Երդվեցին լինել «Սահմանապահների երիտասարդ ընկերները»

ՀՀ-ում ՌԴ ԱԴԾ սահմանապահ զորքերի վարչությունում հայ եւ ռուս աշակերտները երդվեցին պաշտոնապես լինել «Սահմանապահների երիտասարդ ընկերները»: Սահմանապահ զորքերի ենթակայության տակ գործող հանրակրթական դպրոցի շուրջ 70 աշակերտ ստացան համապատասխան կրծքանշաններ ու իսկական զինվորական գրքույք հիշեցնող վկայականներ՝ երդվելով, որ միանալով «Սահմանապահների երիտասարդ ընկերներ» ջոկատին, հանդիսավոր կերպով, ընկերների առաջ խոստանում են՝ լինել հայրենիքի պաշտպանների փառավոր ավանդույթների ազնիվ եւ արժանի շարունակողը, լինել հայրենասեր, քրտնաջան սովորել, հարգել ավագներին ու վետերաններին, զարգացնել իրենց մեջ ուժը, քաջությունը, կամքն ու ճարպկությունը եւ լինել օրինակ երիտասարդ ընկերների եւ հենարան՝ ընտանիքի համար:

Երդման պաշտոնական արարողության ժամանակ հնչեցին Հայաստանի ու Ռուսաստանի օրհներգները, բերվեց աշակերտական ջոկատի դրոշը, իսկ ելույթներով հանդես եկան եւ աշակերտներին ողջունեցին ՀՀ-ում ՌԴ անվտանգության դաշնային ծառայության սահմանապահ զորքերի վարչության պետ գեներալ-լեյտենանտ Ռոման Գոլուբիցկին, պետի առաջին տեղակալ գեներալ-մայոր Սերգեյ Բալակինը եւ Հայաստանում ՌԴ ԱԴԾ սահմանային ծառայության Ռուսաստանի վետերանների խորհրդի տարածաշրջանային բաժանմունքի պետի տեղակալ, փոխգնդապետ Վահրամ Մանուկյանը։

Փոխգնդապետ ԱՆԴՐԵՅ ԶԱՅԱԼՈՎԸ, ով ստանձնել էր արարողության կազմակերպման եւ  հաղորդավարի պատասխանատվությունը, «Իրավունքի» հետ զրույցում ասաց, որ դեռեւս նախորդ տարի ՌԴ ԱԴԾ սահմանապահ զորքերում ձեւավորվել է շարժում, որը կոչվում է «Սահմանապահների երիտասարդ ընկերներ». «Հիմա այդպիսի շարժում ձեւավորում ենք նաեւ Հայաստանում, որին կարող են մասնակից դառնալ ոչ միայն մեր գործընկերների երեխաները: Սկզբում հայտարարեցինք շարժման մասին, գնացինք դպրոց եւ պատմեցինք երեխաներին, ցույց տվեցինք Ռուսաստանի օրինակը եւ տեսահոլովակներ այդ թեմատիկայով: Եվ եթե սկզբում ունեինք 30 աշակերտ, ապա այժմ նրանք շուրջ 70-ն են»:

Ի դեպ, փոխգնդապետ Զայալովը նաեւ նշեց, որ այս ամենով ավելի ոգեւորված են ծնողները, որովհետեւ իրենց երեխաները հեռախոսներից գոնե մի փոքր կկտրվեն. «Մենք նախատեսում ենք երեխաների հետ անցկացնել ֆիզիկական վարժություններ, նախնական զինվորական պատրաստություն, հայրենասիրական միջոցառումներ»:

Հարցին, թե արդյոք «Սահմանապահների երիտասարդ ընկերներն» ապագայում կդառնան իսկական սահմանապահներ, ռուս սպան այսպես պատասխանեց. «Մենք հուսով ենք եւ մեծ հաշվով այս ամենը հենց հետաքրքրություն է առաջացնելու երեխաների մոտ, որպեսզի, ինչու ոչ, ապագայում դառնան սահմանապահներ: Սակայն մեր նպատակն առաջին հերթին ռազմահայրենասիրական դաստիարակությունն է, որպեսզի երեխաները մեծանան հայրենասեր: Ապագայում կգա՞ն սահմանապահ զորքեր, շատ լավ, չե՞ն գա, էլի լավ, որովհետեւ, միեւնույն է, կլինեն լավ հայրենասերներ»:

Հայաստանում ՌԴ ԱԴԾ սահմանային ծառայության Ռուսաստանի վետերանների խորհրդի տարածաշրջանային բաժանմունքի պետի տեղակալ, փոխգնդապետ ՎԱՀՐԱՄ ՄԱՆՈՒԿՅԱՆԸ նույնպես ասաց, որ կարեւոր չէ «Սահմանապահների երիտասարդ ընկերները» կդառնան սահմապահներ, թե կընտրեն այլ մասնագիտություն, այլ կարեւորն այն է, որ շարժման մասնակից երեխաները կզբաղվեն ոչ թե անպետքություներով, այլ կստանան հայրենասիրական դաստիարակություն:

«Մեծ ծրագիր ունենք, որը նախատեսել ենք իրականացնել մեկ տարվա մեջ, որից հետո շարժումը կհամալրվի նոր աշակերտներով: Կանցկացնենք ոչ միայն նախնական զինվորական պատրաստության դասընթացներ, այլեւ Հայաստանի եւ Ռուսաստանի պատմության դասեր, մարզական մրցույթներ», - ընդգծեց փոխգնդապետ Մանուկյանը:

Թե ինչպիսի տրամադրություններ կան աշակերտների շրջանում արդեն իսկ ձեւավորված շարժման վերաբերյալ, վետերանների խորհրդի տարածաշրջանային բաժանմունքի պետի տեղակալն ասաց, որ դեռ երեխաների համար այս ամենը նոր է ու լավ չեն պատկերացնում. «Բայց ծնողներն, իսկապես, ոգեւորված են: Նրանց համար տեղի ունեցած արարողությունը, կարծես, հենց զինվորական երդման արարողություն լիներ»:

Հավելենք, որ ՀՀ-ում ՌԴ ԱԴԾ սահմանապահ զորքերի ենթակայության տակ գործող հինգ հանրակրթական դպրոցներում արդեն իսկ գործում է «Սահմանապահների երիտասարդ ընկերներ» շարժումը, որոնց անդամների թիվը կազմում է ավելի քան 200 աշակերտ:

Նյութը եւ լուսանկարները՝ ՀՐԱՆՏ ՍԱՐԱՖՅԱՆԻ