Ավանդապահ Ռամկավար Ազատական կուսակցությունը հերքում է կուսակցության անունից Մայր Աթոռի դեմ տարածված կեղծ հայտարարությունները

Կը Մնանք Մայր Աթոռին եւ Հայոց Ազգային Պետականութեան Անսակարկ եւ Անժամանցելի Դրօշակակիրները,

 

Խստօրէն Կը Դատապարտենք Մեր Հայրենիքին Մէջ

 

Ներկայ Պժգալի Փողոցային Վիճակը Ստեղծողները,

 

Մեր կուսակցութեան անունը չարաշահող, ինքնահռչակ խմբակ մը, տարիներէ ի վեր, ժամանակ առ ժամանակ յանկարծ կ՛արթննայ եւ կեղծիքով կը չարաշահէ Ռամկավար Ազատական Կուսակցութեան պանծալի անունը:

 

Վերջին օրերուն, սոյն խմբակը իր խաչագողութիւնը թագադրած էր 11 Նոյեմբեր 2025 թուակիր՝ «Զգաստութեան Սրտագին Կոչ» վերնագրեալ բազմալեզու խեղկատակութեամբ մը, որուն մէջ յականէ անուանէ կը փորձէ թիրախաւորել Մայր Աթոռն ու անոր գահակալը, ՀԱԵ-ի նուիրեալ կարգ մը միաբաններով հանդերձ:

 

Աւանդապահ Ռամկավար Ազատական Կուսակցութեան Համադրուած Մամուլի ներկայացուցիչներս, մեր գաղափարախօսութեան բազմահազար հետեւորդներուն, համակիրներուն եւ ընթերցողներուն անունով խստիւ կը դատապարտենք, անձնական մանր խնդիրներով, թէ քաղաքական քինախնդիր ու ճղճիմ հաշուարկներով առաջնորդուող պատեհապաշտներու այդ արհամարհելի խմբակին անընդունելի եւ այպանելի վարքը:

 

Նշեալ խմբակին արկածախնդրութիւններուն եւ մեքենայութիւններուն ծանօթ եւ անծանօթ հանրութեան անգամ մը եւս կու գանք հաստատելու, որ մեր պանծալի կուսակցութեան շարքերուն բացարձակ մեծամասնութիւնը չի ճանչնար ինքզինք «Կեդրոնական Վարչութիւն» կոչած այդ հերձուածը, որ ոչ իսկ հիւլէի մը չափ գոյութիւն ունի մեր օրերու ազգային տագնապալի վիճակին նպաստելու անհրաժեշտ համազգային աշխատանքին մէջ: Մինչ անոր իրական թէ երեւակայածին անդամները հազիւ իրենք իրենց անձերը կը ներկայացնեն: Հետեւաբար ամէն ինչ, որ լոյս կը տեսնէ այդ խմբակին կողմէ պարզապէս առ ոչինչ է:

 

Հիմնուելով վերոյիշեալին վրայ, կ՛ուզենք շեշտել, որ մե՛նք՝ աւանդապահ Ռամկավար Ազատականներս, հաւատարիմ մեր աւելի քան հարիւրամեայ անխախտ ուղեգիծին, կը շարունակենք անսակարկ դրօշակակիրները մնալ Մայր Աթոռին ու մեր պետականութեան եւ այս ազգային երկու անսակարկելի արժէքներուն համար, գործնապէս՝ մեր մամուլով եւ առարկայական գործունէութեամբ կը հանդիսանանք ամուր պատնէշն ու պաշտպանը ամէն տեսակի ոտնձգութիւններու դէմ:

 

Պէտք է անմիջապէս դադարեցնել ներկայ պժգալի փողոցային ու անօրէն վիճակը ու վերադառնալ ազգային միասնականութեան գաղափարախօսութեամբ առլցուն աշխատանքի: