«ՍԱ ԻՄ 9-ՐԴ ՄԵՆԱՄԱՐՏՆ ԷՐ ԵՎ 9-ՐԴ ՀԱՂԹԱՆԱԿԸ ՊՐՈՖԵՍԻՈՆԱԼ ՌԻՆԳՈՒՄ». ԽԱՌԸ ՄԵՆԱՄԱՐՏԵՐԻ ՊՐՈՖԵՍԻՈՆԱԼ ՄԱՐԶԻԿ, ՄԱՐԶԻՉ ԳԵՂԱՄ ՎԱՐԴԱՆՅԱՆ

Վերջերս Երևանում կայացել է Խառը մենամարտերի MIX FIGHT 57 միջազգային պրոֆեսիոնալ մրցաշարը։ Մրցաշարի ժամանակ մենամարտեր են ընթացել նաև K1-ով։ Խառը մենամարտերից մեր երկրի 8 մարզիկներից 7-ը հաղթել են, իսկ K1-ից 2-ը։

Iravunk. com -ի մարզական թղթակիցը հանդիպել ու բացառիկ զրույց է ունեցել այս մրցաշարի հաղթող, խառը մենամարտերի պրոֆեսիոնալ մարզիկ, մարզիչ, մի շարք միջազգային մրցաշարերի հաղթող, ծնունդով Էջմիածնից ԳԵՂԱՄ ՎԱՐԴԱՆՅԱՆԻ հետ։

- Ողջույն, Գեղամ ։ Շնորհավորում ենք տպավորիչ հաղթանակի առթիվ։

- Շատ շնորհակալ եմ։ 70 կգ քաշային կարգում եմ հանդես եկել։ Մրցակիցս իրանցի Էրֆան Մադադին էր։ Հենց մենամարտի առաջին ռաունդում, տեխնիկական նոկաուտի ենթարկելով, հաղթեցի նրան։ Սա իմ 9-րդ մենամարտն էր ու 9-րդ հաղթանակը պրոֆեսիոնալ ռինգում։ Հաղթանակս նվիրում եմ երջանկահիշատակ մայրիկիս պայծառ հիշատակին։ Մայրս միշտ երազում էր, որ ես մեծանամ ու շատ ուժեղ մարզիկ դառնամ։ Նրա երազանքը կատարվեց։ Նշեմ, որ լավ էի պատրաստվել այս մենամարտին։ Ինչպես պլանավորել էինք անձնական մարզչիս Անդրանիկ Կարապետյանի հետ, հենց այդպես էլ եղավ, ու ես հաղթեցի։ Իմ հաջողության հետևում Աստված է միայն կանգնած, շատ մեծ հավատք ունեմ Աստծո հանդեպ։ Աստծո կամքով ինձ տրվեց այս հաղթանակը։

- Գեղամ, իսկ ինչ տվեց քեզ այս հաղթանակը։

- Այս հաղթանակով դասակարգման աղյուսակում ես հիմա արդեն ավելի բարձր հորիզոնականում եմ գտնվում։

- Նախապես հասցրել էիր մրցակցիդ ուսումնասիրել։

- Իհարկե, նա բավականին ուժեղ մրցակից է, պրոֆեսիոնալ ռինգում ուներ 3 հաղթանակ։ Նշեմ, որ ես շատ մեծ ցանկություն ունեմ պրոֆեսիոնալ մենամարտ անցկացնել ադրբեջանցի մրցակցի դեմ ու հաղթել նրան, դա երազանքի պես բան է ինձ համար։ Նշեմ, որ UFC անվանի մարզիկ Արման Ծառուկյանը 2021֊ի դեկտեմբերին ինձ ՌԴ Սոչի քաղաք էր հրավիրել, այնտեղ միասին պարապմունքներ ենք անցկացրել, ես նրան օգնեցի պատրաստվել Իսլամ Մախաչևի դեմ մենամարտին, նա էլ ինձ շատ օգնեց, միասին պարապեցինք։ Դա իսկապես շատ մեծ փորձ էր ինձ համար։ Նա, ինչպես գիտեք, անցած տարի ամռանը Հայաստան ժամանեց, Էջմիածին էլ եկավ իմ սաների հետ էլ ծանոթացավ, այս տարի ամռանը ևս կգա։

- Գեղամ, որևէ հիշարժան մենամարտ ունեցել ես քո մարզական կարիերայի ընթացքում։

- Իհարկե, տարիներ առաջ, կրկին տեխնիկական նոկաուտով հաղթել եմ ինձանից 10 տարի մեծ իրանցի մրցակցիս, ես 17 տարեկան էի, մրցակիցս 27։ Սա երբեք չի ջնջվի իմ հիշողությունից։

- Շնորհակալություն, Գեղամ, մեզ ժամանակ տրամադրելու համար։Սպասենք արդեն հաջորդ հաղթանակիդ։

֊Շատ զգացված եմ ուշադրության համար, անխափան գործունեություն Ձեր թերթին։

Իսկ ահա MIX FIGHT ֆեդերացիայի նախագահ ՎԱՐԴԱՆ ՄՆԱՑԱԿԱՆՅԱՆԸ մեզ հետ զրույցում նշեց.

«Մրցաշարը շատ լավ անցավ ։Սա մեծ քայլ է բոլորիս համար ցույց տալու, որ մեր մրցաշարերում ամեն ինչ կազմակերպված է շատ բարձր մակարդակով ու համապատասխանում է միջազգային ստանդարտներին։ Դա կարևոր է, որպեսզի ավելի մեծ ուշադրություն դարձվի մեր մարզաձևի մարզիկներին թե սիրողական, թե պրոֆեսիոնալ մակարդակով, որպեսզի մեր մրցաշարերը հետաքրքրեն ինչպես հեռուստաալիքներին, այնպես էլ հովանավորներին։ Դա փոխշահավետ է բոլորիս համար։ Շուտով կլինի նաև MIX FIGHT 58-ը, այն անկրկնելի է լինելու» ։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ