարյանին Հայաստանում տեսնելու, եւ հաջորդ ցուցահանդեսներն արդեն հարստացած կլինեն հայաստանյան պատկերներով»:

«Թեքեյան Կենտրոն» հիմնադրամի  տնօրեն ԱՐՄԵՆ ԾՈՒԼԻԿՅԱՆԸ  մասնավորապես նշեց. «Սերգեյ Գասպարյանն այն հեղինակներից է, ում աշխատանքները պատիվ կբերեն աշխարհի ցանկացած ցուցասրահի: Հպարտ եմ, որ այս լուսանկարների հեղինակը մեր հայրենակիցն է եւ նաեւ հավատացած եմ, որ շուտով նա Հայաստանում մասնակից կդառնա այլ հետաքրքիր ծրագրերի»:

Իրինա Կասացկայան շնորհավորելով հեղինակին եւ ցուցահանդեսի  կազմակերպիչներին, ցանկություն հայտնեց, որպիսի այս յուրօրինակ ու տպավորիչ ցուցադրությունը լինի  շարունակական եւ  ներկայացվի  այլ քաղաքներում, ինչին  հնարավորինս կօժանդակի Երեւանում Ռուսաստանի գիտության եւ մշակույթի կենտրոնը: Ցուցահանդեսի համադրող, Photo.Podium.com  ինտերնետային  ռեսուրսի հայաստանյան  ներկայացուցիչ, լուսանկարիչ Արմեն Ենգոյանը, ներկայացնելով հեղինակին, հավելեց. «Նա սկսեց լուսանկարել  իր կյանքի դժվար պահին եւ այլեւս չդադարեց.  շատ է ճամփ որդում,  նկարում է ու ամեն նկարին լիրիկական մոտեցում է ցույց տալիս: Հատկանշական են լուսանկարների  անվանումները, որոնք  խոսում են նրա երեւակայության, կատակասիրության,  աշխարհի մարդ լինելու մասին»:

Սերգեյ Գասպարյանը ծնվել է 1953թ. Մոսկվայում, բժիշկների ընտանիքում: Կրթությամբ եւ մասնագիտությամբ նեյրովիրաբույժ է, բժշկական գիտությունների դոկտոր: 35 տարի աշխատում է Ռուսաստանի առաջատար եւ համաշխարհային ճանաչում ունեցող ՌԲԳԱ-ի Ն.Ն.Բուրդենկոյի անվան նեյրովիրաբուժության գիտահետազոտական ինստիտուտում՝ որպես վիրահատության բլոկի բաժնի պետ: Ամբողջ ազատ ժամանակը նվիրում է լուսանկարչությանը. լինելով նաեւ փորձառու ջրասուզակ, կարողանում է պատկերել ծովերի եւ օվկիանոսների ստորջրյա հրաշալիքները: Ռուսաստանի պրոֆեսիոնալ նկարիչների ստեղծագործական միության (լուսանկարչության բաժին) անդամ է, մոսկովյան ժամանակակից լուսանկարչական ոլորտի ակտիվ մասնակից: Մասնակցել է մի շարք միջազգային ցուցահանդեսների Երեւանում, Գյումրիում, Թբիլիսիում, Մոսկվայում, Ս.Պետերբուրգում, Մինսկում. արժանացել է մրցանակային տեղերի:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝