Եթե ողջ հանրապետության տրանսպորտային շարժը կաթվածահար անելն ահաբեկչություն է, Նիկոլը վաղուց պետք է քրեորեն պատժված լիներ

Շարունակենք անդրադառնալ Հայաստանի քննչական կոմիտեի (ՔԿ) ս. թ. հունիսի 25-ի հաղորդագրությունում փայլատակող մտքի «գոհարներին»…

Դրանցից մեկի համաձայն` «Հայաստանի Հանրապետությունում իշխանությունը զավթելու իրենց հանցավոր նպատակն իրագործելու նպատակով Վ․Գ․-ն (Տավուշի թեմի նախկին առաջնորդ, արքեպիսկոպոս Բագրատ Գալստանյանը.- Ա. Հ.) եւ հանցավոր խմբի մյուս անդամները (Գալստանյանի կողմից նախաձեռնված եւ ղեկավարվող «Սրբազան պայքար» անվանումով շարժման մասնակիցները եւ այլ ղեկավարները.- Ա. Հ.) պլանավորել են կատարել ահաբեկչություն, այն է՝ քաղաքացիական անձանց կյանքից զրկելու, առողջությանը ծանր կամ միջին ծանրության վնաս պատճառելու, խոշոր չափերի գույքային վնաս պատճառելու եւ այլ ծանր հետեւանքներ առաջացնելու վտանգով զուգորդված հրավտանգ արարքներ, մասնավորապես՝ … տրանսպորտային միջոցների հիմնական շարժն ապահովող խոշոր եւ բանուկ փողոցներում, պողոտաներում տասնյակ ավտոմեքենաների վթարների տձեւացում, իսկ իրականում դրանց դիտավորյալ բախումներ կազմակերպելու…»:

Էլի չի գրված, թե ինչ, հավանաբար դարձյալ նկատի ունեն միջոցով, այսինքն՝ նշված բախումները կազմակերպելու միջոցով «կաթվածահար անել ողջ հանրապետության տրանսպորտային շարժը»: Բայց այդ դեպքում ի՞նչ է նշանակում «վթարների տձեւացում» -ը…

Ըստ «Ժամանակակից հայոց լեզվի բացատրական բառարանում» նշված բառի բացատրության, «տձեւացում» բառը նշանակում է «տձեւանալը, տձեւացնելը», այսինքն՝ «տձեւ դառնալ», «տձեւ դարձնել»: Եվ, ուրեմն, ի՞նչ է նշանակում ավտոմեքենաների վթարների տձեւացում, «իսկ իրականում դրանց դիտավորյալ բախումներ» կազմակերպել: Սա ի՞նչ ցնդաբանություն, բարբաջանք է: Կարո՞ղ է ավտոմեքենաների վթարները գեղեցիկ են, բայց հիշյալ անձինք ցանկացել են կազմակերպել արտաքնապես նշված վթարների տձեւացում, «իսկ իրականում դրանց դիտավորյալ բախումներ»…  

Եվ ո՞վ կարող է հավատալ, թե տրանսպորտային միջոցների հիմնական շարժն ապահովող խոշոր եւ բանուկ փողոցներում, պողոտաներում տասնյակ ավտոմեքենաների թեկուզ դիտավորյալ բախումներ կազմակերպելու միջոցով Հայաստանում հնարավոր է իշխանության զավթում կամ զավթման եղանակով իշխանության յուրացում: Ոչ թե տասնյակ, հարյուրավոր ավտոմեքենաների այդպիսի վթարներ էլ կազմակերպվեն, Նիկոլին եւ իր ոհմակին (չարախմբին) չեն հարկադրի իշխանությունը հանձնել:

Ավելին. առանց Բագրատ արքեպիսկոպոս Գալստանյանի եւ այլոց կողմից կազմակերպելու էլ, Հայաստանում 24- 36 ժամվա ընթացքում (այս ժամանակահատվածը ՔԿ-ի հաղորդագրությունից է վերցված) տասնյակ ավտովթարներ են լինում: Ճիշտ է, դրանք բոլորը չէ, որ տրանսպորտային միջոցների հիմնական շարժն ապահովող խոշոր եւ բանուկ փողոցներում, պողոտաներում են լինում, բայց եթե դրանց հավելենք հատկապես Նիկոլի իշխանության մեղքով ու վարած քաղաքականության արդյունքում տրանսպորտային միջոցներով հանցավոր կերպով գերբեռնված Երեւանի փողոցներում, պողոտաներում, այդ թվում՝ խոշոր եւ բանուկ, զանգվածային բնույթ ունեցող խցանումները, պատկերը կամբողջանա, այսինքն՝ կլինի ՔԿ-ի հաղորդագրությունում նկարագրված իրավիճակը:

Նույն հաղորդագրությունում նշված՝ խաչմերուկներում երթեւեկությունը կարգավորող լուսացույցների զանգվածային խափանումներն էլ Երեւանում երբեմն զանգվածային բնույթ ունեն: Գալստանյանը եւ մյուսները վերոնշյալ միջոցների գործադրմա՞մբ էին պլանավորել Հայաստանում իրականացնել ահաբեկչական եւ իշխանությունը զավթելուն ուղղված գործողություններ՝ «նպատակ հետապնդելով կազմալուծել հանրային իշխանության մարմինների գործունեությունը եւ Սահմանադրությամբ սահմանված կարգով ՀՀ իշխանությունն ստանձնած անձանց՝ հարկադրել հրաժարվել դրանից»… Դե, եթե այդպես է, ապա նրանք առանց վերոնշյալ «ահաբեկչության» էլ, վաղուց արդեն հրաժարական տված պետք է լինեին:

Հարյուրավոր աշխատակիցներ ունեցող հսկայական Քննչական կոմիտեում, պարզվում է, տրամաբանությունից լրջորեն կաղում են: Ահա ՔԿ-ի ս. թ. հունիսի 25-ի հաղորդագրության վերնագիրը. ««Սրբազան պայքար» անվանումով շարժման մասնակիցները եւ ղեկավարները պլանավորել էին ՀՀ-ում իրականացնել ահաբեկչական եւ իշխանությունը զավթելուն ուղղված գործողություններ»: Իսկ գուցե ղեկավարները եւ մասնակիցնե՞րը… Թե՞ մասնակիցներն են նախաձեռնել ու ղեկավարներին համոզել միանալ ահաբեկչական եւ իշխանությունը զավթելուն ուղղված գործողությունների պլանավորմանը…

Եթե ՔԿ-ում տրամաբանությունից չեն կաղում, ուրեմն՝ մոգոնելու եղանակով քրեական վարույթ նախաձեռնելու հապշտապ հրահանգ են ստացել, այլապես ուրիշ ի՞նչ հետեւության կարելի է հանգել…

Ըստ ՔԿ-ի նույն հաղորդագրության` Հայաստանում «իշխանությունը զավթելու իրենց հանցավոր նպատակն իրագործելու նպատակով Վ․Գ․-ն եւ հանցավոր խմբի մյուս անդամները պլանավորել են կատարել ահաբեկչություն, այն է՝ քաղաքացիական անձանց կյանքից զրկելու, առողջությանը ծանր կամ միջին ծանրության վնաս պատճառելու, խոշոր չափերի գույքային վնաս պատճառելու եւ այլ ծանր հետեւանքներ առաջացնելու վտանգով զուգորդված հրավտանգ արարքներ» (ընդգծումները՝ մերը): Այսինքն, ըստ ՔԿ-ի, Բագրատ արքեպիսկոպոս Գալստանյանին ու խմբին վերագրվող ահաբեկչությունը պետք է լիներ հիշյալ վտանգներով զուգորդված հրավտանգ արարքների կատարումը, դրանց թվում նաեւ՝ «տրանսպորտային միջոցները վնասելով կամ դրանք այրելով կաթվածահար անել ողջ հանրապետության տրանսպորտային շարժը»:

Նախ ՔԿ-ում չեն կողմնորոշվել՝ տրանսպորտային միջոցները վնասելո՞վ, թե՞ դրանք այրելով, որովհետեւ տրանսպորտային միջոցների վնասումը հրավտանգ արարք չէ, առնվազն՝ բնավ պարտադիր չէ, որ լինի հրավտանգ արարք, մանավա՛նդ, որ ՔԿ-ի հաղորդագրությունից ակնհայտ է, որ խոսքը տրանսպորտային միջոցների դիտավորյալ բախումներ կազմակերպելու միջոցով դրանց վնասման մասին չէ, քանի որ մինչ այդ դրա մասին առանձին նշված է: Իսկ թե ի՞նչ եղանակով էր լինելու տրանսպորտային միջոցների վնասումը, ՔԿ-ի հաղորդագրությունում նշված չէ:

Երկրորդ. ողջ հանրապետության տրանսպորտային շարժը կաթվածահար անելը հրավտանգ արարք չէ եւ ոչ էլ ահաբեկչություն:

Եվ երրորդ. եթե ՔԿ-ում ողջ հանրապետության տրանսպորտային շարժը կաթվածահար անելն ահաբեկչություն են որակել, ապա քաղաքական պոռնիկ պետք է լինել 2018թ. ապրիլ- մայիսին ճիշտ նույն արարքի՝ ողջ Հայաստանի տրանսպորտային շարժը կաթվածահար անելու համար այժմ Հայաստանի վարչապետի պաշտոնը զբաղեցնող Նիկոլ հայադավի եւ իր ոհմակի բազմաթիվ անդամների նկատմամբ քրեական հետապնդում չնախաձեռնելու, դրանից հետո, դեռ նախկին Քրեական օրենսգրքի գործողության ժամանակահատվածում քրեական գործ չհարուցելու, նրանց նկատմամբ, որպես խափանման միջոց, կալանք կիրառելու միջնորդությունը դատարան չներկայացնելու համար:

ԱՐԹՈՒՐ ՀՈՎՀԱՆՆԻՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝