Տոտալիտարիզմի շնչից նիկոլական ժողովրդավարությունն ուղղակի թառամեց. ԶԱՐՄԱՆՔ

Տրամաբանության ու պատշաճության սահմաններն անցնելը նորություն չէ մեր իրականության մեջ։ Բայց այս մեկը պարզապես զարմացնող չէր, այլ՝ ցավալի։ Աշխարհ, կանգնիր, իջնող կա: Լրատվամիջոցներից մեկի հետ զրույցում Ազգային ժողովի «Հայաստան» խմբակցությունից հեռացած անկախ պատգամավոր ԳԵՂԱՄ ՆԱԶԱՐՅԱՆԸ, որը հայտարարում էր, թե ՔՊ-ից 25 հոգի էլ միանա Նիկոլ Փաշինյանի իմպիչմենթին, ասել է. «Երկրի առաջնորդ ինձ եմ տեսնում, կոշտ եմ գործելու ու սկսելու եմ մանկապարտեզից»: Անդրադառնալով վերոնշյալին՝ քաղաքագետ Գագիկ Համբարյանը գրում է. «Ա՛յ, քաղաքական խեղկատակ, Գյումրու Յոթ Վերք եկեղեցու դիմաց նստած յուրաքանչյուր մուրացիկ ավելի լավ առաջնորդ կլինի, քան` դու... Զոհված որդուդ շնորհիվ ճանաչելիություն ձեռք բերեցիր, բայց սրտով-հոգով որդուդ «սպանած» Նիկոլի երկրպագու էլ մնացիր...»: Է՛հ, մարդու լեզուն էլ չի պտտվում մի բան ասի…

Նորից լրագրողի են ուզում բանտ նետել։ Այն էլ ի՞նչ լրագրող, սյունեցի… Այս մասին ահազանգում է «Էկո-մեդիա» լրագրողական ցանցի համահիմնադիր Նարինե Կիրակոսյանը: Պարզվում է՝ «ժողովրդավարության բաստիոն» Հայաստանում հանրային քրեական հետապնդում է հարուցվել լրագրող ԱՆՈՒՇ ՄԻՐԶՈՅԱՆԻ նկատմամբ: «Հավանական է, որ իշխանությանը դուր չի եկել, որ Անուշը փաստեր էր ներկայացնում Սյունիքի տարածքները, այդ թվում՝ Շուռնուխը, Որոտանը, Փայլասարը, Տեղը, Ներքին Հանդը եւ այլ դիրքերը թշնամուն հանձնելու մասին», - նշել է Նարինե Կիրակոսյանը։ Հիշեցնենք, որ վերջերս էլ կալանքի տակ հայտնվեց գյումրեցի հետաքննող լրագրող Լիլիթ Աղեկյանը: Նրան բերման էին ենթարկել ո՛չ ավել, ո՛չ պակաս գիշերազգեստով ու հողաթափերով: Ի՞նչ ասես, տոտալիտարիզմի շնչից նիկոլական ժողովրդավարությունն ուղղակի թառամեց, իսկ խոսքի ազատության մասին ո՛չ տեսել են, ո՛չ լսել: Բայց Անուշ Միրզոյանի դեպքն առավել զարմանալի է, ինչի մասին փակագծեր է բացել ԱԺ «Պատիվ ունեմ» խմբակցության քարտուղար Տիգրան Աբրահամյանը: «Նրա նկատմամբ քրեական հետապնդում են սկսել Փաշինյանի` 4 տարի առաջ կայացած Սյունիքի այցը լուսաբանելու համար: Լրագրողը մեղադրվում է Փաշինյանին «ողջույներ» հղելն ու վերջինիս այդ օրվա արկածներն իր ողջ գույներով լուսաբանելու համար: Այսինքն` իշխանությունն այդ այցն ու դրանում տեղ գտած իրադարձությունները հանցագործություն է դիտարկում, ապա դրա լուսաբանումն էլ որպես հանցագործակցության օժանդակություն», - զարմացած է պատգամավորը:

Իսկ թուրքական մամուլն աչքալուսանք է տվել, թե ԼԵՎՈՆ 14-ՐԴ Հռոմի նորընտիր պապը կեսարիահայ է: Ըստ լայնորեն տիրաժավորվող տեղեկության` վերջինս նախկին էվերեկցի` ներկայումս Դեվերիցի-Կեսարացի հայի՝ Սեդրակ Բարսեղյանի թոռն է։ Մեծ հայրը 1915 թվականին Էվերեկից մեկնել է Արգենտինա։ Տարօրինակն այն է, որ ըստ պաշտոնական կենսագրության եւ արխիվային տվյալների` Լեւոն 14-րդ պապի հորական կողմը իտալական եւ ֆրանսիական ծագում ունի, իսկ մորական կողմը՝ Նյու Օռլեանի կաթոլիկ կրիոլ համայնքից՝ իսպանական, աֆրիկյան եւ եվրոպական խառը արմատներով։ Թե որտե՞ղ են թուրքերը գտել հայկական արմատ, միայն Ալլահը կիմանա: Բայց առանց խորամուխ լինելու՝ հայերն արդեն սկսել են պարծենալ, թե՝ «աշխարհը մերն ա, մերն ա, ամեն մի հայ, աշխարհի տերն ա»:

ԶԱՐՄԱՑԱԾ Է «ԻՐԱՎՈՒՆՔ»-Ը