Եվրատեսիլյան կուլիսային ջերմությունը՝ մեկը մյուսի հանդեպ կեղծ էր, սակայն գեղեցիկ էր նայվում

Եվրատեսիլյան ինտրիգները դեռեւս չեն ավարտվել՝ չնայած, որ «Դեպի Եվրատեսիլ» ընտրական փուլն ավարտված է: Թե ինչպիսի մթնոլորտ է եղել այդ ողջ ընթացքում կուլիսներում, եւ թե ինչ են զգում այժմ «Դեպի Եվրատեսիլ» նախընտրական փուլին մասնակից արտիստներն ու պրոդյուսերները, «Իրավունք»-ը պարզեց Անահիտ Հակոբյան եւ Գասոյա զուգերգի պրոդյուսեր ՄՀԵՐ ԲԱՂԴԱՍԱՐՅԱՆԻՑ:

— Ո՞ւմ մտահղացումն է եղել ստեղծել Անահիտ եւ Գասոյա զուգերգը:

— Ի սկզբանե մտահղացումն իմն է եղել, ես եմ նման առաջարկ արել նրանց: Անահիտի հետ ես եւ Գոռը՝ Գասոյան, ծանոթացել ենք ԱՄՆ-ում: Բնականաբար, համընկել են էներգետիկաները, աշխատելու ընդհանուր տեսլականը, մարդկային ֆակտորը: Կարծում եմ՝ մինչ այժմ էլ նույն ալիքի վրա ենք եւ նույն ստեղծագործական ուղղությամբ ենք մտածում: Առաջարկը եղել է սպոնտան՝ ընդամենը «Եվրատեսիլ»-ին մասնակցության հայտ ներկայացնելուց 20 օր առաջ: Ես զանգել եմ Անահիտին եւ առաջարկել, նա էլ մտածել եւ ընդունել է առաջարկս: Ինչ վերաբերվում է Գոռին, նա բնավորությամբ ընդհանրապես կապ չունի շոու-բիզնեսի հետ, եւ մարդկային տեսակն էլ այնպես է, որ մրցույթների, շոուների, քսված տղաների եւ նման աշխարհի հետ որեւէ կապ չունի: Այդ պատճառով նա իրեն չէր զգում ինչպես ձուկը ջրում, որովհետեւ առաջին հերթին մարդկային գործոնն է իր դեպքում, հետո նոր արտիստ լինելը: Առհասարակ, նա զբաղվում է այլընտրանքային երաժշտությամբ, բայց ոչ՝ փոփ ժանրի: Այս առումով, ըստ իս, սխալն իմն է եղել՝ որպես պրոդյուսեր նրան բերել նման հարթակ: Սակայն, չեմ կարծում, որ դա վատ փորձ էր, որովհետեւ 6 ամսում որեւէ մեկը հայկական շոուբիզնեսում նման հաջողությունների չի հասել: 6 ամիս առաջ որեւէ մեկը չի իմացել Գոռի գոյության մասին, սակայն այսօր նա իր օգտահաշվի վրա ունի 17 միլիոնանոց դիտումներով տեսահոլովակ: Նա մրցանակ է ստացել տեսահոլովակի համար «Կոդակ»-ում, մի քանի տեսահոլովակներ ենք հասցրել նկարել այս ընթացքում եւ ամենակարեւորը՝ մասնակցել է երաժշտական շոուներից մեկին: Կգա ժամանակ, կհասկանանք, որ «Եվրատեսիլ» չգնալը մեր օգտին է եղել: Ինչ վերաբերվում է Անահիտին, նա դիմել է չափազանց մեծ ռիսկի՝ իմ առաջարկն ընդունելով: Հաղթել «Նոր ալիք 2024»-ում, որտեղ մրցակցությունն ավելի թեժ է եւ դրանից հետո մտնել «Դեպի Եվրատեսիլ»-ի մրցութային դաշտ, դրա համար ամուր նյարդեր, համարձակություն եւ մի քիչ էլ հանդգնություն է հարկավոր: Արդյոք այս մրցույթն օգնեց Անահիտին, ինչ-որ տեղ՝ այո՛, ինչ-որ տեղ՝ ո՛չ: Ի վերջո, հաղթողներին չեն դատում, ու ինչ էլ եղել է՝ եղել է մեր օգտին:

— Արձագանքներն ինչպիսի՞ն էին:

— Եկեք փաստենք, որ մենք հաղորդագրություններով ստացած քվեարկությամբ 3-րդ հորիզոնականում էինք: Երկրորդ եւ երրորդ հորիզոնականների տարբերությունը 90 ձայնից պակաս էր: Այսինքն՝ պետք է ընդունել, որ չափազանց լավ ենք հանդես եկել հանդիսատեսի եւ հեռուստադիտողի համար: Այս մրցույթներն արվում են հեռուստադիտողի համար, այլ ոչ թե` պրոֆեսիոնալ ժյուրիի: Երկար տարիներ «Եվրատեսիլի» ձեւաչափը եղել է միայն SMS քվեարկությամբ, եւ դա փոխվել է 2010-ականներին: Այսինքն` մենք եթե ընդունենք, որպես հեռուստադիտողի համակրանք, ապա ստացել ենք շատ բարձր հորիզոնական: Մեզ համար դա է կարեւոր: Անահիտը երգեց փառահեղ, տեսքը եւ ամենինչը մինչ այսօր քննարկվում է: Կարող եմ ասել դա ավելի շատ է քննարկվում, քան հաղթողի անձը: Դա, որպես պրոդյուսեր, իմ կարեւոր առաքելություններից մեկն է՝ այնպես անել, որ տաղանդավոր մարդուն ավելի շատ նկատեն: Ամեն ինչ անել, որ Գոռը ունենա էլ ավելի փորձառություն, իսկ Հանրայինի ուղիղ եթերում կենդանի ձայնով երգելը` մեծ փորձառություն է: Եվ վերջապես, եկեք ընդունենք, որ այս մարդիկ մի քանի ամսում են պատրաստվել: Նաեւ ասեմ՝ տեղյակ եմ, որ Պարգը չորս տարի շարունակ պատրաստվում է «Եվրատեսիլ»-ին, ինքն ու իր պրոֆեսիոնալ թիմի աշխատաոճն ինձ հիացնում է:

— Ինչպես ասացիք, հաղթողին չեն դատում, սակայն հետաքրքիր է Ձեր կարծիքը Պարգի երգի, մատուցման ձեւի մասին...

— Կգնահատեմ՝ փայլուն: Երգը գրել է «Եվրատեսիլ»-ում երկու անգամ հաղթած կոմպոզիտոր, եւ երգը, ըստ իս, ունի պլագիատի տարրեր իր մեջ՝ «Imagine Dragons - Believer» կատարումից, որը ողջ համացանցը քննարկում է: Ես, որպես հայ, ցավում եմ դրա համար, քանի որ դա մեզ կխանգարի լավ հորիզոնական գրավելուն: Որպես փորձագետ եւ պրոդյուսեր՝ չեմ մեղադրում, որովհետեւ այդ տեմպի եւ այդ ոգեւորվածության մեջ բոլորս կուրանում ենք եւ չենք տեսնում շատ փաստեր: Ինչ վերաբերում է ընդհանուր մրցույթին, պիտի ասեմ, որ ունեինք տաղանդավոր մասնակիցներ, ովքեր ներկայացան փայլուն: Այնտեղ կային արտիստներ, որոնք շատ ֆանտաստիկ կերպով ներկայացան, սակայն չունեին ընկերներ կամ մարդիկ, ովքեր նրանց խորհուրդ կտային՝ դա անել առավել ընդունելի եւ ավելի ճիշտ մատուցմամբ: Անդրադառնալով մրցակցային դաշտին՝ ասեմ, որ բոլորը մեկը մյուսի հանդեպ շատ ջերմ էին, անհանգստանում եւ ցավում էին իրար համար: Արդյո՞ք դա անկեղծ էր: Այսքան տարի լինելով շոուբիզնեսում՝ կասեմ ՝ ո՛չ, սակայն դա գեղեցիկ էր նայվում:

— Կրկին կվերադառնա՞ք այս մրցույթին:

— Ես կարող եմ Գոռի փոխարեն ասել, որ՝ ոչ: Անահիտն անկախ արտիստ է, եւ նա ինքը կորոշի՝ մասնակցել, թե՝ ոչ, սակայն հանգամանքները ցույց կտան, որ ինքը կվերադառնա այդ մրցույթ:

ՆԱՆԱ ՍԱՐԳՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝