Նախընտրական «Կանեփ-կակաչ» օպերացիա

Վերջապես ՔՊ-ական պաշտոնյաների մեջ գտնվեց մի «դրական» բան: Ըստ մամուլում տեղ գտած տեղեկատվության` «Քաղաքացիական պայմանագիր» կուսակցության վարչության թեժ նիստի ընթացքում Գյումրիում ստեղծված անիշխանության իրավիճակն է քննարկվել, եւ Նիկոլ Փաշինյանը անակնկալ կերպով նիստին ներկա ՔՊ խմբակցության պատգամավոր, Գյումրու քաղաքապետի հավանական թեկնածու Կարեն Սարուխանյանին թմրանյութի թեստ հանձնելու է ուղարկել՝ իր համար վստահելի բժշկի եւ իր անվտանգության աշխատակցի ուղեկցությամբ։

Համաձայն նույն տեղեկությունների՝ Սարուխանյանի հետազոտության արդյունքները ո՛չ ավել, ո՛չ պակաս դրական պատասխան են ցույց տվել, այսինքն՝ արյան մեջ եղել է թմրանյութի առկայություն։ Բա ի՞նչ էիք կարծում, ուրիշ էլ ի՞նչ դրական բան կարող էր գտնվել Փաշինյանի կադրի արյան մեջ:

Ի դեպ, ըստ շրջանառվող  շշուկների, Փաշինյան Նիկոլը որոշել է շարունակել «Կանեփ-կակաչ» սեփական օպերացիան ու հերթով անալիզ տալու ուղարկել յուր այլ կադրերին եւս: Միայն տարօրինակ է, որ իրենից չի սկսում, դե ի՞նչ իմանաս, թե ինչ կպարզվի իր դեպքում:

Ինչեւէ, այն, որ ՔՊ-ում թմրանյութերի հանդեպ սերը գերազանցում է Նիկոլ Փաշինյանի հանդեպ հավատարմությանը, առնվազն իշխանական կուլիսներում նորություն չէ: Ավելին՝ ԶԼՄ-ներում կան ակնարկներ, թե ԱԺ պաշտպանության եւ անվտանգության հարցերի մշտական հանձնաժողովի նախագահ Անդրանիկ Քոչարյանը պատգամավորներ երկրի թիվ մեկ աներձագ Հրաչ Հակոբյանի ու Սիսակ Գաբրիելյանի հասցեին ոչ հրապարակային ասել է «դեղ ցրողներ», «նարկոբարոններ», ինչի համար էլ կանչվել է ՔՊ վարչություն՝ պատասխան տալու: Եվ այստեղ ամենասյուռն այն է, որ չնայած «գորգի վրա» հայտարարել է, թե՝ ապացուցեք, որ նման բան եմ ասել, սակայն ակնարկել է, որ այնպես չէ, թե թիմին խորթ երեւույթ է թմրամոլությունը, եւ խոսքում ասել է, որ պետք է հետաքրքրվել, ու ամեն ինչ կպարզվի։

ԻՆՉ  ԵՂԱՎ ԱՌԳՐԱՎՎԱԾ ԿՈԿՈԱՅԻՆԻՑ 212 ԿԳ-Ը

Ընդհանրապես, արժանահավատ չէ, որ ՔՊ-ում կարող են իրար մեջ հարցուպատասխան ունենալ՝ թմրանյութ օգտագործել-չօգտագործելու հարցում՝ այն դեպքում, երբ նրանցից որեւէ մեկին չհուզեց, թե ինչ եղավ հայտնի առգրավված կոկայինից՝ շուրջ 212 կգ-ը:

Ասել ենք ու էլի հիշեցնենք: ՀՀ Ազգային անվտանգության ծառայության տնօրեն Արմեն Աբազյանը բոլորովին վերջերս խորհրդարանական լսումների ժամանակ անդրադարձավ 2023 թվականին հանրապետություն մոտ մեկ տոննա կոկաինի ներկրմանն առնչվող աղմկահարույց քրեական գործին: Ու ի՞նչ է պարզվում՝ կոկաինի ընդհանուր ծավալը ոչ թե մեկ տոննա է եղել, այլ՝ ըստ ԱԱԾ պետի, հետագայում հստակեցվել է, որ մոտ 788 կգ է. «Երբ նշված թմրանյութը հայտնվել է մեր մոտ, եղել է 42 արկղ, արկղերի կշիռը եղել է 20-25 կգ։ Մեր հաղորդագրության մեջ տրվել է մոտ մեկ տոննա։ Մեկ շաբաթ անց տրվել է փորձաքննության, եւ հստակ քաշը՝ 788 կգ-ի մասին է խոսքը։ Եվ այս պահին Քննչական կոմիտեում նախաքննությունը ընթանում է»: Ու ի՞նչ է ստացվում, եթե վերցնենք, որ յուրաքանչյուր արկղում եղել է նվազագույնը 20 կգ թմրանյութ, ուրեմն՝ ընդհանուր դառնում է 840 կգ, այլ ոչ թե՝ 788: Լավ, մի երկու կիլոգրամ այս կողմ, այն՝ կողմ, պլյուս-մինուս, դեռ ինչ-որ տեղ կարելի էր տրամաբանության մեջ տեղավորել, բայց ինչպե՞ս է ստացվում, որ ԱԱԾ-ի պես լուրջ կառույցը կարող էր սխալվել առնվազն 212 կգ-ով: Վերջիվերջո, որեւէ մեկն այս հարցի պատասխանը տալո՞ւ է, թե ով կամ ովքեր են մեջ-մեջ արել «ապրանք»-ը: Այլապես, ստացվում է՝ ոչ ոք ոչինչ չգիտի, բայց լավ էլ կայֆի տակ են: Էլ չասենք, որ անգամ Լուլուն՝ նույն ՔՊ-ական պատգամավոր Լուսինե Բադալյանն էր զարմացած, թե՝ 1 տոննա թմրանյութն ինչպե՞ս կարող էր անցնել Հայաստան:

Հիշո՞ւմ եք չէ համացանցը ցնցած Իտալիայում առգրավված 2,7 տոննա կոկաինի լուրը, որը Վրաստանի Բաթումի նավահանգստով պետք է տեղափոխվեր Հայաստան՝ բանանի արկղերի մեջ թաքցված։ Իսկ հետո ԱԱԾ-ն հաղորդագրություն տարածեց, որ կոկաինի շուրջ 1 տոննա խմբաքանակ Հայաստան են հասցրել, իսկ 2,7 տոննան առգրավվել է իտալացի իրավապահների կողմից։

ԻՍԿ Ի՞ՆՉ ԿԱ ԿԱՆԵՓԻ ԴԱՇՏԵՐԻՑ…

Նույնքան անհասկանալի է, թե Նիկոլ Փաշինյանն ինչո՞ւ է ընկել թմրանյութ օգտագործող իր ՔՊ-ականների հետեւից, երբ վերընտրվելուց հետո՝ հետպատերազմյան Հայաստանում առաջին օրինագծերից մեկը, որն ընդունեց իր կառավարությունը, այն որոշումն էր, որով նախատեսվում էր թույլատրել արտադրական կանեփի արտադրությունը, արտահանումը, ներմուծումը կամ մեծածախ առեւտուրը՝ համապատասխան լիցենզիայի առկայության դեպքում։ Իսկ երբ հարցն արդեն խորհրդարանում էր քննարկվում, ՔՊ-ական պատգամավոր Հայկ Ցիրունյանը խրոխտ հայտարարում էր, թե՝ կանեփ Հայաստանի ամբողջ տարածքում կա, ուստի՝ խնդրում է, որ այդ բույսի մասին խոսելիս չկիրառել թմրամիջոց բառը, ավելին՝ կանեփը շատ օգտակար բույս է։

Կամ մի՞թե Նիկոլ Փաշինյանը մոռացել է, թե ով է իր Ազգային ժողովի նախագահը՝ մարդ, ով մարիխուանայի օրինականացման ջատագովներից էր: Այդ Ալեն Սիմոնյանն էր, որ պնդում էր հետեւյալը. «Կարող է օրինականացվել, եւ կարծում եմ, որ ճիշտ է դա անել հնարավորինս սեղմ ժամկետներում»։ Ու այդ կարծիքին էր նա, իբրեւ ընդդիմադիր եւս, 2017 թվականին ասում էր, որ մարիխուանայի դեմ պայքարը անիմաստ եւ ժամանակատար զբաղմունք է, հետեւաբար այն պետք է օրինականացնել, բերել հարկային դաշտ ու հետեւել որակին, որպեսզի մարդիկ չթունավորվեն, չմեռնեն։

«Ես չգիտեմ մարդ, որը մարիխուանայի օգտագործումից մահացել է, բայց ես հազարավոր մարդիկ գիտեմ, որ մահացել են սիգարետի օգտագործումից։ Թոքի քաղցկեղի հիմնական պատճառը սիգարետն է։ Իսկ մարիխուանան թուլացնում է քաղցկեղի ուռուցքի աճը։ Այն բժիշկների կողմից ցուցված է նաեւ նյարդային համակարգի խնդիրներ ունեցող մարդկանց։ Իսկ մենք, չգիտես ինչու, դրել ու պայքարում ենք մի բանի դեմ, որի դեմ պայքարն անիմաստ է»,- ասում էր Ալեն Սիմոնյանը:

ՈՒՄ ՎՐԱ Է ՀՈՒՅՍ ԴՐԵԼ ՆԻԿՈԼ ՓԱՇԻՆՅԱՆԸ

ՔՊ-ում առհասարակ, այս հարցում լուռ կոնսենսուս կա: Քանի որ անդրադարձանք հեռավոր 2017 թվականին, չմոռանանք նաեւ ԱԺ իշխող «Քաղաքացիական պայմանագիր» խմբակցության քարտուղար Արթուր Հովհաննիսյանին: Ժամանակին մամուլը գրել էր, որ վերջինս եղել է բերման ենթարկված, քանի որ իր ու ընկերոջ մոտից խուզարկությամբ հայտնաբերվել էր 0.24 գրամ կշռով դեղնականաչավուն զանգված: Ոստիկանները հենց թմրամիջոցների ապօրինի շրջանառության հետ կապված ենթադրյալ հանցանք կատարելու կասկածանքով էին Արթուր Հովհաննիսյանին եւ եւս մեկ անձի ոստիկանություն տարել:

Դե իսկ ՔՊ-ական մեկ այլ պատգամավոր Էդուարդ Աղաջանյանը բոլորովին վերջերս էր, որ հայտարարեց, թե որեւէ միջին վիճակագրական խնջույք առանց թմրանյութերի չի անցնում: Մի հատ էլ նախկին դիջեյը սրտնեղում էր, թե՝ ինչով է պայմանավորված այն համանգամանքը, որ ոստիկանական ռեյդեր անցկացվում են որոշակի ենթամշակութային առանձնահատկություն ունեցող ժամանցի վայրերում:

Այսքանից հետո՝ Նիկոլ Փաշինյանը փորձում է գնալ նոր ընտրությունների՞, ո՞ւմ վրա հույս դնելով, երբ թմրանյութերի դեմ արդյունավետ պայքար անգամ սեփական թիմում չի կարողանում իրականացնել: Թե՞ մի քիչ «ուռելն» ու մի քիչ էլ ուղեղները չորացնելը նպաստավոր է՝ նրանց հեշտ կառավարելու համար: Այն, որ Գյումրիում սպասվելիք արտահերթ ՏԻՄ ընտրություններում է խայտառակ իրավիճակ ստեղծվել, բա պատկերացնո՞ւմ եք` ինչեր ի հայտ կգան, եթե արտահերթ համապետական ընտրություններ լինեն:

ՀՐԱՆՏ ՍԱՐԱՖՅԱՆ