Ո՞ւմ է պետք այս թոզփչոցին. ԶԱՐՄԱՆՔ

Շիրակի մարզպետ ԴԱՎԻԹ ԱՌՈՒՇԱՆՅԱՆԸ զարմանալի հայտարարությամբ է հանդես եկել՝ դիմելով գյումրեցիներին: «Շնորհակալ եմ մեր քաղաքական ուժին` «Քաղաքացիական պայմանագիր» կուսակցությանը վստահության կարեւոր քվե տալու, մեր Սարիկին հավատալու, քաղաքի վաղվա օրվա մասին մտածելու համար»: Հետաքրքիր է՝ՔՊ-ական պատգամավոր Վիլեն Գաբրիելյանն էր հարբած, բա մարզպետն ի՞նչ օրի էր, որ հե՞չ տեղյակ չի, թե ինչ է եղել Գյումրիում: «Շիրակի մարզպետ Դավիթը ե՛ւ Սարիկին է ծաղրո՞ւմ, ե՛ւ գյումրեցիների՞ն... Դավի՛թ, այդ ձայները, որ ստացել եք (առանց կեղծ ընտրողների) հավաքել եք շնորհիվ Սարիկի` դա ճիշտ ես, բայց միեւնույն ժամանակ, Սարիկը, դառնալով «ձերը» , ինքն իրեն հենց վնաս տվեց` վարկաբեկեց... Դրա համար ես շնորհակա՞լ... Երկրորդը` շնորհակալություն ես հայտնում 63% գյումրեցիներին, որ փաստորեն դեմ են քվերակել ՔՊ-ին, թե՞ ձեզ համար նորմալ է մոտ 37% ձայն ստանալ, մոռանալ, թե ինչ թվերի մասին էիք խոսում` թե բա 50% եւ ավելի ձայներ կհավաքենք եւ հիմա երեւակայել, որ հաղթել եք... »,- հարց է բարձրացնում քաղաքագետ Գագիկ Համբարյանը:

Թե ինչով է զբաղված «Սրբազան պայքար» շարժումը, որն առաջնորդում է Տ. ԲԱԳՐԱՏ արքեպիսկոպոս ԳԱԼՍՏԱՆՅԱՆԸ, ոչ միայն զարմանալ, այլեւ ապշել կարելի է: Շարժման երիտասարդները նախաձեռնել են ո՛չ ավել, ո՛չ պակաս տուն-տունիկ: Դե էլ ինչպե՞ս ներկայացնել իրենց գնահատմամբ՝ սիմվոլիկ ժողովրդական հանրաքվե ասվածը: «Չեմ վստահում Նիկոլ Փաշինյանի իշխանությանը» գրությամբ թղթեր են տպել, արկղեր տեղադրել քաղաքի տարբեր վայրերում, մարդիկ էլ ուրախ-ուրախ ստորագրում են թղթի տակ ու գցում արկղերի մեջ: Այո, այո, ոչինչ չափազանցված չէ, մի թուղթ են մարդիկ ստորագրում, որն իրավական, օրենսդրական որեւէ նշանակություն չունի, որեւէ մեկին ներկայացնելու բան էլ չի, իրենք էլ փաստում են՝ սիմվոլի՛կ է: Ի՞նչ ասես, ինչքան ստորագրահավաքներով որոշներն Արցախը փրկեցին, այնքան էլ սիմվոլիկ հանրաքվեներով Փաշինյան Նիկոլին կարելի է հեռացնել: Բայց, լավ, ո՞ւմ է պետք այս թոզփչոցին: Ի դեպ, երեկ էլ հայտարարել են, թե՝ երկու շաբաթում, օրական 2-3 ժամ աշխատելով, քվեարկել է գրեթե 10 հազար մարդ: Համաձայնեք, որ 10 հազար մարդ գա հանրահավաքների, ավելի արդյունավետ կլիներ, քան ստորագրի մի անիմաստ թուղթ ու համարի, թե դրանով մեծ ներդրում է ունեցել սրբազան պայքարում:

Ամեն անգամ, երբ թվում է, թե այս իշխանությունն ավելի ցած չի կարող իջնել, պարզվում է՝ անդունդը հատակ չունի: Զարմանալի մի դեպքի մասին է բարձրաձայնել իրավապաշտպան ՌՈՒԲԵՆ ՄԵԼԻՔՅԱՆԸ: Ասում է՝ ստանձնել է 75-ամյա Կիմա տատիկի պաշտպանությունը, որը «դարի հանցագործն է, 48 ժամ է՝ ձերբակալված է, գտնվում է ձերբակալվածների պահման վայրում»: Իրավապաշտպանը հայտնում է, որ 75-ամյա կնոջ աչքերից արցունքները հոսում էին, իրենից հարցնում էր. «Բալա ջան, ինձ ինչի՞ համար են այստեղ բերել»: Ռուբեն Մելիքյանի գնահատմամբ՝ Գյումրու ընտրությունների օրը շատ վատ ձեւով Հակակոռուպցիոն կոմիտեի օպերները, որոնք փոխանակ զբաղվեն շատ արագ հարստացող ՔՊ-ականներով, 40.000 դրամով ապրող 75-ամյա Կիմա տատիկի հետեւից են ընկել: «Վերջին ձեւով սպառնացել են՝ փակելու ենք քեզ, բանտերում փտելու ես, քաղաքական հարցեր են տվել, ինչ գործ ունես էսինչի, էնինչի հետ: Ոչ թե հարցեր, այլ գլխին նոտացիաներ են կարդացել», - մանրամասնում է Մելիքյանը: Նրա խոսքով` առանց փաստաբանի, կնոջը տեսախցիկի դիմաց հարցաքննել են: Աուո՜ւ… Մարդու իրավունքների պաշտպանի գրասենյակում որեւէ մեկը տեղո՞ւմ է:

ԶԱՐՄԱՑԱԾ Է «ԻՐԱՎՈՒՆՔ»-Ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝