Քվե տալը ՔՊ-ին նշանակում է քվե տալ Փաշազադեին` ընդդեմ Հայ Առաքելական եկեղեցու. Սուքիասյան

Վաղարշապատ համայնքի ՏԻՄ ընտրություններում անցողիկ շեմը հաղթահարել է 3 ուժ՝ հաղթել է իշխող «Քաղաքացիական պայմանագիրը»՝ համայնքապետի թեկնածու Արգիշտի Մեխակյանի գլխավորությամբ, երկրորդ տեղում «Հաղթանակ» դաշինքն է, եռյակը եզրափակում է «Մայր Հայաստանը»: «Իրավունք»-ը զրուցել է Երեւանի ավագանու «Մայր Հայաստան» խմբակցության ղեկավար ՄԱՆՈՒԿ ՍՈՒՔԻԱՍՅԱՆԻ հետ:

— «Մայր Հայաստան»-ը Վաղարշապատի ավագանիում ունենալու է երկու մանդատ: Ինչպե՞ս կգնահատեք տեղի ունեցած ընտրությունները:

— Ընտրությանը մասնկացած քաղաքացիներից կեսից ավելին, այնուհանդերձ, ձայն չի տվել ՔՊ-ին եւ օրենսդրության կարգավորման մեջ այս առիթը մտածելու տեղիք տվեց, ինչքանով է արդարացի, որ կեսից պակաս ձայն ստացած անձն իշխանություն ձեւավորի: Այդ առումով արձանագրում ենք, որ ոչ ՔՊ-ական ձայները գերակշռում են եւ շատ մեծ ընդդիմադիր ընտրազանգված կա, որի հետ պետք է շարունակել աշխատելը:

— Այնուհանդերձ հաղթանակ տարավ ՔՊ-ն…

— Դե օրենսդրությամբ, այո, հաղթանակը իրենցն է, սակայն երբ նայում ենք ՏԻՄ խոշոր քաղաքներում իրենց տոտալ պարտությունները, չեմ կարծում, թե հանրության մեջ իրենց ունեցած վարկանիշի առումով, սա մեծ փոփոխության ցուցիչ է:

— Եթե համեմատենք Գյումրիի ՏԻՄ ընտրություններում ընդդիմության գրանցած արդյունքների հետ, ի՞նչ դասեր պետք է քաղել:

— Հավանաբար, ամեն բնակավայր ունի առանձնահատկություն, որոշակի մթնոլորտ: Օրինակ` Գյումրիում ձայները չփոշիացան: Այսինքն, կարելի է ասել, բոլոր ընդդիմադիր ֆավորիտները անցողիկ շեմը հաղթահարեցին: Այս պարագայում, «Հայրենիք»-ը եւ «Ժառանգություն»-ը պետք է, որ կոնսոլիդացնեին կամ իրական գնահատելով իրենց ձայները չմասնակցեին: Այսինքն, որոշակիորեն նաեւ այդտեղ պատկերը փոփոխության ենթարկվեց:

— Փաշինյանը գրառում է կատարել՝ նշելով, թե՝ վաղարշապատցիներն իրենց ընտրությամբ կարեւոր լիցք տվեցին մեր սրբության սրբոցը՝ Մայր Աթոռ Սուրբ Էջմիածինը «Կտրիճ Ներսիսյանից ազատելու գործընթացում»։ Ի՞նչ պետք է անի ընդդիմությունը, որպեսզի պաշտպանի Եկեղեցուն:

— Էջմիածնի ընտրությունների ճակատագիրը, որ կարող էր նշանալի լինել Նիկոլ Փաշինյանի համար, մենք դա նույնիսկ քարոզարշավի ժամանակ ենք ասել, որ քվե տալը ՔՊ-ին նշանակում է քվե տալ Փաշազադեին՝ ընդդեմ Հայ Առաքելական եկեղեցու: Մեկ օր էլ չանցած, բոլորը տեսան, ինչպես է նա այդ մասին անկեղծ խոստովանում: Այսինքն, այս ընտրությունների արդյունքները, որպես տրամպլին օգտագործելն է Հայ Առաքելական եկեղեցու եւ Վեհափառի դեմ:

Մեր փորձից պետք է ասեմ, որ մթնոլորտ է փոխվում, եւ մարդկանց մոտ վերաբերմունք է փոխվում, բացառապես տուն առ տուն եւ գյուղ առ գյուղ մտնելը, մարդկանց հետ աշխատելն ու խոսելը: Այսինքն, մարդկանց հետ պետք է ունենալ անկեղծ խոսակցություն ներկայի եւ ապագայի մասին: Միայն անկեղծությամբ է հնարավոր մարդկանց բերել որոշակի ընդդիմադիր դաշտ, քանի որ կա մի պարզ վիճակագրություն. գրեթե 70 հազար ընտրողից, ՔՊ-ն տարել է 15 հազար ընտրողի ձայն: Պիտի ասեմ՝ «Մայր Հայաստան»-ը նախանձախնդիր եւ հետեւողական կերպով գնացել է ընտրողի ետեւից, իսկ առաջիկայում էլ ավելի անելիք կա: Մենք գտնվում ենք սպորտային մարզավիճակում:

—Ի դեպ առաջիկայի մասով: Առջեւում 2026 թվականի ընտրություներն են: Մտավախություն չունե՞ք, որ կրկին նույն պատկերը կլինի եւ թեկուզ չնչին տոկոսային առումով, ներկայիս իշխանությունը կվերընտրվի:

—Այդ մտավախությունները ուղիղ համեմատական են ընդդիմադիր դաշտի այս կամ այն ուժի իներտ կամ ակտիվ, ֆորմալիստական կամ մաքսիմալ անկեղծ քարոզարշավից, խոսույթից, զրույցից, դեմքերից: Նաեւ փակ ու տաբու թեմաներ չլինելուց: Պետք է անդրադարձ լինի մեր պետության բոլոր դրվագներին: Մտավախությունները միայն այդ պարագայում կլինեն: Կրկնում եմ, մարդիկ կարիք ունեն անկեղծ խոսքի, շփման եւ անմիջականության: Անկախ քաղաքական բանախոսի դիրքից ու անցած ճանապարհից, պետք է գնալ, կանգնել քաղաքացու կողքին, բացատրել եւ որոշ միֆեր ցրել, նույնիսկ խոսել վրիպումների, արատավոր դեպքերի մասին ու անկեղծանալ, որ եղել է կամ կա նման դեպքեր եւ պատասխանատվություն ստանձնել, որ հետագայում այդ ամենի դեմ հենց իրենք էլ կպայքարեն եւ կշտկեն:
Մեր մասով ասեմ, որ «Մայր Հայաստան»-ը շատ լավ ընդունելության է արժանացել, նույնիսկ տուն են հրավիրել, հյուրասիրել են ու այլն:

— Բողոքարկելո՞ւ եք ընտրությունների արդյունքները:

— Ձայների հարաբերակցությունը եւ այդ խախտումների տեսակարար կշիռը կդժվարանամ ասել, թե այս պահին բողոքարկման հիմք է տալիս: Բայց մեզ համար ակնհայտ էր, որ այն ուղղորդումները, որոնք կային տեղամասերի մոտակայքում, նույնպես ազդել է ընտրության արդյունքների վրա: Այսինքն՝ սրանք ազատ, արդար ընտրություններ չէին: Օրինակ, քարոզարշավից մեկ օր առաջ՝ Դողս գյուղում սեղան էին գցել, եւ ինչ-որ նվերներ էին բաժանել: Նույնիսկ մեկ երեխայի 10 հազար դոլար գումար են տվել: Դպրոցի տնօրենը Գեղակերտում բացեիբաց բարիքներ էր բաժանում՝ մինչ իրավապահները կկասեցնեին դա: Սակայն, արդեն իրենք իրենցն արել էին եւ հասցեատերերը մնացել էին երախտիքի պատասխանատվության տակ:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝