ԸՄԲՇԱՄԱՐՏԻԿ, ՄԵԾԱՀԱՍԱԿՆԵՐԻ ԵՎՐՈՊԱՅԻ ԲՐՈՆԶԵ ՄԵԴԱԼԱԿԻՐ ՄԱՆՎԵԼ ԽԱՉԱՏՐՅԱՆ

Օրերս ՌԴ-ում կայացած հունահռոմեական ոճի ըմբշամարտի միջազգային առաջնությանը ոսկե մեդալ է նվաճել մեծահասակների Եվրոպայի առաջնության բրոնզե մեդալակիր, միջազգային կարգի սպորտի վարպետ, ծնունդով Ախուրյանից ՄԱՆՎԵԼ ԽԱՉԱՏՐՅԱՆԸ։

Iravunk. com -ի մարզական թղթակիցը Գյումրիում հանդիպել ու բացառիկ զրույց է ունեցել Մանվելի հետ։ Նա այսպես մեկնաբանեց.

- Հանդես եկա 57 կգ քաշային կարգում։ Առաջին մրցակիցս մեր հայրենակից ըմբիշն էր, նրան հաղթեցի 8։7 հաշվով։ Հաջորդ գոտեմարտում էլ բացարձակ առավելությամբ 10։0 հաշվով պարտության մատնեցի Իրանի Իսլամական Հանրապետությունը ներկայացնող ըմբիշին։

- Ինչ տվեց քեզ այս հաղթանակը։

- Սա շատ կարևորագույն մրցաշար էր, սա վճռորոշ եղավ, այս հաղթանակը ինձ տվեց հնարավորություն մասնակցելու ապրիլի 7-ին կայանալիք մեծահասակների Եվրոպայի առաջնությանը, որը կկայանա Սլովակիայում։ Հանդես կգամ 55 կգ քաշային կարգում։

- Մանվել, հետաքրքիր է, թե որ տարիքից ես սկսել զբաղվել սպորտով։

- Հիշում եմ, 4 տարեկանից սկսեցի պարապել ըմբշամարտով, անձնական մարզիչս հայրս է Էդգար Խաչատրյանը։ Հենց հայրիկիցս էլ ոգեշնչվել եմ ու սկսել պարապել, ու այժմ առանց ըմբշամարտի էլ չեմ կարող պատկերացնել իմ կյանքը, առօրյան։ Հիմա արդեն 21 տարեկան եմ։

- Իսկ որևէ հիշարժան գոտեմարտ եղել է քո մարզական կարիերայի ընթացքում։

- Իհարկե, անցած տարի Ռումինիայի մայրաքաղաք Բուխարեստում կայացած մեծահասակների Եվրոպայի առաջնությանը (ի դեպ, առաջին անգամ էի մասնակցում մեծահասակների Եվրոպայի առաջնությանը), 13։5 հաշվով կարողացա հաղթել ազգությամբ թուրք մրցակցիս, որը Եվրոպայի գործող չեմպիոնն էր։ Այդ պահին շատ անբացատրելի զգացողություններ առաջացան ինձ մոտ, այլ կերպ չէր էլ կարող լինել։ Հենց իմացա, որ մրցակիցս թուրք է լինելու, միայն մտածում էի հաղթանակի մասին։ Հետո էլ բրոնզե մեդալի համար պայքարում, բացարձակ առավելությամբ 8։0 հաշվով հաղթեցի բուլղարացի մրցակցիս։

- Կա՞ որևէ անվանի մարզիկ, որ նրանից շատ ոգեշնչվում ես։

- Իհարկե, մեր Գյումրեցի, լեգենդար ըմբիշ Արթուր Ալեքսանյանն է։ Նրա հետ նույն մարզադահլիճում պարապելը շատ մեծ մոտիվացիա է հաղորդում մեզ, ձգտում ենք նմանվել նրան։ Արթուրը շատ օգտակար խորհուրդներ է տալիս, սովորեցնում հնարքներ։ Վերջերս էլ, ինչպես ականատես եղաք նաև դուք, նա վարպետության դաս անցկացրեց մեր Գյումրու մանկապատանեկան համալիր մարզադպրոցում։ Մենք, երիտասարդ սերնդի մարզիկներս, իսկապես գիտակցում ենք, թե ինչպիսի լեգենդար մարզիկի հետ ենք շփվում, պարապում, բոլորին չէ, որ տրված է այդ շանսը։ Իմ ամենամեծ երազանքը Օլիմպիական խաղերի չեմպիոն դառնալն է։

- Շնորհակալություն, Մանվել, մեզ ժամանակ տրամադրելու համար։

- Զգացված եմ ուշադրության համար, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ