Հեղինակավոր «Նաիզա 73» մրցաշարում Կամո Ունանյանը կմենամարտի Թուխտամուրադովի հետ

Հայաստանի կարատեի միության հիմնադիր, կարատեի աշխարհի և Եվրոպայի բազմակի չեմպիոն, MMA մարզիկ Կամո Ունանյանը մայիսի 30-ին կմենամարտի Ղազախստանում կայանալիք հեղինակավոր «Նաիզա 73» մրցաշարում։ Հայ մարզիկի մրցակիցը կլինի Ուզբեկստանը ներկայացնող փորձառու մարզիկ Թուխտամուրադովը։

Ունանյանը MMA-ում հանդես է գալիս ընդամենը 3 տարի, սակայն արդեն հասցրել է գրանցել տպավորիչ՝ 7 հաղթանակ և 0 պարտություն ռեկորդը։ Նրա վերջին մենամարտը կայացել է 2024թ․ հուլիսի 15-ին «MixFight» կազմակերպությունում, որտեղ նա նոկաուտով հաղթել է ղազախ մարզիկին՝ դառնալով WKN վարկածով աշխարհի գոտու տիտղոսակիր։

Վերջին շրջանում Ունանյանը առողջական խնդիրների պատճառով վերականգնողական փուլ է անցել, շուրջ 3 ամիս առաջ ենթարկվել է վիրահատության, սակայն այժմ կրկին մրցահարթակում է՝ լիարժեք պատրաստակամությամբ։

«Վիրահատությունից հետո բավական ժամանակ է անցել, ինձ լավ եմ զգում։ Մարզումներիս առաջին փուլն անցկացրել եմ Հայաստանում, այնուհետև շարունակել Դուբայում։ Այժմ արդեն վերադարձել եմ Հայաստան և մարզումներս շարունակում եմ այստեղ», – նշում է Ունանյանը և ընդգծում․ «Մարտական եմ տրամադրված»։

 Կամո Ունանյանի փոխանցմամբ «Նաիզա» հեղինակավոր կազմակերպության հետ պայմանագիրը ստորագրվել է շատ կարճ ժամանակ առաջ՝ մրցաշարին նախորդող շաբաթների ընթացքում։

«Մենամարտի մասին իմացել եմ մոտ 2 շաբաթ առաջ, իսկ «Նաիզայի» հետ պայմանագիրը կնքել ենք 20 օր առաջ, երբ կազմակերպության նախագահ՝ Նուրբեկ Կարաբալան գտնվում էր Երևանում», – մեզ հետ զրույցում պատմեց Ունանյանն ու նաև ընդգծեց, որ «Նաիզան MMA-ի ամենալուրջ կազմակերպություններից է։ Մրցաշարը կայանալու է Ղազախստանի «Կարագանդա» արենայում։ Թեպետ Ունանյան յուրաքանչյուր մենամարտի պատրաստվում է լիարժեք, սակայն այս մենամարտը իր մարզական կարիերայի համար որոշիչ է լինելու․ «Մրցակիցս բավական փորձառու է, Ասիայում ճանաչված մարզիկ է (12 հաղթանակ, 5 պարտություն ռեկորդով), բայց տրամադրվածությունս մարտական է։ Այս մենամարտից հետո շատ բան պարզ կլինի՝ շարունակելո՞ւ եմ հանդես գալ պրոֆեսիոնալ սպորտում, թե՝ ոչ, քանի որ արդեն բոլորին է հայտնի, որ առողջական խնդիրներ ունեմ։ Այս պահին ողջ ուժերս կենտրոնացրել եմ մարտին լիարժեք պատրաստ լինելու վրա»։

«Նաիզա» կազմակերպության նախագահ Նուրբեկ Կարաբալան մեզ հետ ունեցած բացառիկ հեռախոսազրույցում ընդգծեց, որ Կամոյի հետ համագործակցությունը պայմանավորված է առաջիկա մենամարտի արդյունքներով․ «Մեկ մենամարտի պայմանագիր ենք կնքել Կամոյի հետ։ Ամեն ինչ կախված է այս մենամարտից։ Եթե այն հաջողությամբ ավարտվի և Կամոն հաղթանակ գրանցի, հետագայում արդեն պարզ կլինի, թե ինչպես կշարունակենք մեր համագործակցությունը», – ասաց Կարաբալան և հավելեց․ «Մենք տեղյակ ենք Կամոյի առողջական խնդիրների մասին, որ վերջերս նաև ողնաշարի լուրջ վիրահատության է ենթարկվել, սակայն հուսով ենք, որ այս մենամարտը բարեհաջող կընթանա»։

Հեռախոսազրույցի ընթացքում «Նաիզա» կազմակերպության նախագահից հետաքրքրվեցինք նաև Կամոյի մրցակցի՝ Թուխտամուրադովի հնարավորությունների մասին։ Ըստ զրուցակցի, Թուխտամուրադովը մեծ հեղինակություն է վայելում Եվրասիայում․ «Շատ անվանի, ճանաչված և ուժեղ մրցակից է»,- տեղեկացրեց Կարաբալան։

Իսկ հնարավո՞ր է առաջիկայում որևէ մրցաշար «Նաիզան» իրականացնի նաև Հայաստանում հարցին, զրուցակիցը տվեց սպառիչ պատասխան․«Պլաններում կան, բայց դեռ չենք կարող ասել, թե երբ կիրագործենք այն»։