«Եվրատեսիլ 2025»-ում Հայաստանը ներկայացնող Պարգը փակագծեր է բացում

 «Եվրատեսիլ 2025» երգի միջազգային մրցույթին Հայաստանը ներկայացնող ՊԱՐԳԸ՝ նույն ինքը՝ Պարգեւ Վարդանյանը, «Դեպի Եվրատեսիլ» նախագծում հաղթանակից հետո՝ կիսվել է իր զգացողություններով:

«ՃԻՇՏՆ ԱՍԱԾ, ՀԱՂԹԵԼ-ՉՀԱՂԹԵԼՈՒ ՄԻՏՔԸ ԲԱՑ ԷԻ ԹՈՂԵԼ»

«Շատ խառը զգացողություններ ունեմ, իսկապես, ուրախ եմ եւ հույս ունեմ, որ 2026 թվականին «Եվրատեսիլ»-ը կարող է եւ կայանա Հայաստանում: Շատ շնորհակալ եմ բոլորից, ովքեր ընտրել են ինձ: Շնորհակալ եմ իմ թիմին, իմ պրոդյուսերին, որովհետեւ եթե նրանք չլինեին, չէր կարող այս ամենը իրականանալ»,- չափազանց հուզված իր խոսքը սկսեց Պարգը:

Այն հարցին, թե որքանով էր սպասելի այս հաղթանակը, նա պատասխանեց, որ իր աշխատասիրության արդյունքն է համարում այն. «Ես իրականում աշխատասեր եմ եւ պատրաստ եմ հետագայում նաեւ էլ ավելի զարգացնել ելույթս եւ կրկնակի լավ ներկայանալ հետագայում: Ինչ վերաբերում է սպասումներիս, ապա կասեմ, որ երբ լսում էի տարբեր մարդկանց կարծիքները, մտածում էի, որ՝ այո, ֆավորիտներում եմ: Նաեւ լավ գիտեի, որ ես միայնակ չէի ֆավորիտներում՝ Սիմոն, Աթենա եւ մյուսներ: Նպատակս՝ մաքսիմալ միավոր ստանալն էր եւ իմ բոլոր էմոցիաները փոխանցելը: Ճիշտն ասած, հաղթել-չհաղթելու միտքը բաց էի թողել, սակայն հիմա շատ երջանիկ եմ, որ հաղթեցի»:

«Դեպի Եվրատեսիլ 2025»-ի հաղթողն անդրադառնալով երգին՝ պատմեց, որ ունի «Առաջ» վերնագրով մի երգ, որը պատմում է այն մասին, թե մարդ պետք է միշտ քայլի առաջ՝ չնայելով դժվարություններին: Survivor երգը նա համարում է այս երգի երկրորդ մասը. «Այս երգի միտքն այն է, որ ոչ մի դեպքում չպետք է հանձնվել եւ պետք է գնալ առաջ: Բոլորս էլ ունենք դժվարություններ, բայց չպետք է կորցնենք մեզ այդ ճանապարհին»

«ՄԵԶ ՄԻ ՔԱՆԻ ԱՄՍԻ ԹԵԺ ԱՇԽԱՏԱՆՔ Է ՍՊԱՍՈՒՄ»
«Եվրատեսիլ 2025»-ի հայաստանյան պրոդյուսեր, պատվիրակության ղեկավար ԴԱՎԻԹ ԾԵՐՈՒՆՅԱՆԻ գնահատմամբ՝ «Դեպի Եվրատեսիլ 2025» նախագիծը շատ ստացված էր եւ տարբերվող՝ հեռուստադիտողների ակտիվ քվեարկության առումով եւս:

«Հեռուստադիտողի ակտիվությունը եւս մեկ անգամ ցուցանիշ է, որ մարդիկ հետաքրքրված են «Եվրատեսիլ» մրցույթով եւ անտարբեր չեն մնում այս նախընտրական գործընթացին: Կարծում եմ՝ սա ֆանտաստիկ հնարավորություն է, որ ընձեռվել է Հանրային հեռուստաընկերության կողմից, մեր հեռուստադիտողներին՝ որոշում կայացնել եւ հնարավորություն ունենալ իրենց ձայնը տալու: Մարդիկ շատ երկար աշխատել են, որպեսզի հեռուստադիտողները ականատես լինեն հետաքրքիր շոու ծրագրի: Կարծես թե, կարծիքները լավն են, եւ բոլորը ոգեւորված են», - նշեց Ծերունյանը՝ շեշտելով, որ հեռուստադիողը պրոֆեսիոնալ է եղել իր քվեարկությամբ՝ սպասել են, որ ելույթները ավարտվեն, ապա նոր իրենց կարծիքն են արտահայտել քվեարկության միջոցով:

Ինչ վերաբերում է հետագա աշխատանքներին, ապա «Եվրատեսիլ 2025»-ի հայաստանյան պրոդյուսերն ընդգծեց. «Պարգը լավ գիտի, որ մեզ մի քանի ամսից թեժ աշխատանք է սպասում: Մենք արդեն իսկ ունենք հանդիպում Հանրային հեռուստատեսությունում, որպեսզի քննարկենք, թե մեզ ինչ է սպասվում առաջիկայում: Իսկ մեզ դեռ սպասվում է տեսահոլովակի նկարահանում,  բեմադրության աշխատանքներ: Շատ երկար փիառ աշխատանք, ռազմավարություն»:

Ի ԴԵՊ

Գեղարքունիքի մարզի Հայրավանքում գյուղում ծնված երգիչ-երգահան Պարգը հանրության լայն շրջանակներին հայտնի է դարձել վերջին մի քանի տարիներին: Նրա առաջին երաժշտական փորձը եղել է տեղի եկեղեցու երգչախմբում՝ մինչեւ վեց տարեկան հասակը: Այնուհետեւ ընտանիքի հետ տեղափոխվել են Ռուսաստան՝ Վոլգոգրադ: Այնտեղ նա հաճախել է տեղի պետական թատրոնի եւ կինոյի ինստիտուտ ու ավարտել Թատերական արվեստի եւ դերասանության բաժինը։ Իսկ հետո դարձել է համահիմնադիրը The Edge Chronicles անվանումով խմբի: 2017-2019 թթ.-երի ընթացքում խումբը հյուրախաղերով հանդես է եկել Հայաստանում, Ռուսաստանում, Վրաստանում եւ Ուկրաինայում։ Արդեն 2021 թվականին թողարկել է իր առաջին սինգլը՝ «Գինին ու Գրելը»: Պարգը 2022 թվականին վերադարձել է Հայաստան: Նույն թվականի հունիսին բացել է Զազի համերգը Երեւանի ՀԱՅԱ փառատոնում: Այդ ժամանակից ի վեր նա կատարել է Ռոզա Լինի երգերի «քավըրները» եւ համագործակցել է երգչուհի Բրյունետի հետ:

ՆԱՆԱ ՍԱՐԳՍՅԱՆ