Արայիկ Հարությունյանի կողմից անոնսավորված Հայաստան եկող մեգաաստղը Սնուփ Դոգն է

Մշակութային 29 Հուլիս, 2023 1:16

Կառավարության աշխատակազմի ղեկավար ԱՐԱՅԻԿ ՀԱՐՈՒԹՅՈՒՆՅԱՆԸ հայտարարել է, որ Հայաստան է գալիս համաշխարհային մեծ աստղերից մեկը:

«Մեզ հաճախ հարցնում են, թե ինչու են հարեւան պետություններում համերգներով հանդես գալիս երաժշտության ոլորտի մեգա աստղերը, սակայն Հայաստանում նման համերգներ տեղի չեն ունենում, իսկ մեր քաղաքացիները ստիպված են լինում գնալ այլ պետություններ ներկա գտնվելու այդ շոուներին: Եվ ուրեմն, կառավարությունը նախաձեռնել է թոփ աստղերից մեկի համերգ-շոուն Երեւանում, որի մասին կհայտարարվի առաջիկա ժամերին: Welcome to Yerevan, dear STAR!!!», - գրել է նա:

Անդրադառնալով վերոնշյալին՝ «Հայրենիք» կուսակցության քաղխորհդրի անդամ ԱՐՍԵՆ ԲԱԲԱՅԱՆՆ ընդգծել է. «Դե ի՞նչ ասեմ, Արցախում 120.000 մարդ ծայրահեղ վիճակում է, իսկ Նիկոլի կառավարությունը հանգիստ կարող է շուրջ 23 միլիոն դոլար հատկացնել ու, օրինակ՝ Սնուփ Դոգին կամ համանման այլ աստղի բերել Հայաստան: Ի դեպ, որեւէ պատահական բան չեմ գրել: Կառավարության այդպիսի նախագիծ վաղուց է շրջանառվում: Իսկ Արայիկ Հարությունյանը այդ STAR-ի անունը չի նշում, քանի որ ինքն էլ այս պահին չգիտի, թե ում են բերելու (Սնուփ Դոգին կամ համանման այլ արտիստ), բայց արդեն 23 միլիոն դոլար են հատկացրել: Ճիշտ եք անում, ամեն հնարավորն արեք, որ աշխարհը չհավատա Ացախում տիրող ծայրահեղ վիճակին: Դուք ատում եք Արցախն ու արցախցուն»:

«Իրավունքի» տեղեկություններով՝ Արսեն Բաբայանը ոչ թե որեւէ պատահական բան չի գրել, այլ խփել է ուղիղ նշանակետին, որովհետեւ հենց Սնուփ Դոգն էլ ժամանում է Հայաստան: Նա սեպտեմբերի 23-ին իր առաջին համերգը կունենա Երեւանում՝ Հրազդան մարզադաշտում: Նշենք, որ ամերիկացի ռեփեր Սնուփ Դոգն դեռեւս դպրոցական տարիներին եղել է «Crip» կոչվող գանգստերական խմբավորման անդամ։ Դպրոցն ավարտելուց կարճ ժամանակ անց՝ ձերբակալվել է ապօրինաբար կոկային պահելու մեղադրանքով եւ ենթարկվել վեցամսյա կալանքի։ Բրոդուսի երաժշտական կարիերան սկսել է 1992 թվականին, երբ բանտից դուրս գալուց հետո:

ՀՐԱՆՏ ՍԱՐԱՖՅԱՆ