Ինչ են քննարկել ԱԺԲ-ականները Բագրատ սրբազանի հետ

Բագրատ սրբազանը ազդարարեց քաղաքական ուժերի հետ խորհրդակցություններ սկսելու մասին, բայց հրապարակվեց լուսանկար միայն ԱԺԲ-ականների հետ նրա հանդիպումից, այլ ուժերի հետ հանդիպում եղե՞լ է, հայտնի չէ: Այս մասին «Իրավունք»-ը զրուցել է ԱԺԲ-ի` Ազգային ժողովրդական բեւեռի համահիմնադիր, Կանադայում ՀՀ նախկին դեսպան, «Մոդուս վիվենդի» կենտրոնի ղեկավար ԱՐԱ ՊԱՊՅԱՆԻ հետ:

— Բագրատ սրբազանի հետ հանդիպման ժամանակ քննարկե՞լ եք արտաքին քաղաքականության վերաբերյալ հարցեր:

— Քննարկել ենք բոլոր ոլորտներին վերաբերող հարցեր, այդ թվում՝ նաեւ արտաքին քաղաքական: Մեզ մոտ, քանի որ փակ հանդիպում էր՝ մանրամասներին չեմ կարող անդրադառնալ:

— Այդուհանդերձ, Դուք միշտ կողմնակից եք եղել, որ Հայաստանն իր արտաքին քաղաքական վեկտորը փոխի դեպի Միացյալ Նահանգներ, որքանո՞վ է համակարծիք Բագրատ սրբազանն այս հարցում:

— Բագրատ սրբազանն իրատես քաղաքական գործիչ է: Պետք է նշեմ, որ ինքը չի որոշելու Հայաստանի արտաքին քաղաքականությունը: Այս շարժման նպատակն է` արտահերթ եւ արդար ընտրություններին առիթ տալ: Ժողովուրդն արդեն քաղաքական ուժի միջոցով պետք է արտոնյալ քաղաքականությունը որոշի: Բագրատ սրբազանը, բնականաբար, կողմնակից է Հայաստանի առանց հակաների քաղաքականության (դրանք, ի դեպ, իր բառերն են, նա ինքն է բարձրաձայնել այդ մասին), բայց ինքն, իհարկե, բոլորի հետ լավ հարաբերություններ ունի: Անձամբ ես դրան չեմ հավատում, բայց իր տեսակետն է: Այսինքն, ինքը նոր է ուզում անցնել դրա միջով, ինչով մենք արդեն անցել ենք: Այսպես ասած` թող փորձի, Աստված իր հետ, բայց Բագրատ սրբազանը հասկանում է Արեւմուտքի կարեւորությունը, հասկանում է նաեւ այսօր աշխարհում տեղի ունեցող երեւույթները:

— Արեւմտամետ քաղաքական ուժերի ղեկավարներ Արամ Սարգսյանը, Լեւոն Շիրինյանը, Տիգրան Խզմալյանը եւ Արման Բաբաջանյանը միավորվել են, եւ առաջարկում են հանրաքվե անցկացնել, որպեսզի Հայաստանը մտնի Եվրամիություն, ԱԺԲ-ն ինչո՞ւ չի միացել, դե՞մ եք:

— Ո՛չ, նախ մենք դեմ չենք: Առաջինն ինքներս մշտապես հանդես ենք եկել Արեւմուտքի հետ սերտ հարաբերություններով, դա լինի Եվրամիություն, թե` Միացյալ Նահանգներ: Երկրորդ՝ իրենք մեզ նման առաջարկով հանդես չեն եկել եւ երրորդ` կարծում եմ, որ դա ավելի շատ արված է այս իշխանությունների համար հնարավորություն տալու, որպեսզի ցույց տան իբրեւ թե արեւմտամետ են, քանի որ նշված բոլոր մարդիկ իբր արեւմտամետների կատեգորիայի մեջ են մտնում: Այն, որ Դուք ասացիք` արեւմտամետ ուժեր, ես ինքս դա չէի օգտագործի, որովհետեւ որպես կանոն՝ դրանք անհատ անձ, կուսակցություններ են: Ուզում են այդպես ցույց տալ, որպեսզի ասեն` տեսեք, իշխանությունը ինքը արեւմտամետ է՝ ժողովրդին ցույց տալու համար: Սակայն, քանի որ վախենում են Ռուսաստանից, փորձում են Ռուսաստանին ասել, որ տեսեք` սա ոչ թե Նիկոլ Փաշինյանն է անում, այլ ժողովրդի կամքն է կատարում: Թվարկված անունների դերակատարությունը միշտ եղել է փափուկ բարձ պատրաստել՝ Նիկոլ Փաշինյանի համար տարբեր հարցերում: Դա էլ հենց այդ հարցերից մեկն է:

— Իսկ Դուք ի՞նչ դիրքորոշում ունեք այն մասին, որ Նիկոլ Փաշինյանն ասում է, թե ՀԱՊԿ-ից դուրս պետք է գանք:

— Գիտեք, սա առաջին նման ելույթը չէ: Արդեն գրեթե մեկ տարի է տարբեր հարցազրույցներում եւ ելույթներում ինքը ՀԱՊԿ-ին փնովում է, եւ պետք է ասեմ, որ արդարացիորեն է, քանի որ ՀԱՊԿ-ի դերակատարությունը չեղավ եւ մեր առաջարկը եղել է այն, որ, եթե դուրս ես գալիս, դուրս արի: Դրա համար պետք չէ հայտարարել: Այսինքն, սիրուն գրում ես համապատասխան դիմումը եւ, ըստ ընթացակարգի, հանձնում ես: Ինչպես ՀԱՊԿ-ի քարտուղարությունն ասաց, Հայաստանը ՀԱՊԿ-ի անդամ է, նշեց, որ Հայաստանից որեւէ դիմում չենք ստացել: Հիմա ամեն անգամ ասում է, թե մենք ուզում ենք դուրս գալ, մենք դուրս ենք գալու եւ այլն: Բացի մեզ վրա իզուր տեղը Ռուսաստանի եւ Բելառուսի նման երկրների «հաչոցը կապելուց»՝ ուրիշ այլ բան չենք շահում: Ուզո՞ւմ է դուրս գալ, դիմում գրեք տվեք դիմումը համապատասխան ընթացքով 6 ամիս հետո դուրս եկեք: Պետք չէ այլեւս զուր տեղը հայտարարություններ անել:

— Ձեզ համար պա՞րզ է, թե սահմանագծման եւ սահմանազատման, ՀԱՊԿ-ի հետ կապված Բագրատ սրբազանի շարժման դիրքորոշումը ո՞րն է:

— Ինձ պարզ չէ, քանի որ այդ հարցը չի քննարկվել, բայց նորից եմ կրկնում, որ սխալ են պատկերացումները: Սա ընտրապայքարի շարժում չէ, սա կուսակցություն չէ, որտեղ մարդիկ պետք է տեսակետներ ունենան՝ ինչ-որ կարեւորագույն հարցերի շուրջ: Այս ամբողջ խնդիրը, որը սկսել է սահմանազատման դեմ անօրինական լինելուց` հանգեցրել է Նիկոլի հրաժարականի պահանջի: Այս ամբողջ խնդիրն է՝ հնարավորություն տալ ժողովրդին, որպեսզի ազատ ընտրությունների միջոցով հստակորեն ձեւավորի իր իշխանությունը: Այսինքն, ուզում է մնալ ՀԱՊԿ-ի մեջ, թե՞ դուրս գալ, որովհետեւ, թե ի՞նչ տեսակետ ունի սրբազանը այս հարցի վերաբերյալ, կարծում եմ` բնական է: Մարդը երբեք չի վերցրել իր վրա նման պարտականություն, ինքը չի ասել, որ ես պետք է որոշեմ, թե որն ինչ պետք է լինի: Ինքը շատ պարզ է ասում, որ Նիկոլ Փաշինյանն ինչը, որ անում է՝ անում է անօրինական, քանի որ օրենք է խախտում եւ իրավունք չունի դա անելու: Նա սահմանադրություն է խախտում եւ գործում է իր իսկ խոստումների դեմ: Հետեւաբար, Նիկոլ Փաշինյանը չունի որեւէ իրավական, բարոյական իրավունք իշխանության մնալու եւ պետք է հրաժարական տա, ու ժողովուրդն էլ արդեն պետք է որոշի՝ ի՞նչ է անելու ապագայում: Իմ կարծիքով` այդ թվում նաեւ Նիկոլ Փաշինյանը, ով ուզում է ցույց տալ, որ ժողովուրդը ընտրում է ինձ՝ էլի թող գնա այսօրվա քաղաքականության խոստումներով եւ քվե ստանա: Ընդհանրապես ընդունված բան է չէ՞, որ կոչվում է վստահության հերթական մանդատ ստանալ: Երբ որ դու Կառավարության ծրագիրը ունես, հետո իրավիճակ է փոխվում եւ պետք է անես այնպիսի բան, որի համար դու մանդատ չես ստացել, այսինքն` չի քվեարկել ժողովուրդը, դու մեկ անգամ եւս այդ հարցը բարձրացնում ես եւ ստանում ես համապատասխան լիազորություն ժողովրդի կողմից: Այն քվեն, որը Նիկոլ Փաշինյանին ժողովուրդը տվել է, երբ համեմատում ենք այսօրվա քաղաքականության հետ՝ դրանք տրամագծորեն հակառակ բաներ են: Դու ինչպե՞ս կարող ես ստանալ քվե մի բանի համար եւ անել մեկ այլ բան: Բագրատ սրբազանը եւս նշել է, որ դա անօրինական սահմանազատում է: Նիկոլ Փաշինյանն ո՞վ է, որ որոշի, թե որտեղո՞վ է սահմանն անցնում: Սովետական վարչական սահմաններն իր որոշելիքը չէ, որ ինքը նշում է, թե` 2001 թվականի պետական սահմանի մասին օրենքն ասում է, որ դա որոշվում է միջազգային պայմանագրով: Այսինքն, պետք է ստորագրեր փաստաթուղթ` պայմանագիր Ադրբեջանի հետ, որի մեջ կամրագրվեր, որ վարչական գծերը պետական սահմաններ են եւ այլն, դրա հիման վրա նաեւ կընդունվեր օրենք, ու դրանից հետո մյուս գործողություները կարվեին: Այսինքն, առանց իրավական հիմք ստեղծելու՝ գնում են ինչ-որ սյուներ եմ խփում, իսկ ինչի՞ հիման վրա են այդ սյուները խփվում, այդ ո՞վ է իրենց այդ իրավունքը տվել: Ո՞վ է ընդհանրապես Նիկոլ Փաշինյանին իրավունք տվել ասելու, որ վարչական սահմանները՝ դրանք պետական սահմաններն են: Այդպես չէ՛: Դրա համար՝ որպես ժողովրդավար երկիր եւ որպես օրենքի երկիր` մենք պետք է գնանք` ըստ մեր իսկ օրենքի նախատեսած ճանապարհով:

ԴԻԱՆԱ ՄԱՆՈՒԿՅԱՆ