Սարի՛կ, բանակում չծառայած քայլիստներն ի՞նչ են, դավաճաննե՞ր են. ԶԱՐՄԱՆՔ

Քննչական կոմիտեի շուրջ կրքերը չեն հանդարտվում: Արցախցի երիտասարդ Տիգրան Ուլուբաբյանը, որն արցախյան վերջին պատերազմների մասնակից է, մանրամասնել է, որ ոստիկաններն իրեն խոշտանգումների են ենթարկել՝ մի գործի շրջանակում, որի հետ ոչ մի կապ չունի: Մի խումբ քաղաքացիներ արդեն մի քանի օր է բողոքի ցույցեր են իրականացնում ՔԿ-ի շենքի մոտ՝ պահանջելով պատժել մեղավորներին: Հարց է ծագում՝ իսկ ինչո՞վ է զբաղված Մարդու իրավունքների պաշտպան ԱՆԱՀԻՏ ՄԱՆԱՍՅԱՆԸ: Եվ ահա նա խրոխտ հայտարարել է, թե Ուլուբաբյանի հետ չի հանդիպել, չի շփվել։ «Հանրային հնչեղությունը նշանակութ-յուն չունի, ցանկացած մարդ, անկախ դեպքի հանրային հնչեղությունից, կարեւոր է եւ ունի հավասար հնարավորություններ, եւ ես ակտիվ հանդիպումներ եմ ունենում քաղաքացիների հետ»,- ասել է նա: Մանասյանը տեղեկացրել է, որ ոչ միայն այս, այլեւ մեկ այլ դեպքով ՄԻՊ գրասենյակը համապատասխան պետական ​​մարմիններից բացատրություններ եւ պատշաճ քննության իրականացում է պահանջել։ Նրա խոսքով՝ այս կերպ կարելի է պարզել ճշմարտությունը եւ մեղավորներին պատասխանատվության ենթարկել։ Օմբուդսմենը նշել է, որ համաձայն միջազգային չափանիշների՝ խոշտանգումների գործերը պետք է վարվեն արագացված կարգով։ Ո՞ւ… Այսքան բան: Իբր ի՞նչ արեց, երբ ավտոբուսոմ դեռ ՔՊ-ական պատգամավոր Ասլանյանի հետ ունեցած միջադեպից հետո իրավապահ մարմինները խոշտանգում էին քաղակտիվստ Սամվել Վարդանյանին, որ հիմա էլ ի՞նչ սպասենք ՄԻՊ-ից: Այսքանից հետո թերեւս մի բան կարող է անել տիկին Մանասյանը՝ հրաժարական տալ ու ասել, որ մարդու իրավունքների պաշտպանությունն իր խելքի բանը չէ:

Զարմանալի իրադարձություններ են տեղի ունենում Գյումրիի ավագանու ընտրություններին ընդառաջ: «Իմ հզոր համայնք» կուսակցությունով Գյումրիի քաղաքապետի թեկնածու առաջադրված պրոդյուսեր ՌՈՒԲԵՆ ՄԽԻԹԱՐՅԱՆԻՆ հրավիրվել են Հայաստանի քննչական կոմիտե՝ հարցաքննության: Իհարկե, տպավորություն կարող է լինել, թե սա կապված է նախընտրական քարոզարշավում թույլ տված ինչ-որ օրինազանցությամբ, բայց՝ ոչ: Ռուբեն Մխիթարյանն ասել է, որ իրեն են զանգահարել ՀՀ Քննչական կոմիտեից եւ տեղեկացրել, որ անցյալ տարի մայիսին իր կատարած իրավախախտման հիմքով (մեքենան վարել է առանց վարորդական իրավունքի) իրեն հրավիրում են Քննչական կոմիտե՝ պարզաբանումների։ Մխիթարյանը սա ծիծաղելի է որակել, քանզի մոտ մեկ տարի անց այս դեպքի մասին հիշել են ու որոշել ընդդիմադիր թեկնածուին այս կերպ ճնշել։ Այն, որ միայն հիմա՝ նախընտրական քարոզարշավի ժամանակ են հիշել մի տափակ իրավախախտման մասին, որը դեռ հարց է՝ ճիշտ է, թե՝ ոչ, թողնենք մի կողմ, բայց առնվազն տարօրինակ է, թե ինչու է այս գործով զբաղվում ՔԿ-ն, իսկ արցախցի երիտասարդին խոշտանգողներին բացահայտելու գործը քնեցնում:

Գյումրիի ՔՊ-ական քաղաքապետի թեկնածու ՍԱՐԻԿ ՄԻՆԱՍՅԱՆՆ էլ բարձրագոչ հայտարարությամբ է հանդես եկել, թե՝ դավաճանը նրանք են, ովքեր փողով իրենց գերդաստանի տղամարդկանց ազատել են բանակից: Այս առումով քաղաքագետ Գագիկ Համբարյանը հիշեցնում է. «Երբ շտաբ գնացիր, մի հատ մարզպետ Դավիթին ու երեսփոխան Կարենին հարցրու, թե ի՞նչ հիմքով են ազատվել բանակից...Ձերոնք կա՛մ հիվանդ են, կա՛մ գիտնական, որոնցից ոմանք` չկայացած, քանի որ բանակից ազատվել են կրթությունը շարունակելու՝ ասպիրանտուրայում սովորելու համար, բայց ատենախոսություն չեն պաշտպանել, բայց բանակ էլ չեն գնացել...Սարի՛կ, բանակում չծառայած այս քայլիստներն ի՞նչ են, դավաճաննե՞ր են…»:

ԶԱՐՄԱՑԱԾ Է «ԻՐԱՎՈՒՆՔ»-Ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝