Կանադան անհանգստացած է Մայր Աթոռի շուրջ զարգացումներով

Կանադայի արտաքին գործերի նախարարի խորհրդարանական քարտուղար ՌՈԲ ՕԼԻՓՀԱՆԹԸ X-ի իր էջում գրառում է կատարել՝ մտահոգություն հայտնելով Մայր Աթոռ Սուրբ Էջմիածնի շուրջ ստեղծված իրավիճակի վերաբերյալ:

«Հայաստանում ստեղծված իրավիճակը, ներառյալ Բագրատ եւ Միքայել արքեպիսկոպոսների կալանավորումն, ինչպես նաեւ ատելության խոսքի աճը Մայր Աթոռ Սուրբ Էջմիածնի նկատմամբ, լուրջ մտահոգություններ են առաջացնում։

Կանադան գնահատում է իր գործընկերությունը Հայաստանի հետ՝ մի հարաբերություն, որը հիմնված է ժողովրդավարական կառավարման, մարդու իրավունքների եւ օրենքի գերակայության անկողմնակալ կիրառման ընդհանուր համոզմունքի վրա։

Մենք վստահ ենք, որ Հայաստանի իշխանությունները քայլեր կձեռնարկեն այս սկզբունքները պահպանելու ուղղությամբ։ Աշխարհի այդ տարածաշրջանում աճող անկայունության պայմաններում Հայաստանի ժողովրդավարական առաջընթացն առավել քան երբեւէ կարեւոր է՝ ինչպես իր ժողովրդի, այնպես էլ ողջ տարածաշրջանի համար», - նշել է նա։

Հիշեցնենք, որ «Իրավունք»-ն ավելի վաղ իր զարմանքն էր արտահայտել,որ զարհուրելի լռություն է պահպանում ՀՀ-ում Կանադայի արտակարգ եւ լիազոր դեսպան ԷՆԴՐՅՈՒ ԹԸՐՆԵՐԸ՝ Հայաստանում վերջին զարգացումների վերաբերյալ: Մասնավորապես ընդգծել էինք, որ եթե ռուսաստանաբնակ Սամվել Կարապետյանը կալանավորվում է Հայ Առաքելական եկեղեցուն զորակցելու համար եւ աշխարհաքաղաքական հակառուսականության «թրենդի» տիրույթում կարելի է բացատրել պարոն դեսպանի լռությունը, ապա անհասկանալի է, երբ լռում է Կանադայի քաղաքացի Տ. Բագրատ արքեպիսկոպոս Գալստանյանի կալանավորման ժամանակ: Նաեւ հիշեցրել էինք, որ երկրի արտգործնախարար Մելանի Ժոլին ՀՀ-ում կանադական դեսպանատուն բացելու առթիվ ասել էր, որ աջակցելու են Հայաստանում ժողովրդավարության ամրապնդմանը: Եվ ահա արձագանքը Կանադայի արտգործնախարարությունից երկար սպասեցնել չտվեց:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝