Ուկրաինական բանակը ծայրահեղ լուրջ խնդիրների առաջ է ողջ դոնբասյան ճակատով մեկ (Քարտեզներ)

Ռուսական փորձագիտական աղբյուրները հաղորդում են դոնբասյան ռազմաճակատի Պոկրովսկ-Միրնոգրադ հատվածում հարձրակման վերսկսման մասին:

Այս ուղղությունը հիմնական էր անցած տարեվերջին եւ այս տարեսկզբին: Կիեւը պարտադրված այս հատված նետեց իր ստրատեգիական ռեզերվների զգալի մասը` փորձելով ոչ միայն կանգնեցնել, այլ` հետ շպրտել, անգամ` որոշակի հատվածներում շրջապատել ռուսներին: Չստացվեց, ուկրաինական ուժերը կրեցին միանգամայն լուրջ կորուստներ, էապես նվազեցին ստրատեգիական ռեզերվները, որոնք պետք էր օգտագործել նաեւ Կուրսկի հատվածում եւ հիմա` Սումում: Եվ ահա, ռուսները որոշակի վերախմբավորում-համախմբումից հետո անցնում են հարձակման` միանգամից երկու ուղղությամբ` Պոկրովսկի արեւմուտքում եւ Միրնոգրադի` արեւելքում աքցանավորելով ամբողջ անգլոմերացիան (Քարտեզ 3):

Սակայն սա Դոնբասյան ուղղությամբ ուկրաինացիների խնդիրների շատ փոքր մասն է: Բանն այն է, որ ռուսների հարձակումը շատ ավելի մասշտաբային է` փոխլրացման սկզբունքով ծավալվելով ողջ դոնբասյան ռազմաճակատով մեկ (Քարտեզ 1): Այն է. Պոկրովսկ-Միրնոգրադ հատվածից արեւելք` մինչ Տորեց հասնող հատվածի ուկրաինական վերահսկողության գոտում ռուսական հարձակումը նախնական հաջող տեմպերով զարգանում է Գոգավորության կեսն արդեն ռուսների ձեռքին է, ուկրաինական պաշտպանության երկու բնագծերը հաղթահարված են (Քարտեզ 2): Երրորդ գիծը Պոկրովսկ-Տորեցկ մայրուղու երկայնքով է, որը գրավելով, ռուսները դուրս կգան Դոնբասում ուկրաինական վերահսկողության հիմնական քաղաքներից մեկի` Կոնստանտինովկայի արեւմտյան գոտի` նաեւ հնարավորության ստանալով արեւմուտքից հարվածել Դրուժովկա-Կրամատորսկ-Սլավյանսկ գծին (Քարտեզ 6): Եվ այս ուղղությամբ ակտիվ հարձակում կա նաեւ հյուսիսում` Լիմանի ուղղությամբ: Կոնստանտինովկայի ուղղությամբ հարձակում է զարգայում նաեւ Տորեցկից, արեւելքից էլ` Չասով Յարից:

Բացի այդ, Պոկրովսկ-Միրնոգրադ հատվածից հարավ-արեւմուտք անմիջապես սկսվում է Նովոպավլովկայի ճակատը, որտեղ ռուսական ուժերը գործնականում արդեն գրավում են վերջին բնակավայրերը` մինչ Դնեպրոպետրովսկի մարզ (Քարտեզ 4):

Որեւէ տեղ չընդհատվող հարձակումն ընդանում է նաեւ ավելի հարավ` Բոգատիրի եւ դրան զուգահեռ` Կոմարի ուղղությամբ, ու այստեղ եւս ուղղությունը Դնեպրոպետրովսկի մարզն է:

Այսպիսով, ողջ դոնբասյան ճակատով մեկ ռուսներն այս պահին ակտիվ հարձակումների մեջ են: Սակայն ուկրաինական կողմի հիմնական խնդիրն այլ է` ռեզերվների ծայրահեղ պակասը: Թիկունքային ստրատեգիական ռեզերվները, կրկնենք, ծայրահեղորեն հյուծված են, եւ դա համալրել զորահավաքի հաշվին պարզապես հնարավոր չէ. էլիտար ուժերը նորակոչիկներով չես լրացնի: Ուկրաինական կողմին մնում է ճակատի այս կամ այն հատվածից ուժեր նետել ամենավտանգավոր ուղղություն, եւ անմիջապես էլ այդ դատարկված հատվածն է դառնում ամենավտանգավոր` առաջացնելով նոր ճեղքումներ:

Բայց էլ ավելի վատ է, որ այս պահին դոնբասյան հատվածում կենտրոնացված է ուկրաինական բանակի հիմնական մարտունակ մասը, որը մեծ արագությամբ մաշվում է, եւ լրացնելու տարբերակներ, կրկնենք, չկան: Հաշվի առնելով, որ նման ճգնաժամային վիճակ է նաեւ Զապորոժե-Խերսոն եւ հյուսիսում` Խարկով-Սում ուղղություններում: Այսինքն, կարող է այնպես ստացվել, որ դոնբասյան այս մեծ ճակատամարտից հետո Ուկրաինան պարզապես մարտունակ բանակ չունենա: Իսկ դա հարվածի տակ է դնելու ողջ երկիրը:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝