«Մենք պիտի խոսենք». երեք բառ, որ կարող են սպանել ձեր հարաբերությունները

Հարաբերությունները հարթելու ամենատարածված միջոցը՝ քննարկելը, պարզվում է, որ այնքան էլ հաջող չէ, ինչքան ընդունված է կարծել: Ավելին՝ ձեր զրույցները կարող են հակառակ արդյունքը տալ:

Շատ կանայք, հասկանալով, որ իրենց այդքան հարազատ մարդն օտարանում է, արտասանում են միեւնույն արտահայտությունը՝ «Մենք պետք է խոսենք»: Նրանք առաջնորդվում են իրենց զգացմունքները քննարկելու' կանանց համար այնքան բնական ցանկությամբ: Պարզվում է՝ տղամարդիկ այդ առաջարկն ընդունում են որպես... քննադատություն իրենց հասցեին:

Միսուրիի համալսարանի գիտնականների հետազոտությունները ցույց են տվել, որ տղամարդկանց մեծ մասի կարծիքով խնդիրներն անվերջորեն քննարկելը տարօրինակ է, հիմարություն եւ ուղղակի անօգուտ: «Քանի՞ կին կարող է անկեղծորեն խոստովանել, որ իր «Արի խոսենք»  առաջարկին ի պատասխան լսել է «Ես մտածում էի, որ դու դա երբեք չես խնդրի»,- հարցնում է բժիշկ Պատրիսյա Լավը իր համահեղինակած  «Ինչպե՞ս փրկել ամուսնությունը՝ առանց ավելորդ բառերի» գրքում (How To Improve Your Marriage Without Talking About It ): Իրականում կանանց մեծ մասը նախապես գիտի, որ տղամարդը, այդ արտահայտությունը լսելով, կնյարդայնանա, կսկսի պաշտպանվել, աչքերը ոլորել, եւ որպես կանոն, խոսակցությունն ավելի վատ վախճան կունենա, քան սկիզբն էր:

Արմատները պատմության խորքում են...

Այս երեւույթի արմատները կարելի է գտնել՝ վերադառնալով էվոլյուցիայի ակունքներին: Կանայք հնուց ավելի խոցելի են եղել այն պատճառով, որ նրանց գլխավոր գործառույթը երեխաներ ունենալն էր, կախվածության մեջ էին խմբից, որն ապահովում էր նրանց անվտանգությունը: Հազարավոր տարիներ են անցել, բայց կինը նախկինի պես պայքարում է վախով՝ իր հոգսերը փորձելով կիսել ուրիշների հետ: Տղամարդիկ, հակառակը, միշտ եղել են պաշտպանողների դերում: Նրանք գիտեն, որ կանայք իրենց ընտրում են գլխավորապես պաշտպանված եւ ապահովված լինելու համար: Այդ պատճառով տղամարդն ինքն իրեն գնահատում է այնքանով, որքանով գլուխ է հանում այդ գործառույթներից, եւ զուգընկերուհին երջանիկ է: Երբ կինը խոսակցություն է սկսում, որն ակնարկում է՝ հարաբերություններում խնդիրներ կան, տղամարդը դա ընկալում է որպես նշան, որ ինքը գլուխ չի հանում իր «առաքելությունից»: Վրա են հասնում ամոթի զգացումն ու զգացմունքային օտարումը:

«Հետազոտությունները ցույց են տալիս, որ ֆիզիկական արձագանքը հուզական սթրեսներին տղամարդկանց եւ կանանց դեպքում տարբեր է,- բացատրում է Պատրիսյա Լավը:- Զգացմունքերի մասին նմանատիպ խոսակցությունները հանգստացնում են կանանց եւ ֆիզիկական անհարմարություններ պատճառում տղամարդկանց, որոնց մոտ կտրուկ մեծանում է սթրեսի հորմոնի՝ կորտիզոլի քանակը, եւ արյունը հոսում է դեպի մկանները: Այդ պատճառով տղամարդը դառնում է նյարդային եւ գրգռված, իսկ կինը մտածում է՝ նա պարզապես չի ցանկանում լսել իրեն»: Բժիշկը համոզված է, որ խնդիրը լուծելու բանալին հարաբերվելն է առանց բառերի: «Խոսակցությունը պետք է սկսել միայն ոչ վերբալ շփումից հետո՝ հպումը, սեքսը, միասին ինչ-որ բան անելը, երբ կա մտերմության զգացում»,- ասում է նա: Պատրիսյա Լավը փորձում է կոտրել կարծրատիպը, որ տղամարդկանց քնքշանքները հետաքրքրում են միայն սեքսի համատեքստում: Նրա մասնագիտական փորձը ցույց է տվել, որ տղամարդիկ առհասարակ չեն հրաժարվի դրանցից:

Երջանկության բանաձեւ

Առաջին հերթին, բժիշկ Պատրիսյա Լավն առաջարկում է օրվա մեջ գրկել զուգընկերոջը վեց անգամ, ընդ որում՝ յուրաքանչյուր անգամ՝ ամենաքիչը վեց վայրկյան, որպեսզի ապահովել մտերմության անհրաժեշտ մակարդակը (գրկախառնության ժամանակ արտադրվում է «քնքշության» հորմոնը՝ սերոտոնինը): Թող որ սկզբում դրանք արհեստական թվան, մի' անհանգստացեք. շուտով կվերածվեն իսկականի:

Երկրորդ տեղում սեքսն է. այն զույգի համար գերազանց հնարավորություն է ստեղծում միմյանց ներելու: «Օքսիտոցինը՝ այն հորմոնը, որ օրգազմ է առաջացնում, հրաշք «դեղատոմս» է: Ինտիմ մերձեցումից հետո այն «հիշողության կորստի» էֆեկտ է ստեղծում, որը տեւում է չորս-վեց ժամ եւ թույլ տալիս այդ ընթացքում մոռանալ զուգընկերոջ արարքների մասին»:

Հարաբերություններում կարեւոր է, որ թե' տղամարդը, թե' կինը կարողանան հարգանքով վերաբերվել միմյանց թուլություններին: Տղամարդիկ չեն հասկանում, թե ինչ ցավ է զգում անտեսված կինը: Կանայք չեն նկատում, որ անգամ փոքր ակնարկը, որ իրենք երջանիկ չեն, նվաստացնում է տղամարդուն: Եթե կառուցեք ձեր հարաբերությունները ձեր արարքների, այլ ոչ թե խոսքերի հիման վրա, սիրած անձնավորությունը Ձեր կողքին առավել պաշտպանված կզգա:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝