«Իրավունք». Ում են փորձում գլխավոր մրցակից դարձնել Ավինյանին
Թեմա
Տպավորություն է, որ ընդդիմության արգանդը չորացել է, եւ նիկոլականների դեմ պայքարելու կադրերի «քաստինգն» անցկացվում է նախկին նիկոլականների միջեւ:
Մինչ տիտղոսային ընդդիմությունը լռում է, թե ովքեր են լինելու Երեւանի իրենց քաղաքապետի թեկնածուն, նրանց իսկ լուռ համաձայնությամբ` քաղաքական կուլիսներում շրջանառվում է, որ «Ապրելու երկիր» կուսակցությունը մտադիր է ՔՊ-ական քաղաքապետի թեկնածու, փոխքաղաքապետ Տիգրան Ավինյանին գլխավոր մրցակից դարձնել Երեւանի նախկին քաղաքապետ Հայկ Մարությանի օրոք Կենտրոն վարչական շրջանի ղեկավար Վիկտոր Մնացականյանին: Այդ մասին արդեն իսկ ակնարկել է «Ապրելու երկիր» կուսակցության համահիմնադիր Մեսրոպ Առաքելյանը: Նա, իրենց կուսակցության հավանական քաղաքապետի թեկնածուների մասին խոսելով, նշել է կուսակցության նախագահ Մանե Թանդիլյանի եւ Վիկտոր Մնացականյանի անունները` ընդգծելով, որ վերջինը իրենց համախոհ գործընկերն է ու նաեւ տարբեր համայնքներում տարբեր աշխատանքներում ներգրավված է:
Բնական է, հավանականությունը քիչ է, որ Մանե Թանդիլյանը կդառնա Երեւանի քաղաքապետի թեկնածու, քանի որ նա արդեն իսկ երկու անգամ իր պաշտոնը կիսատ է թողել` առողջական խնդիրներով պայմանավորված (նախ «Լուսավոր Հայաստան» խմբակցությունից պատգամավորական մանդատը վայր դրեց, ապա ազատվեց Արցախի աշխատանքի, սոցիալական եւ միգրացիայի հարցերի նախարարի պաշտոնից): Հետեւապես, դժվար թե, կարողանա վստահություն ներշնչել երեւանցիներին, որ այս անգամ էլ քաղաքապետի պաշտոնը կեսից չի թողնի: Մինչդեռ Վիկտոր Մնացականյանը ակտիվ գործի է անցել այս ուղղությամբ: Նա ոչ միայն գերակտիվ բարձրաձայնում է երեւանյան խնդիրների մասին` չխնայելով նախկին թիմակիցներին, այլ նաեւ հանրային դասախոսություններով է հանդես գալիս «Մարդամոտ քաղաք» խորագրի ներքո: Ըստ շրջանառվող լուրերի` Comedy Club Production-ի հիմնադիր եւ գլխավոր պրոդյուսեր, «Ջազվեի» սեփականատեր Արթուր Ջանիբեկյանի զարմիկ Վիկտոր Մնացականյանն իր թեկնածության պաշտպանության հարցում հույս է դրել, ինչպես մոսկովյան եւ արցախյան կապերի վրա, այնպես էլ Հայկ Մարությանի թիմի ու կենտրոնաբնակ «ավտարիտետի» վրա: Ավելին` չի բացառվում, որ տակից նրան սատարեն նաեւ որոշ նիկոլականներ, որոնք այդպես էլ յուրային չընկալեցին Տիգրան Ավինյանին եւ նրա մեջ շարունակում են տեսնել Նիկոլ Փաշինյանին գլխավոր մրցակից` զգուշանալով ավինյանականների թիմից:
Իսկ թե ինչպիսի ղեկավար էր Վիկտոր Մնացականյանը` որպես Երեւանի Կենտրոն վարչական շրջանի ղեկավար, երեւանցիների հուշերում մնացել է երկու դրվագ: Դեռեւս թաղապետի պաշտոնում Վիկտոր Մնացականյանն աչքի ընկավ Հյուսիսային պողոտայի սալահատակն անձամբ լվանալով: Իսկ ավելի ուշ փորձեց հերոսանալ Օպերայի շրջակայքի սրճարաններն ապամոնտաժելու գործում, որոնց թվում էր նաեւ Արթուր Ջանիբեկյանին պատկանող սրճարանը: Սակայն, այդպես էլ Օպերայի հարակից տարածքը լայն կանաչ գոտի չդարձավ հանգստի համար, ինչպես այն ժամանակ համոզում էին ինքն ու Երեւանի նախկին գլխավոր ճարտարապետ Արթուր Մեսչյանը:
Ինչեւէ, ամենաուշագրավը թերեւս Վիկտոր Մնացականյանի հրաժարականն էր թաղապետի պաշտոնից: Նա հանդես եկավ հայտարարությամբ, որտեղ վստահեցնում էր, թե պաշտոնը թողնելու որոշումը չունի քաղաքական դրդապատճառ եւ հանդիսանում է բացառապես անձնական որոշում:
«Թող ոչ ոք չփորձի շահարկել այն քաղաքական նկատառումներով կամ դրա շուրջ դավադրության տեսություններ հյուսել: Շնորհակալություն եմ հայտնում ՀՀ վարչապետ Նիկոլ Փաշինյանին` երկրի զարգացման կենսունակ տեսլականի եւ վստահության համար` եւս մեկ անգամ վերահաստատելով իմ աջակցությունը նրա որդեգրած քաղաքական կուրսին»,- ասել էր Վիկտոր Մնացականյանը, իսկ հիմա պատերազմ եւ անթիվ ու անհամար զոհեր տված փաշինյանական քաղաքական կուրսին ծպտյա՞լ է աջակցում, թե՞ «Նաջարյանը փոշմանել է», ցույց կտա ժամանակը:
ՀՐԱՆՏ ՍԱՐԱՖՅԱՆ
Ինչու ապշած ես, Լուլո՛ւ․ ԶԱՐՄԱՆՔ
Երբ թալանում են պետության ապագան
Որքան աշխատավարձ է քաղաքապետարանից ստացել Սուրեն Գրիգորյանը, որն արդեն չի բավականացնում
Դեռ ձգո՞ւմ եք, ծերը ծերին հասցնո՞ւմ եք․ ԶԱՐՄԱՆՔ
1
4778 դիտում
2
4124 դիտում
3
2342 դիտում
4
2058 դիտում
5
1537 դիտում
1
31465 դիտում
2
19577 դիտում
3
11467 դիտում
4
11417 դիտում
5
8464 դիտում
3
17765 դիտում
