Պարտադրված խաղաղության պայմանագիրը նույն կապիտուլյացիան է. Սերժ Սարգսյան

«Թիրախավորումներն ինձ համար սովորական երևույթ են արդեն 30 տարուց ավելի»,– դիզվառելիքի շինծու գործով հերթական դատական նիստից հետո լրագրողների հետ զրույցում ասաց ՀՀ երրորդ նախագահ, ՀՀԿ նախագահ Սերժ Սարգսյանը։

Նա նշեց, որ այդ թիրախավորումներն ավանդաբար սկսել են անել ադրբեջանցիները, 90–ականների կեսերին նրանց ձայնակցել են տեղացիները, իսկ հիմա առանձնապես ոչինչ չի փոխվել, այդ երգչախմբին միացել են նոր ձայներ նոր տոնայնությամբ։

«Չգիտեմ՝ իրենք գիտակցո՞ւմ են, որ իրենց համարելով ընդդիմադիր՝ ջուր են լցնում Հայաստանի կառավարիչների ջրաղացին։
Այս նույնը վերաբերում է  նաև Հայաստանի  Հանրապետական կուսակցությանը»,– ասաց Ս. Սարգսյանը։

Նա ընդգծեց, որ, իր կարծիքով, ամենակարևորը դա չէ։

«Կարևորն այն է, որ թիրախավորվել է Հայաստանի Հանրապետությունը, մեր պետությունն ու պետականությունը։

Իմ խորին համոզմամբ, վերջին 100 տարվա մեջ  հայ ժողովրդին այսպիսի ողբերգություն չէր պատուհասել։ Իհարկե, այդ ընթացքում եղել են բազմաթիվ պրոբլեմներ՝ կուլակաթափություն, 30–ականներին մարդկանց, որոշ դեպքերում, անտեղի գնդհակահարություններ, Հայրենական պատերազմ, ավերիչ երկրաշարժ, բայց այսպիսի ողբերգություն չի եղել։

Ցավոք սրտի, մեր հասարակության մեջ դեռևս ամբողջովին առկա չէ այս գիտակցումը, որ այդ ողբերգությունն ամենածանր ու ցավոտ հարվածն է եղել մեր պետականությանը»,– ասաց Սերժ Սարգսյանը։

ՀՀ երրորդ նախագահը նշեց, որ միշտ համարել ու այսօր էլ համարում է, որ Արցախի համար պայքարը եղել է Հայաստանի պետականության համար պայքար և այդ խնդիրը, երբ որ իրենք առաջ էին մղում, այդ  գիտակցությամբ էին առաջ մղում։

«Ղարաբաղը երբեք Հայաստանի, Հայաստանի պետականության, հայ ժողովրդի համար բեռ չի եղել, եղել է ընդհակառակը, փրկօղակ, և այդ ողբերգությունը, փաստորեն, մեր պետականությունը զրկեց իր հիմնասյուներից մեկից։
Առաջին հերթին պետք է մտածել դրա մասին և ոչ թե անձերին, առանձին քաղաքական ուժերին թիրախավորելու մասին։ Թող թիրախավորեն,  հատկապես այդ թիրախավորումների ճնշող մեծամասնությունն ուղղակի զրպարտություններ են, ժամանակի ընթացքում իրենք էլ են տեսնում, որ զրպատություններ են»,– ասաց Սերժ Սարգսյանը։ 

«Ադրբեջանի հետ խաղաղության պայմանագրի ստորագրումը, ինչպես նաև մեր տարածաշրջանում տևական խաղաղության հաստատումն անհրաժեշտություն է։ Ես տասնյակ տարիներ այդ կարծիքին եմ եղել»,– լրագրողների հետ զրույցում ասաց ՀՀ երրորդ նախագահ, ՀՀԿ նախագահ Սերժ Սարգսյանը։

Նա հիշեցրեց, որ սկսած 1990–ականների կեսերից խոսել է փոխզիջումների, խնդիրը բանակցություններով կարգավորելու մասին։

«Ազգային ժողովի ամբիոնից հայտարարել եմ, որ Աղդամը իմ հայրենիքը չէ։ Իսկ որոշ ժամանակ առաջ, մարդիկ, ովքեր իրենց համարում են հայրենասեր, շատ բան իմացող, Հայաստանի ապագայի մասին մտածող, Աղդամում  նկարվում էին ու ասում էին՝ Աղդամը մեր հայրենիքն է։ Իրենց կարծիքով, խայթում էին ինձ՝ չհասկանալով, որ հիմարություն են խոսում։ Վերջն այսպես է լինում»,– ասաց ՀՀ երրորդ նախագահը։

Նա նշեց, որ չգիտի, թե ինչ տեքստ ու տեսք ունի  այն խաղաղության պայմանագիրը, որը պատրաստվում է կնքել Հայաստանի կառավարիչը:

«Մենք միայն որոշակի արտահոսքերից, այլ երկրների մամուլից ենք որոշակի եզրակացություններ անում և տեսնում ենք, որ ամեն անգամ մենք գնում ենք նոր զիջումների, ամեն անգամ:

Եվ դա ինչպե՞ս կարելի է կոչել խաղաղության պայմանագիր: Եթե այդպիսի պայմանագիր ստորագրվի, ապա այդպիսի պայմանագիրը, ճիշտ կլինի կոչել պարտադրված խաղաղության պայմանագիր, իսկ պարտադրված խաղաղության պայմանագիրը նույն կապիտուլյացիան է:

Հիշում եք, որ նոյեմբերի 9–ի փաստաթղթի հրապարակումից հետո, «կապիտուլյանտ» բառը ինչպես դաջվեց նրա վրա, և ես վստահ եմ՝ եթե այսպիսի խաղաղության պայմանագրի պետք է ստորագրվի, ապա նա կոչվելու է «կրկնակ կապիտուլյանտ»։ Սա այլ ելք չի կարող բերել։ Անարդար խաղաղությունը պատճառ է նոր պատերազմի»,– ասաց Սերժ Սարգսյանը:

ՀՀ երրորդ նախագահ, ՀՀԿ նախագահ Սերժ Սարգսյանը պատասխանելով այն հարցին, արդյո՞ք տեսնում է վտանգներ այն հարցում, որ Հայաստանն ընդունել է Ադրբեջանի առաջարկը՝ երկկողմ բանակցություններ սահմանին, ասաց․

«Ես չեմ կարծում, որ Հայաստանն ընդունել է։ Համենայն դեպս Արտաքին գործերի նախարարության հայտարարությունը մի քիչ խուճուճ է՝ ո՛չ ասացին ընդունում ենք, ո՛չ ասացին՝ չենք ընդունում, որովհետև իրենք մտածելու կարիք ունեն։ Իհարկե, չի՛ կարելի ընդունել երկկող բանակցությունների առաջարկությունը։ ՀՀ այսօրվա կառավարիչն իր կարծիքով ուզում է խայթել ինձ՝ ասելով «տեսեք Ալիևի հետ ես չեմ բանակցել, իսկ ես բանակցում եմ»։ Մենք տեսանք ,թե ինչի բերեցին այդ բանակցությունները։ Խնդիրը նրանում չէ, որ դիմացինդ որպես բանակցող հաճելի, թե տհաճ անձնավորություն է, այլ այդ բանակցությունների  արդյունքը ինչ–որ մեկ այլ ուժի՝ ավելի հզոր երկրի կողմից պետք է երաշխավորվի, եթե դա չի երաշխավորվելու, ապա այդ թուղթն ու՞մ է պետք։ Կողմերից յուրաքանչյուրը կարող է շատ հանգիստ խախտել պայմանավորվածությունները»։

ՀՀ երրորդ նախագահը խորապես համոզված է, որ երկկող բանակցությունները տանելու են  դեպի փակուղի։

«Եթե ստացվի, ապա շատ մեծ զիջումներով, որոնք ուղղակի մեզ որևէ ապագա չեն խոստանում»,– եզրափակեց Սերժ Սարգսյանը։

 «ՀԱՊԿ–ն մեր գործընկերը չէ, դաշնակիցն է, իսկ դաշնակիցների հետ պետք է աշխատել և աշխատել ուղեղով, ոչ թե միայն լեզվով։ Եթե ուղեղ չունես, ապա չես կարող ունենալ այն արդյունքն ինչ–որ ակնկալում ես։ Դաշնակիցը նրա համար չէ, որ  քո փոխարեն կռվի։ Դաշնակիցը նրա համար է, որ  հնարավորությունների սահմաններում քեզ օժանդակի։Դա միակողմանի չի կարող լինի, դու էլ պետք է անհրաժեշտության դեպքում՝ օժանդակես, եթե ոչ զենքով, ապա տարբեր տեղեր քվեարկությամբ, վերաբերմունքով»,– լրագրողների հետ զրույցում ասաց ՀՀ երրորդ նախագահ, ՀՀԿ նախագահ Սերժ Սարգսյանը՝ պատասխանելով ՀԱՊԿ նիստին Հայաստանի ներկայացուցչի չմասնակցելուն վերաբերող հարցին։

Լրագրողի հստակեցնող հարցին, թե արդյո՞ք տեղի ունեցած  դեպքերին ՀԱՊԿ–ն համարժեք գնահատական տվել է, Սարգսյանն արձագանքեց․ «Երբ դաշնակիցն առաջարկում է ու դու ասում ես՝ ոչ, ի՞նչ անի դաշնակիցը, գա՞ խնդրի։ Երբեք մեր դաշնակիցներին արդարացնելու ցանկություն չունեմ,եթե կուզեք՝ ավելի մեծ խնդիրների մասին կարող եմ խոսել, բայց դրա սկզբնապատճառն է պետք պարզել։ Բա ինչո՞ւ էր 30 տարի այդ դաշնակիցն իր պարտականությունները կատարում , որովհետև մենք աշխատելու ձևը գիտեինք, մենք համարում էինք իրական դաշնակից»։