Օլիմպիադայի բացումը պատռեց բոլոր եվրադիմակները

Կիպրոսի ԱԳ նախարարի հետ համատեղ ասուլիսի ժամանակ ՀՀ արտգործնախարար Արարատ Միրզոյանը հայտարարեց, որ Հայաստանը ներկայում անցնում է Եվրամիության հետ հարաբերությունների էական խորացման գործընթաց։ Ըստ նրա. «Վիզաների ազատականացման շուրջ երկխոսության մեկնարկը եւ Խաղաղության եվրոպական գործիքի ներքո Հայաստանին աջակցություն տրամադրելու որոշումներն ավելի մեծ համագործակցության, ավելի մեծ պատկերի միայն երկու օրինակն են։ Ունենք գործընկերության նոր օրակարգ, մենք մտածում եւ աշխատում ենք նոր մեխանիզմների եւ գործիքների շուրջ, որոնք կարող են օգտագործվել»:

Ոգեւորված ԱԺ նախագահ Ալեն Սիմոնյանից ու ԱԽՔ Արմեն Գրիգորյանից էլ ավելի արեւմտամետ երեւալու ցանկությամբ՝ Միրզոյանը նաեւ ավելացրել է. «Հայաստանի ժողովուրդը, մենք ունենք եվրոպական ձգտումներ, եւ ԵՄ-ն ճանաչում է այդ ձգտումները, ուստի՝ հիմա մենք միասին մտածում եւ աշխատում ենք, ինչպես ասացի, նոր գործիքների, Հայաստանը ԵՄ-ին ու անդամ երկրներին եւ հակառակն ավելի մոտեցնելու նոր մեխանիզմների շուրջ։ Կցանկանայի նաեւ կրկնել այն արտահայտությունը, որը ՀՀ վարչապետն ասաց Եվրոպական խորհրդարանում իր ելույթում. «Հայաստանն իր կողմից պատրաստ է ԵՄ-ին մոտենալ այնքան, որքան ԵՄ-ն դա հնարավոր կհամարի»,- նշել է նա։ Ինչ խոսք, Փարիզում Օլիմպիական խաղերի բացման արարողությունը՝ իր կեսամերկ տրանսգենդերներով հանդերձ, ցույց տվեց, որ ԵՄ-ին մոտենալուց, ինչպես ասում են, համ էլ պետք է զգույշ լինել: Այո, թերեւս այլասերության այդ քարոզն ու քրիստոնեության հանդեպ ծաղրը լավագույնս ցույց տվեց, թե ուր են մեզ փորձում տանել, ի՞նչ արժեքներ են փորձում սերմանել մատաղ սերնդին: Այդ սոդոմ-գոմորյան շոուն, թերեւս դարձավ լակմուսի թուղթ՝ հասկանալու համար, թե ովքեր եւ ինչպես արձագանքեցին դրան: Օրինակ` Եվրամիություն ձգտող քաղաքական ուժերից ամենաանկեղծը Եվրոպական կուսակցության նախագահ Տիգրան Խզմալյանն էր: Նա ուղիղ հայտարարում է, թե հիացած է այդ շոուից, իսկ ԱԺԲ-ից Արա Պապյանը ցուցադրված այլանդակության մեջ քրիստոնեության հանդեպ հեգնանք չի տեսնում: Բայց արի ու տես, որ անգամ Լեւոն Շիրինյանը չի գտնում արդարացում ու դրա փոխարեն՝ հարձակվում է հարց տվող լրագրողի վրա: Դե իսկ Արամ Զավենիչ Սարգսյանի «Հանրապետություն» խմբակցության ղեկավար Անի Խաչատրյանը ո՛չ տեսել է, ո՛չ լսել, թե ինչ է տեղի ունեցել Օլիմպիական խաղերի բացման արարողության ժամանակ: Համենայնդեպս, նա խուսանավեց պատասխանել այդ մասին «Իրավունքի» հարցերին:

ԵՐԲ ԹԱՍԻԲՆ ՈՒ ԱՐԺԱՆԱՊԱՏՎՈՒԹՅՈՒՆՆ ԷԼ ԵՆ ԱՐՁԱԿՈՒՐԴ ՄԵԿՆԵԼ

Թվում էր, թե առաջին քրիստոնյա երկրում, պետք է ցասումն ամենամեծը լիներ տեղի ունեցածի վերաբերյալ: Բայց արձանագրենք, որ մինչ այս պահը միայն ՍԻՄ կուսակցության նախագահ, «Ուժեղ Հայաստան Ռուսաստանի հետ. հանուն նոր Միության» շարժման համակարգող Հայկ Բաբուխանյանն է առաջարկել, որ Հայաստանի հավաքականը հրաժարվի այդպիսի պիղծ մթնոլորտում իր մասնակցությունից: Նկատեցինք նաեւ «Հայոց ազգային գվարդիայի» հիմնադիր Արշակ Զաքարյանի խիստ դիտարկումը. «Առաջինը պետականորեն քրիստոնեությունն ընդունած երկիրն օրենքով պետք է հենց առաջինը բողոքեր ու լքեր «օլիմպիդռական» խաղերը։ Եվ եթե, իհարկե, թասիբ ու արժանապատվություն թողած լինեին երկիրն իրենց մակարդակին այլասերած տրանսիշխանությունները։ Նման ակցիան աշխարհին կհիշեցներ, որ կա նման պետություն՝ հինավուրց ու քրիստոնյա եւ որ 6 տարի առաջ այդ երկիր գործուղած իրենց նեռի ճուտը այն դեռ չի վերացրել…»: Ա. Զաքարյանը մեր մարզիկներին հիշեցնում է. «Քրիստոնյա սպորտսմեններ, Աստվածաշնչում չի գրած, որ «եթե մեկը խփում է աջ այտիդ, քամակդ դեմ տուր», բոյկոտե՛ք օլիմպիդռադիան… Փարիզում օլիպիդռադայի բացումը, փաստորեն, միայն Հայաստանի տռանսիշխանությանն ու դրանց երկնագույնապագուներին է դուր եկել» :

Ի դեպ, մենք դեռ համառորեն սպասում ենք Մայր Աթոռ Սուրբ Էջմիածնի շատ հստակ արձագանքին, որը մինչ առ այս պահը չկա: Միայն Կ. Պոլսի հայոց պատրիարք Գերշնորհ Տ. Սահակ արքեպիսկոպոս Մաշալյանն է դեռեւս այդքան համարձակություն գտել իր մեջ ու հայտարարել. «Երբ Քրիսոսին հայհոյում են ու ծաղրում, քո դիրքորոշումն ի՞նչ է: Ես` որպես պատրիարք, չեմ դիտելու Օլիմպիադայի խաղերը, չպետք է ուրախանամ, եթե նույնիսկ հայերը ոսկե մեդալ շահեն… Սա աշխարհին խաղաղություն բերող մրցություն չէ: Ամեն ինչ անում են քրիստոնեության եւ քրստոնյաների դեմ, ու քրիստոնյաները լուռ են: Ձայն անգամ չեն հանում: Հանուն Աստծո, ձա՛յն հանեք: Ես` որպես պատրիարք, Օլիմպիադայի կազմկոմիտեին բողոքի նամակ եմ գրելու: Աշխարհում հազարումի կրոն կա, ինչո՞ւ են քրիստոնեությունը ծաղրում: Այսինքն՝ հինդուիզմի մեջ ծաղրելի բան չկա՞, չեն կարող ծաղրել, իսկ քրիստոնյաներից չեն վախենում: Քրիստոնյաները ձայն չունեն, համակերված են… Առաջարկում եմ իմ բոլոր եղբայրներին եւ քույրերին բոյկոտել օլիմպիադան՝ հանուն Քրիստոսի: Ինչպես Վարդանանց հերոսները՝ վասն Հիսուսի եւ վասն հայրենյաց իջան մահվան դաշտ, մենք էլ պետք է բոյկոտենք եւ իմանանք ինչու ենք բոյկոտում՝ Քրիստոսի սիրո համար: Առաջին քրիստոնյա ազգն այսպես պետք է վարվի»: Զարմանալիորեն այս խոսքերից հետո՝ լռում է նաեւ «Տավուշը հանուն հայրենիքից» «Սրբազան պայքար»-ի վերանվանված շարժումը: Առնվազն իրենց պաշտոնական էջում չկա գեթ մեկ արձագանք Օլիմպիական խաղերի ժամանակ տեղի ունեցածին: Ու սա այն դեպքում՝ երբ Միացյալ Նահանգների կարկառուն դեմքերից մինչեւ եվրոպական երկրների ղեկավարներ են արձագանքել ու իրենց վրդոմունքն արտահայտել: Լռում են անգամ իբրեւ ազգային դիրքերից հանդես եկող մի շարք հայտնի քաղաքական ուժեր, թե ինչն է նրանց այդպես կաշկանդում մի ծպտում հանել, ոչ պակաս անհասկանալի է:

ԻՍԿ ԵՐԲ ԵՆ ԵՄ ՁԳՏՈՂՆԵՐՆ ԻՐԵՆՑ ՊԱՀԵԼՈՒ ԵՎՐՈՊԱՎԱՅԵԼ

Ինչեւէ, վերադառնանք Եվրամիություն ձգտող ուժերին: Նրանց եվրախաբկանքն այլեւս թաքցնել չի լինում: Փաստորեն, նրանք ամեն կերպ փորձում են հենց Օլիմպիադայում ի ցույց դրված պղծություններն ընդունելի դարձնել մեր հանրության համար: Մինչդեռ այլ հարցերում, օրինակ` ժողովրդավարություն, հանդուրժողականություն եւ այլն, թքած ունեն: Վառ օրինակ այն, թե Երեւանի քաղաքային իշխանության մաս կազմող Արամ Զավենիչի կուսակցությունը, որի ղեկավարած քաղաքում ամեն օր տեղի են ունենում սպանություններ, իսկ ուղղակի կրակոցները հասել են «բեսպրիդելի»: Ավելին՝ արդեն մի վրաերթի հետեւանքով ամբողջ ընտանիքներ են կոտորվում: Դե իսկ եվրոպական տրանսպորտի, աղբահանության մակարդակի մասին, էլ չխոսենք:

Ի դեպ, խոսելու մասին. ժողովրդավարության բաստիոն դառնալու մասին խոսող իշխանությունը, որն իր գրպանային ուժերով փորձում է նետվել Եվրամիության գիրկը, այն կարգի «ժողովրդավար» է, որ «Ազգային դիմակայունության հայկական ինստիտուտի» տնօրեն, քաղաքագետ Գեւորգ Մելիքյանը տեղեկացնում է. «2016-ից Հայաստանի Հանրային ռադիոյի ուղիղ եթեր մտած իմ հեղինակային «Ստատուս քվո» քաղաքական-վերլուծական հաղորդումը Հանրային հեռարձակողի խորհուրդը փակել է՝ գործող իշխանության քաղաքականությունը քննադատելու պատճառով»: Ավելին՝ օրերս տեղի ունեցած Հանրային ռադիոյի տնօրենի մրցույթն այնպիսի խայտառակ զարգացում ունեցավ՝ մինչեւ իշխանության քիմքին հարիր թեկնածու գտան, որին ընտրելու անվան տակ նշանակեցին այդ պաշտոնին: Եթե կարծում եք, թե միայն քաղաքական կոնտեքստում է Եվրոպա գոռացողների քայլերը, այսպես ասած, հակաեվրոպական, ապա չարաչար սխալվում եք: Նույնպիսի արժեքային անկում է մշակույթում. փաստն այն է, որ տասնամյակներում մի պատշգամբ չկարողացան վերանորոգել, եւ արդյունքում Գյումրիում փլուզվեց պատմշակութային հուշարձան համարվող շենքի հայտնի «Վառեմ-մարեմի» պատշգամբը: Իսկ տարիներով մի ծակ տանիք չեն կարողանում վերանորոգել: Ո՛չ ավել, ո՛չ պակաս կաթում է Օպերային շենքի տանիքը: Ստացվում է, որ եթե սեփական երկրում չեք կարողանում քաղաքակիրթ ու ժողովրդավար լինել, ձեզ Եվրամիությունն էլ չի օգնի, ինչպես սեւին՝ սապոնը:

ՀՐԱՆՏ ՍԱՐԱՖՅԱՆ