Հայկ Մարությանն անհետացե՞լ է տրանսպորտի թանկացման պայքարից. ԶԱՐՄԱՆՔ

Գյումրիի նախկին քաղաքապետ ՎԱՐԴԱՆ ՂՈՒԿԱՍՅԱՆԸ, որը պատրաստվում է մասնակցել տեղի արտահերթ ՏԻՄ ընտրություններին, որպես քաղաքապետի թեկնածու, հայտարարությամբ է հանդես եկել՝ պնդելով, թե Գյումրու զարգացման միջոցներից մեկը կլինի «Ակադեմիական քաղաքը» Գյումրի տեղափոխելը։ Նա բոլոր թեկնածուներին, Շիրակի դաշտավայրի բոլոր բնակիչներին կոչ է արել միանալ իր սկսած պայքարին, որը զանգվածային քաղաքական արշավ է՝ «Ակադեմիական քաղաքը» Գյումրիում կառուցելու: Փաստորեն, ի՞նչ է ստացվում, Գյումրիի նախկին քաղաքապետը չդիմացավ գոնե մինչեւ քարոզարշավի մեկնարկն ու ավարտը եւ արդեն իսկ սկսել է Նիկոլ Փաշինյանի «ջրաղացին ջուր լցնել»: Երբ կրթության փորձագետները գրեթե միաբերան ասում են, որ սա խայտառակ նախաձեռնություն է, եթե անգամ «Ակադեմիական քաղաքը» կառուցվի Երեւանին մոտ՝ Արտաշատում, այն բերելու է կրթական ոլորտի կոլապսի, Վարդանիկը զբաղված է դրա փիառով ու երեւանյան պատմություն կերտած կրթօջախները դատարկելով: Չէ, Վարդանիկ, էս քո խելքի բանը չէ, դու ավելի լավ է՝ ճվա՛…

Ուշագրավ հարց է բարձրացրել քաղակտիվիստ Արթուր Չախոյանը: Նա հետաքրքրվում է, թե ինչպես են երեւանցիները վերաբերվում ՀԱՅԿ ՄԱՐՈՒԹՅԱՆԻ անհետանալուն՝ տրանսպորտի թանկացման պայքարից: «Օրինակ` ինձ համար շատ անսպասելի էր Հայկ Մարությանի անհետանալը, եւ դա անընդունելի է, քանի որ նա, հանդիսանալով ընդդիմադիր քաղաքական ուժ, հանրությանը կոչ արեց բոյկոտել տրանսպորտի թանկացումը, սակայն պայքարից անհետացավ՝ իր կոչ արած քաղաքացիներին թողեց անհասկանալի անորոշության մեջ։ Շատ մտածելու տեղիք է տալիս Հայկ Մարությանի անհետանալը բոյկոտի ամենաակտիվ փուլում, չէ՞ որ իր քաղաքական ուժը ի զորու է մեծ ազդեցություն ունենալ բոյկոտի արդյունքի վրա, սակայն այդ ուղղությամբ ոչ մի գործողություն տեղի չունեցավ», - նշում է Չախոյանը եւ եզրահանգում, որ քայլերի այս հաջորդականությունը հուշում է, որ տրանսպորտի թանկացման դեմ ստորագրահավաքը Մարությանի համար պարզապես քաղաքական դիվիդենտներ քաղելու PR-ի միջոց էր, քանի որ այլ բացատրություն չի տեսնում։ Ի՞նչ ասես, ճիշտ են ասում էլի, որ նախկին ՔՊ-ական չի լինում:

Իսկ «Հանուն Հանրապետության» կուսակցության նախագահ, ԱԺ նախկին պատգամավոր ԱՐՄԱՆ ԲԱԲԱՋԱՆՅԱՆԸ որոշել է բենզին լցնել, առանց այն էլ վատթար վիճակում գտնող հայ-բելառուսական հարաբերությունների վրա: Նա լուսանկար է հրապարակել Բելառուսի ընդդիմադիր գործիչ Սվետլանա Տիխանովսկայայի հետ եւ գրել. «Այս տարի որոշեցի հրավիրել Հայաստան՝ կարեւոր առիթի շրջանակներում։ Եթե հաջողվի հաղթահարել որոշ խոչընդոտներ, ապա նա կլինի մեր հյուրը»: Անդրադառնալով վերոնշյալին՝ քաղաքագետ Գագիկ Համբարյանը գրում է. «Մինչ ԱՄՆ-ն, ըստ ոչ պաշտոնական տվյալների, բանակցում է Բելառուսի հետ` ամերիկա-֊բելառուսական հարաբերությունները որոշ չափով կարգավորելու նպատակով` փաստորեն, հրաժարվելով նաեւ իր պրոյեկտ Տիխանովսկայայից, մերձնիկոլյան շրջապատի այս կերպարն այդ կնոջը հրավիրում է Հայաստան... Հետաքրքիր է, ի՞նչ օգուտ դա կտա մեզ... Պատասխանը շատ պարզ է` ոչ մի... Բայց «зато» դրանով շատ կհրճվեն «անպարտելի» Նիկոլի երկրպագուները եւ արեւմտամետները... Բացարձակ չզարմանաք նաեւ, որ սրան ի պատասխան Մինսկն էլ Ադրբեջանին հանձնի Բաքվի պահանջով ձերբակալված, ըստ լուրերի` նաև ՀՀ քաղաքացիություն ունեցող, բլոգեր Բելլային...»:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝