Անհաջողության «ջենտլմենները»

Թվում է` Բագրատ սրբազանի շարժումը դեռեւս արդյունքներ չի գրանցում եւ թուլացել է, բայց սա ընդամենն արտաքին շիրման է: Եվ որքան էլ իշխանությունը իմիտացիա է ստեղծում, թե իրենց շարքերում արշալույսները խաղաղ են, ակնհայտ է, որ առկա ջղաձգումները վերածվում են հիստերիկ նոպաների: Մինչեւ անգամ բանը հասավ նրան, որ ոստիկանության ձեռքերը հասան հոգեւորական քաշքշելուն, սարկավագներին բերման ենթարկելուն ու ականջներին հայհոյանքներ հնչեցնելուն: Բայց, միեւնույնն է, փաստն այն է, որ իրավիճակի տերը Սրբազանի շարժումն է, որը թեպետ դանդաղում է իր քայլերում, բայց դրանից գործողությունների պատրաստ ակտիվի քանակը չի պակասում: Իսկ թե Նիկոլ Փաշինյանը որտեղ եւ ինչպես հանդես գա, թելադրվում է շարժման օրվա տրամադրությամբ: Անգամ նախապես պլանավորված պաշտոնական այցերն են մի քանի անգամ փոփոխվում, որ հանկարծ Նիկոլ Փաշինյանը չառերեսվի Բագրատ սրբազանի շարժման հետ: Եվ ինչքան էլ Նիկոլ Փաշինյանը գաղտագողի հեծանիվ քշի հեծանվորդի օրվա կապակցությամբ` փորձելով տպավորություն թողնել, թե իրավիճակն առաջվանն է մնացել, ՔՊ-ական «ջեմտլմենները» զգում են, որ վերջանականապես անհաջողության մատնվելն այլեւս սարերի հետեւում չէ:

ԳԼԽԱՎՈՐ ԴԱՏԱԽԱԶՈՒԹՅԱՆ ԱՊՏԱԿԸ ՆԻԿՈԼ ՓԱՇԻՆՅԱՆԻՆ

Այն, որ իշխանական «ջենտլմենները» անհաջողության են մատնվել, վկայում է նաեւ ՀՀ գլխավոր դատախազության պաշտոնական հերքումը` Բագրատ սրբազանի գործակալ լինելու մասին իշխանական շրջանակների կողմից շրջանառության մեջ դրված լուրերի վերաբերյալ: Պարզվում է` իշխանական մի լրագրողի հայտարությունը, թե` Բագրատ սրբազանը «ԿԿԲ» գործակալ է, միլիոնավոր դոլարներ է ստացել Կրեմլից», շուրջ մեկ ամիս ստուգման առարկա է դարձել, սակայն արքեպիսկոպոսի դեմ ոչինչ չեն հայտնաբերել։ Ըստ էության, սրանով արդեն դե յուրե հաստատվում է, որ տվայտանքների մեջ հայտնված իշխանամերձ շրջանակների միակ զենքն ընդդեմ Բագրատ սրբազանի` մնացել է զրպարտությունը, այն էլ «փուստ է» կրակում: Սա հատկանշական է այն առումով, որ վերջին տարիներին հաճախ շրջառվել է իշխանական այս կամ այն բարձրաստիճան պաշտոնյայի գործակալ լինելու մասին լուրեր, սակայն դրանք այսպիսի ուղիղ եւ ջանասիրաբար երբեւէ չեն հերքվել: Տպավորություն է, որ ուժային եւ իրավապահ մարմինների վերին օղակներում կամաց-կամաց հրաժեշտ են տալիս Նիկոլ Փաշինյանի իշխանությանը եւ փորձում են հնարավորինս չթաթախվել այնպիսի մեղքերի մեջ, որոնց համար վաղը պատասխան են տալու ոչ միայն դատարանում, այլեւ` Աստծո դատաստանի առաջ:

ՄՈՏԵՆՈՒՄ Է ՍՐԲԱԶԱՆԻ ՇԱՐԺՄԱՆ ՎԵՐՋԻՆ ԱՐԱՐԸ

Իսկ ո՞ւր են տանում Բագրատ սրբազանի շարժման քայլերը, թերեւս շարունակում է մնալ ամենակարեւորն ու սպասվածը: Բագրատ սրբազանը հայտարարեց, որ առաջիկա օրերին կհայտարարեն մեծ հանրահավաքի մասին, որը հավանաբար կլինի նաեւ ճշմարտության հաղթանակի վերջնական կնքումը մեր երկրում: Իսկ մինչ այդ, հրապարակում վարչապետի թեկնածու առաջադրված Բագրատ սրբազանը պատրաստվում է այցելել եւս 1-2 քաղաք: Ինչո՞ւ ոչ րոպե առաջ տեղի չի ունենում հանրահավաքը, որը կարող է վերջակետ դնել ստեղծված իրավիճակին, տարբեր վարկածներ կան: Խնդիրն այն է, որ շատ հարցերի պատասխաններ մինչեւ այժմ էլ չկան: Բագրատ սրբազանն ասում է. «Եկեք արտահերթ ընտրություններին չանդրադառնանք, դրա մասին չխոսենք: Ժամանակին կանդրադառնանք այդ թեմային»: Մինչդեռ մի շարք քաղաքական ուժերի օրակարգն այլ է` եթե հեռացնել Նիկոլ Փաշինյանին, ապա արդեն հստակեցնել, թե երբ են տեղի ունենալու արտահերթ ընտրությունները: Այլապես` միայն Նիկոլ Փաշինյանին հեռացնել, դեռ չի նշանակում վերջ դնել ՔՊ-ական իշխանությանը` իր խորհրդարանական մեծամասնությամբ հանդերձ: Իսկ այս դեպքում` արդյո՞ք Բագրատ արքեպիսկոպոսը կհամաձայնի «Սրբազան դաշինք» կազմել եւ գնալ արտահերթ ընտրությունների, այլեւս ոչ թե լինելով անցումային կառավարության ղեկավար, այլ` առաջիկա 5 տարիների համար երկրի ղեկավար:

ԻՆՉՈՒ Է ԱՂՄԿՈՒՄ ԷԴՄՈՆ ՄԱՐՈՒՔՅԱՆԸ

Եվ մինչ Բագրատ սրբազանը հնարավորինս խուսափում է անդրադառնալ քաղաքական դասավորումներին եւ վերադասավորումներին, ակտիվացել է Նիկոլ Փաշինյանի հատուկ հանձնարարություններով նախկին դեսպան Էդմոն Մարուքյանը: ԼՀԿ նախագահ Մարուքյանը երկրորդ եւ երրորդ նախագահներին առաջարկում է իրենց հետ ասոցացվող անձանց հետ միասին լքել քաղաքական դաշտը: Այո՛, լոռեցու «շուստրիությամբ» նա էլ, կարծես թե, հող է նախապատրաստում, համենայնդեպս, թվացյալ նախկին նիկոլականների համար իշխանության գալու: Այս առումով ուշագրավ դիտարկում է արել քաղաքագետ Ռոբերտ Մարգարյանը` մի քանի թիվ մեջբերելով. «Վերջին ընտրություններում ընդամենը 15 հազար ձայն ստացած Նիկոլի էդմոնը շուրջ 270 հազար ձայն ստացած Ռոբերտ Քոչարյանին ու 66 հազար ձայն ստացած Սերժ Սարգսյանին ասում է` ժողովուրդը ձեզ չի սիրում, իսկ Սրբազանից պահանջում է նրանց հեռացնել, որը ինքը գա կանգնի սրբազանի կողքին»։ Մարուքյանական «մտքի գոհարներին» անդրադարձել է նաեւ անձամբ Բագրատ սրբազանը` անկեղծանալով, որ Էդմոն Մարուքյանի հետ հանդիպել է ուշ գիշերային ժամի եւ պայմանավորվել հետո նորից հանդիպել, սակայն ոչ մի մանրամասնությունների մասին չեն խոսել: Իսկ հարցին, թե ինչպես է ինքը դիտարկում նրա առաջարկությունը, Սրբազանը պատասխանել է. «Անկեղծ ասած, չեմ էլ հիշում՝ ինչ ենք խոսել, ողջունել ենք, բարեւել ենք, ասել ենք, որ հստակ էս մարդը պետք է հեռանա, ասել են` այո՛, համաձայն ենք, համախոհ ենք: Իրենց կուսակցությունը` «Լուսավոր Հայաստանը» ներկա է եղել: Դրանից հետո ինչ զարգացումներ են եղել, արդեն անպայմանորեն ոչ ինձ հետ»: Սրանով շարժման առաջնորդն անուղղակիորեն վերահաստատում է, որ ոչ մեկի քաղաքական խաղի մեջ չի ներգրավվելու եւ շարժվելու է այն օրակարգով, որով ի սկզբանե առաջնորդվում է:

ԻՍԿ ՆԻԿՈԼ ՓԱՇԻՆՅԱՆԸ ՉԻ ՇՏԱՊՈՒՄ ՀԵՌԱՆԱԼ

Հատկանշական է, որ Նիկոլ Փաշինյանի աթոռը թեպետ արդեն վաղուց ճռճռում է, բայց դեռ չի հրաժարվում իրենից: Համենայնդեպս, նա ծննդյան առթիվ հետախոսազրույցներ է ունեցել ՌԴ նախագահ Վլադիմիր Պուտինի, վարչապետ Միխայիլ Միշուստինի, Ֆրանսիայի նախագահ Էմանուել Մակրոնի հետ: Նա անգամ շնորհավորական ուղերձ է ստացել Բելառուսի նախագահ Ալեքսանդր Լուկաշենկոյից, ում ընդամենը վերջերս ԱԺ ամբիոնից մեղադրում էր 44-օրյա պատերազմում Հայաստանի դեմ գործելու մեջ: Առնվազն քանի դեռ Նիկոլ Փաշինյանն Արեւմուտքի եւ Ռուսաստանի միջեւ դե ֆակտո կոնսեսուսով` ՌԴ գլխավոր շտաբի ԽՍՀՄ քարտեզներով սահմանագծում եւ սահմանազատում է ՀՀ սահմանները, չի բացառվում, որ նրան հանդուրժեն: Չէ որ, որքան էլ դառն է ՀՀ քաղաքացիներիս համար, այս գործընթացը ողջունվել է արտաքին բոլոր խաղացողների կողմից, եւ մինչեւ այս պահը միջազգային հանրության համար ընկալելի որեւէ այլ առաջարկ չի հնչել: Ցավոք, պարզ չէ, թե ինչ այլընտրանք է առաջարկում այս հարցում Բագրատ սրբազանի շարժումը, էլ չասենք` խորհրդարանական ընդդիմության մասին, ուր մնաց թե դրա հետ համաձայնի Ադրբեջանը: Սա է մնացել Նիկոլ Փաշինյանի վերջին փրկօղակը` դրոշակ սարքել այլ լուծման բացակայությունն ու այն փակուղին, որի մեջ դրել է երկիրը: Իհարկե, ամեն ինչ կարող է փոխվել, երբ սրվի հարցը, թե ում վերահսկողության տակ պետք է մնա Ադրբեջանի եւ Նախիջեւանի միջեւ տրանսպորտային հաղորդակցության վերահսկողությունը, որը, ըստ 2020 թվականի նոյեմբերի 9-ի համաձայնագրի, նախատեսում է, որ այնտեղ պետք է կանգնեն Ռուսաստանի սահմանապահ ծառայության մարմինները: Այստեղ է, որ` լինի Նիկոլ Փաշինյանը, թե` Բագրատ սրբազանը, պետք է ընտրություն կատարեն աշխարհաքաղաքական բեւեռների միջեւ:

ՀՐԱՆՏ ՍԱՐԱՖՅԱՆ