«Երրորդմասցի Լյովիկի» գործով դատական նիստը կրկին հետաձգվեց

«Երրորդմասցի Լյովիկի» եւ երկու ընկերների սպանության գործով դատական նիստն այսօր՝ մայիսի 10-ին կրկին հետաձգվել է՝ ամբաստանյալների փաստաբանների բացակայության պատճառով: «Երրորդմասցի Լյովիկի» եւ երկու ընկերների սպանության մեջ մեղադրվող Վահան Հակոբյանի, Սարգիս Գրիգորյանի ու Սարգիս Հախանումյանի փաստաբանները զանգել եւ տեղեկացրել են, որ հիվանդության պատճառով չեն կարող ներկայանալ դատական նիստին:

 Հիշեցնենք, որ մայիսի 3-ին, Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում մեղադրական եզրակացության եզրափակիչ մասի հրապարակումից հետո ամբաստանյալները հրաժարվել են որեւէ հարցի պատասխանել` նշելով միայն, որ մեղավոր չեն:

Դատական նիստին վկաներից ոչ ոք չէր ներկայացել: Հինգ- վեց վկաներից միայն մեկը հեռախոսով հայտնել էր, որ ընկել է, վնասել աչքը եւ այժմ գտնվում է հիվանդանոցում:

Գործով վկաները 57-ն են:

Ըստ մեղադրական եզրակացության` 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը  եւ Սարգիս Գրիգորյանը («Ծգլ») նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել Լեւոն Ղազարյանի, Դրաստամատ Թադեւոսյանի եւ Մեսրոպ Նազարյանցի ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նրանց մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 1-ին, 6-րդ, 7-րդ կետերով: Խափանման միջոց է ընտրվել կալանավորումը:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝